2023 ވަނަ އަހަރުގެ ރިޔާސީ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޓިކެޓު އެ ޕާޓީއިން ބޭއްވި ރިޔާސީ ޕްރައިމަރީ ކާމިޔާބުކުރެއްވި، ޕާޓީގެ އެންމެ އިސް ލީޑަރު އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އަތްޕުޅަށް އަރުވައިފި އެވެ. 

އެމަނިކުފާނު އަތްޕުޅަށް އެ ޓިކެޓު ފަތްކޮޅު އަރުވާފައިވަނީ އެމްޑީޕީގެ ޗެއާޕާސަން އަދި އޮކޮނޮމިކް މިނިސްޓަރު ފައްޔާޒު އިސްމާއިލްއެވެ. އެއާއެކު ރައީސް ޞާލިހު ވަނީ އެމްޑީޕީގެ ރިޔާސީ ޓިކެޓު ގަބޫލުފުޅުކުރައްވާފަ އެވެ. 

އެމްޑީޕީގެ ރިޔާސީ ޓިކެޓު ހޯދުމަށް ބޭއްވި ޕްރައިމަރީގައި ޕާޓީގެ ދެ ރައީސުން ވަނީ ވާދަކުރައްވާފަ އެވެ. 

އެ އިންތިޚާބުގައި ވާދަކުރެއްވި މަޖިލީހުގެ ރައީސް މުހައްމަދު ނަޝީދު (ކެންޑިޑޭޓު ނަންބަރު 1) އަށް ލިބިވަޑައިގަތީ 15641 ވޯޓު ކަމަށެވެ. އެއީ ވޯޓު ލީ މީހުންގެ 38.90 އިންސައްތަ އެވެ. ރައީސުލްޖުމްހޫރިއްޔާ އިބުރާހިމް މުހައްމަދު ޞާލިހު 24566 ވޯޓު ލިބިލެއްވި އެވެ. އެއީ ވޯޓުލީ މީހުންގެ 61.10 އިންސައްތަ އެވެ. 

އެމްޑީޕީގެ ޕްރައިމަރީއަށް ފަހު ރައީސް ޞާލިހު ވަނީ އެމްޑީޕީގެ ތެރޭގައި އުފެދިފައިވާ ދެ ފެކްޝަންގެ ދެމެދުގައި އޮތް ނުތަވަސްކަން ނިމުމަކަށް ގެނެސް ގުޅިގެން މަސައްކަތް ކުރުމަށް އެދިވަޑައިގެންފަ އެވެ. 

ރިޔާސީ ޓީކެޓާއި ހަވާލުވެވަޑައިގެން އެމްޑީޕީގެ މެމްބަރުންނާއި މުޚާތަބުކުރައްވާ އެމަނިކުފާނު ވަނީ ގުޅިގެން މަސައްކަތް ކުރުމަށް މީގެ ކުރިން އެދިވަޑައިގެންނެވި އެދިވަޑައިގަތުން ތަކުރާރުކުރައްވާފަ އެވެ.