ސައުދީ ޕްރޮފެޝަނަލް ލީގުގައި ރޭ އަލްޠާވޫން އާއި ވަދަކޮށް 2-1 ގެ ނަތީއްޖާއަކުން މޮޅުވެ އަލް ނަސްރު އިން ލީގުގެ އެއްވަނަ މަގާމަށް ކުރިއަށް ޖެހިލައިފިއެވެ.

އަލް ނަސްރުގެ ދަނޑުގައި ރޭ ކުޅެވުނު މެޗުގެ ފުރަތަމަ ހާފުގެ ވަރަށް ކުރީކޮޅު އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މި ލަނޑު އެޓީމަށް ކާމިޔާބުކޮށްދިނީ ޢަބްދުއްރަޙްމާން ޣަރީބު އެވެ. މިއީ ފުރަތަމަ ހާފުގެ 17 ވަނަ މިނެޓުގައި އެޓީމުގެ ހާފުތެރޭގައި ހުރެފައި ކްރިސްޓިއާނޯ ރޮނާލްޑޯ ދިން ތުރޫ ޕާހެއްގައި ކުރިއަށް އަރައި ކީއްޕަރުގެ ބޯމަތިން ގޯލްގެތެރެއަށް ބޯޅަ ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

އަލް ނަސްރުގެ ކުޅުންތެރިން ލަނޑުޖެހުމަށް ފަހު އުފާ ފާޅުކުރަނީ

ރޭގެ މެޗުގެ ފުރަތަމަ ހާފުގައި އަލް ނަސްރުގެ ފަރާތުން ގިނަ ހަމަލާތަކެއް އުފެއްދި ނަމަވެސް މިހާފުގައި އެޓީމަށް އިތުރު ލަނޑެއް ކާމިޔާބުކުރެވޭގޮތެއް ނުވިއެވެ. އަދި މި ހާފުގައި އަލްޠާވޫން އަށް އަލް ނަސްރުގެ ގޯލަށް އަމާޒުކޮށް ފޮނުވާލެވުނީ އެންމެ ހަމަލާއެކެވެ.

ދެވަނަ ހާފުގެ ކުޅުން އަލްޠާވޫން އިން ފެށީވެސް ބަދަލަކާއި އެކުގައެވެ. އަދި މިހާފުގައި އެޓީމުގެ އެޓޭކުތައް ފެނުނީ ވަރަށް ވަރުގަދަކޮށެވެ. ނަތީއްޖާއެއްގެ ގޮތުން ދެވަނަ ހާފުގެ ވަރަށް ކުރީކޮޅު އެޓީމުން ލަނޑެއް ކާމިޔާބުކޮށް މެޗުގެ ނަތީއްޖާ އެއްވަރުކުރި އެވެ. ދެވަނަ ހާފު ފެށިގެން ދެވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ ސްޕެނިޝް މިޑްފީލްޑަރ އަލްވާރޯ މެޑްރާން އެވެ. މިއީ އެޓީމުގެ މުޙައްމަދު ޒައިދު އަލް ޣަމްދީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މެޗުގެ ދެވަނަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މިހާފުގެ 68 ވަނަ މިނެޓުގައި އަލްޠާވޫންގެ ކެމަރޫން ފޯވާޑް ލިއަންޑްރޭ ޓަވަމްބާ ލަނޑެއް ކާމިޔާބުކޮށް އެޓީމަށް ލީޑު ހޯދައިދިނެވެ. ނަމަވެސް ވީއޭއާރު އިން ބެލުމަށް ފަހު ރެފްރީ ނިންމީ އެއީ އޮފްސައިޑް ގޯލެއްކަމަށެވެ. މި މެޗުން އަލް ނަސްރު މޮޅުވި ލަނޑު ދެވަނަ ހާފުގެ 78 ވަނަ މިނެޓުގައި ރޮނާލްޑޯ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ އެޓީމުގެ ޑިފެންޑަރ އަބްދުالله މަޑޫ އެވެ.

މި މެޗުން ލިބުނު ތިން ޕޮއިންޓާއި އެކު 17 މެޗުން 40 ޕޮއިންޓް ހަމަކޮށް އަލް ނަސްރު އިން ވަނީ އަލުން ތާވަލުގެ އެއްވަނައަށް ކުރިއަށްޖެހިލާފައެވެ. ދެވަނައިގައި އޮތް އަލް އިއްތިހާދު އާއި ތިން ވަނައިގައި އޮތް އަލް ޝަބާބުއަށް ވެސް 40 ޕޮއިންޓް ލިބިފައިވާއިރު އަލް ނަސްރަށް އެއްވަނަ ލިބެނީ ގޯލުގެ ތަފާތުންނެވެ. އަދި މި މެޗުން ބަލިވި އަލްޠާވޫން އަށް 17 މެޗު ކުޅެގެން ލިބިފައިވަނީ 30 ޕޮއިންޓާއި އެކު ތާވަލުގެ ފަސް ވަނައެވެ.