އެމްޑީޕީ އިސްވެ އޮވެ ހިންގާ ކޯލިޝަން ސަރުކާރުން މިއަދު ވެރިކަން ކުރަމުން ދަނީ "ހެޔޮވެރިކަމާ" ދިމާ އިދިކޮޅަށް ކަމަށް މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެ އެވެ.
ވައްޑެ މިފަދައިން ވިދާޅުވެފައިވަނީ ތިން ބާރު ވަކިވެފައިވާ ވެރިކަމުގެ ނިޒާމެއް މަސްހުނިކޮށް ގަޑުބަޑުކުރުމަށް ކުރަމުންދާކަން ފާހަގަކުރައްވާ ފާޑުވިދާޅުވެ ކުރެއްވި ޓްވީޓެއްގަ އެވެ.
ވައްޑެ ވިދާޅުވީ މި ވެރިކަމުގެ ދައުރު ނިމިގެން ދަނީ ސަރުކާރުގެ ބޮޑެތި ސިޔާސީ މަޤާމުތަކުގައި ތިބި މީހުން ޑިސިޕްލިން ނުކުރެވި، އެވެރީން ލައްވައި ސަރުކާރުގެ ސިޔާސަތު ނުހިންގުވި، ސަރުކާރު ތެރޭ އެތައް ސަރުކާރެއް ހިނގާން ދޫކޮށްލެވިފައި އޮއްވާ ކަމަށެވެ.
މިއަދު ސަރުކާރު ޖަވާބުދާރީ ކުރުވުމުގެ މަސައްކަތް ކުރާނެ މާހައުލެއް ރައްޔިތުންގެ މަޖިލީހުގައި ނެތް ކަމަށާއި، މިއަދު ރައްޔިތުންގެ މަޖިލިސް ވެފައިވަނީ ސަރުކާރުން ކޮންޓްރޯލު ކުރާ ތަނެއްގެ ގޮތުގައި ކަމަށް އޭނާ ވިދާޅުވި އެވެ.
"ސަރުކާރު ޖަވާބުދާރީ ކުރުވުމުގެ ޒިންމާ އޮތް ރައްޔިތުން މަޖިލިސް އެވަނީ “ރައީސުލްޖުމްހޫރިއްޔާގެ މަޖިލިހަކަށް” ހައްދަވާފައެވެ. މަޖިލިސް ކޮމިޓީތައް މިނިސްޓްރީތަކުގެ “ބިއުރޯތަކަކަށް” ހަދާފައެވެ. މިއީ އެމްޑީޕީން ބަޔާންކުރަމުން އައި ހެޔޮވެރިކަމާ ދިމާ އިދިކޮޅެވެ"
މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު
ވައްޑެ ވިދާޅުވީ ރައީސް ޞާލިހުގެ އަރިހުގައި މިއަދު ތިއްބެވީ އެމްޑީޕީ އުފައްދަން އެންމެ ބޮޑަށް ދެކޮޅު ހެދި މީހުން ކަމަށެވެ.
އެމީހުން އެންމެ އަރިހުގައި ބައިތިއްބައިގެން މިހާރު ރައީސް ޞާލިހު އެ ކުޅުއްވަނީ "އެމްޑީޕީ އާއި އިދިކޮޅު" މީހުންގެ އޭޖެންޓެއްގެ ރޯލުކަމަށް ވައްޑެ ވިދާޅުވި އެވެ.
ވައްޑެ ވަނީ މީގެ ކުރިންވެސް އެތައް ފަހަރަކު ސަރުކާރުން މަޖިލީސް ކޮންޓްރޯލު ކުރަމުންދާކަން ފާހަގަކޮށް ނުރުހުން ފާޅުކުރައްވާފަ އެވެ. އެގޮތުން ސަރުކާރުން ބޭނުންވާހާ ގޮތަކަށް މަޖިލީހުން މިއަދު ކަންކަން ފާސްކުރަމުން ދާކަމަށާއި، އިދިކޮޅުގެ އަޑު ކަނޑުވާލުމަށް މަޖިލީހުގައި ތިއްބެވި "ސަރުކާރުގެ މެމްބަރުން" މަސައްކަތް ކުރަމުންދާކަމަށް އޭނާ ވިދާޅުވެފައި ވެއެވެ.
Advertisement
This content is created and paid for by advertisers and does not involve Voice Journalists
