ކުރިއަށްއޮތް ރިޔާސީ އިންތިޚާބު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ކާމިޔާބުކޮށްދިނުމަށް ޕާޓީގެ ހުރިހާ އެންމެން ގުޅިގެން މަސައްކަތްކުރުމަށް ގޮވާލައްވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު، އެމަނިކުފާނަކީ އެމްޑީޕީ ބޭފުޅެއްކަން ހަނދާން ކޮށްދެއްވައިފި އެވެ.
އެމްޑީޕީގެ ރިޔާސީ ޓިކެޓު ރަސްމީކޮށް އެމަނިކުފާނު އަތްޕުޅަށް އަރުވާފައިވާއިރު، އެމަނިކުފާނު ވަނީ އެމްޑީީގެ ވެރިކަން ދެމެހެއްޓުމަށް އެމަނިކުފާނަށް ވޯޓުދެއްވި ހުރިހާ ބޭފުޅުންނަށްވެސް ޝުކުރުއަދާކުރައްވާފަ އެވެ.
ރޭ އެމްޑީޕީއިން ބޭއްވި ޖަލްސާގައި ރައިސް ޞާލިހުގެ ވާހަކަފުޅު ފައްޓަވަމުން އެންމެ ފުރަތަމަވެސް ވިދާޅުވީ، އެމްޑީޕީގެ ޕްރައިމަރީއިން ފެނިގެން ދިޔައީ ޕާޓީ ތެރޭގައި ތަފާތު ޚިޔާލުތަކަށް ޖާގަ އޮތް މިންވަރު ކަމަށެވެ.
އެހެން ނަމަވެސް، މިހާރު އިންތިޚާބު ނިމި ޕާޓީގެ މެމްބަރުން ގޮތް ނިންމާފައިވާކަމަށާއި، މިއީ އެ ނިންމުމާއި އެއްގޮތަށް ގުޅިގެން މަސައްކަތް ކުރަންވީ ވަގުތުކަމަށް ރައީސް ޞާލިހު ވިދާޅުވިއެވެ.
އެމްޑީޕީގެ ރިޔާސީ ޓިކެޓު ރައީސް ޞާލިހަށް ހަވާލުކުރުމުގެ ރަސްމިއްޔާތުގެ ތެރެއިން.. ފޮޓޯ: އެމްޑީޕީ
"ވަކި މީހަކު އިސްތިނާވުމެއް ނެތި [ޕާޓީ] ބަދަހި ސަފުތަކަށް ރުޖޫއަވާންޖެހޭ. އަޅުގަނޑު ދަންނަވާނީ ޚިޔާލު ތަފާތުވުންތައް އެކަހެރިކޮށް، އަދި ޚިޔާލު ތަފާތުވުން ހުއްޓަސް އެމްޑީޕީ އެކީ ރިޔާސީ އިންތިޚާބަށް ކާމިޔާބުކުރަންޖެހޭ"
ރައީސް ޞާލިހު
އެމަނިކުފާނު ވިދާޅުވީ ރައްޔިތުން ބޭނުންވާ ވެރިކަމެއް ކޮށްދެވޭނީ އެމްޑީޕީއަށް ކަމަށެވެ. އެމަނިކުފާނަށް ވެރިކަން ކުރަން ލިބިލެއްވި ފުރުސަތުގައި ކުރެއްވި މަސައްކަތްޕުޅަކީވެސް އެމްޑީޕީގެ އަސާސްތަކާއި ވިސްނުމާއި އެއްގޮތަށް ރާއްޖެ ތަރައްގީކުރުމުގެ މަސައްކަތްކަމަށް ރައީސް ޞާލިހު ވިދާޅުވިއެވެ.
އެއާއެކު އެމަނިކުފާނު ވަނީ އެއީވެސް ހަމަ އެމްޑީޕީގެ މެމްބަރެއްކަން ހަނދާންކޮށްދެއްވާފަ އެވެ.
ރައީސް ޞާލިހު ރިޔާސީ ޓިކެޓާއި ހަވާލުވެވަޑައިގަންނަވީ.. ފޮޓޯ: އެމްޑީޕީ
"ރާއްޖެ މި ބޭނުންވާ ހަމަޖެހުމާއި، ހަމަހަމަކަމާއި، ތަފާތު ނުކުރުމާ، ތަރައްގީ ގެނެވޭނީ އެމްޑީޕީ ވެރިކަމުގައި އޮވެގެންކަމަށް އަޅުގަނޑަށް ގަބޫލުކުރެވޭތީ. އަދި މިހާރު މި ފަށައިގެން ކުރިއަށް ގެންދާ މަޝްރޫއުތަކަށް ހުއްޓުމެއް ނައިސް ކުރިއަށް ގެންދެވޭނީވެސް އެމްޑީޕީ ވެރިކަމުގައި އޮވެގެންކަމަށް ވާތީ. ދަންނަވަންތޯ! އަޅުގަނޑަކީ ހަމަ އެމްޑީޕީ މީހެއް"
ރައީސް ޞާލިހު
ރައީސް ޞާލިހު ވިދާޅުވީ ދެން އެމަނިކުފާނު ފައްޓަވާނީ ރައްޔިތުން ބޭނުންވާ ކަންކަން ހިމަނައިގެން މެނިފެސްޓޯ އެކުލަވާލުމުގެ މަސައްކަތް ކަމަށެވެ. 2023 އަށް އެމްޑީޕީއިން ހުށައަޅަނީ ރައްޔިތުން އެދޭ ކަންކަމުގެ މެނިފެސްޓޯއެއްކަމަށް ރައީސް ޞާލިހު ވިދާޅުވިއެވެ.
އެކަން ފާހަގަކުރައްވާ ރައީސް ޞާލިހު ވިދާޅުވީ އަންނަ ރިޔާސީ އިންތިޚާބު އެއްބުރުން ކާމިޔާބުކުރެވޭނެ ކަމަށެވެ. އެކަމަށްޓަކައި ގުޅިގެން މަސައްކަތް ކުރުމަށް ހުރިހާ ބޭފުޅުންނަށްވެސް ދައުވަތު އަރުވާކަމަށް އެމަނިކުފާނު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
