ގައުމީ ސާފް ލީގުގެ ފުރަތަމަ މުބާރާތް ކަމަށްވާ ކަޅެގަލެކޮޑާ 2023ގެ ފައިނަލުގައި އެންމެ ފަހުގެ ޗެމްޕިއަން އިސްމާއިލް ރަޝީދު (ސްމައިލީ) ބަލިކޮށް، މުހައްމަދު ނަޖާހު (ކަބޯ) ޗެމްޕިއަންކަން ހޯދައިފި އެވެ.  މުބާރާތުގެ ފައިނަލުން ސްމައިލީ ޖާގަހޯދީ ސެމީ ފައިނަލުގައި ހަސަން ނާސިހު (ޗިކާ) ވާދަކޮށް މޮޅުވެގެންނެވެ. އަދި ކަނބޯ ފައިނަލުގެ ޖާގަހޯދީ ސެމީ ފައިނަލުގައި 12 އަހަރުގެ ޔޫސުފް ކަޔާން ހަމްދާން ޒަކީ އާއި ވަދަކޮށް މޮޅުވެގެންނެވެ.

އިސްމާއިލް ރަޝީދު (ސްމައިލީ)، މުހައްމަދު ނަޖާހު (ކަނބޯ)

މިއީ ޤައުމީ ފެންވަރުގެ މުބާރާތެއްގެ ޗެންޕިއަންކަން ނަޖާހު ހޯދި ފުރަތަަމަ ފަހަރެވެ. ނަމަވެސް މީގެ ކުރިން މިދިޔަ އަހަރު ގައުމީ ލީގުގައި ކުރިއަށްދިޔަ ފަސް މުބާރާތުގެ ތެރެއިން ދެ މުބާރާތެއްގެ ފައިނަލުގައި ކަނބޯ ވާދަކޮށްްފައިވެއެވެ. އޭގެ ތެރޭގައި މިދިޔަ އަހަރު ގައްދޫގައި ބޭއްވުނު މުބާރާތުގެ ފައިނަލް ވެސް ހިމެނެއެވެ.

ގައްދޫގައި ކުރިއަށްދިޔަ މި އަހަރުގެ ކަޅެގަލެކޮޑާ 2023 އަކީ ސާފިން އެސޯސިއޭޝަނުން އެ ރަށުގައި ބޭއްވި ތިން ވަނަ މުބާރާތެވެ. މީގެ ކުރިން ބޭއްވުނު ދެ މުބާރާތް ވެސް ކާމިޔާބުކުރީ އިސްމާއިލް ރަޝީދު (ސްމައިލީ) އެވެ. ޖެހިޖެހިގެން ތިން ވަނަ ފަހަރަށް މުބާރާތް ކާމިޔާބުކުރަން ނުކުތް ސްމައިލީ ފައިނަލުގައި މިއަދު ބަލިވީ 0.33 ގެ ކުޑަ ތަފާތަކުންނެވެ. ވާދަވެރި ފައިނަލަކަށް ފަހު މުހައްމަދު ނަޖާހު (ކަނބޯ) ޗެމްޕިއަންކަން ހޯދިއިރު ފައިނަލުގައި އޭނާ ވަނީ 15.33 ގެ ސްކޯއެއް ހޯދާފައެވެ. ފައިނަލުގައި ބަލިވި އިސްމާއިލް ރަޝީދު (ސްމައިލީ) އަށް ލިބުނީ 15.00 ގެ ސްކޯއެކެވެ.

ފައިނަލުގެ ފުރަތަމަ ރާޅު އެޅި ކަބޯ ވަނީ އެ ރާޅުގައި 8.33ގެ ސްކޯއެއް ހޯދައިފަ އެވެ. އޭގެ ފަހުން ސްމައިލީ ވަނީ ދެ ރާޅުން 7.17 އާއި 7.83ގެ ސްކޯއެއް ހޯދައި ލީޑު ނަގައިފަ އެވެ. 15.00ގެ ސްކޯއެއްގައި އިސްމާއިލް ރަޝީދު (ސްމައިލީ) އޮއްވާ މުހައްމަދު ނަޖާހު (ކަނބޯ) ވަނީ އޭނާގެ ދެ ވަނަ ރާޅުގައި 7.00ގެ ސްކޯއެއް ހޯދައި ފައިނަލުގައި ފުރަތަމަ ފަހަރަށް ލީޑު ނަގާފަ އެވެ. އޭގެ ފަހުން އިސްމާއިލް ރަޝީދު (ސްމައިލީ) ދެ ރާޅު އެޅި ނަމަވެސް އޭނާގެ ދެ ވަނަ އަށް އެންމެ މަތީ ސްކޯ އަށް ވުރެ ރަނގަޅު ސްކޯއެއް ހޯދޭގޮތެއްނުވިއެވެ.