އިގިރޭސި ޕްރެމިއާ ލީގުގައި މިއަދު ހަވީރު ރަށުން ބޭރުގައި އެސްޓަން ވިލާ އާއި ވާދަކޮށް 4-2 ގެ ނަތީއްޖާއަކުން މޮޅުވެ، އާސެނަލް އިން ލީގު ތާވަލުގެ ކުރީގައި ތިން ޕޮއިންޓުގެ ލީޑެއްނަގައިފިއެވެ.

މެޗު ފެށިގެން ފަސްވަނަ މިނެޓުގައި އެސްޓަން ވިލާ ލީޑު ނަގައިދިނީ އިގިރޭސި ފޯވާޑް އޮލީ ވޮޓްކިންސް އެވެ. މިއީ އެޓީމުގެ ޕޮލެންޑް ޑިފެންޑަރ މެޓީ ކޭޝް ތަނަވަސްކޮށްދިން ފުރުސަތެއްގައި އޭނާ ކާމިޔާބުކުރި ލަނޑެކެވެ. ފުރަތަމަ ފާހުގައި ގިނަވަގުތު ބޯޅަގެންގުޅެ މެޗު ޑޮމިނޭޓުކުރަމުން ދިޔަ, އާސެނަލްއަށް މެޗުގެ ނަތީއްޖާ އެއްވަރުކޮށްދިނި ފުރަތަމަ ހާފުގެ 16 ވަނަ މިނެޓުގައި ބުކަޔޯ ސަކާއެވެ.

ފިލިއްޕޭ ކުޓީނިއޯ ލަނޑުޖެހުމަށް ފަހު އެޓީމުގެ ކުޅުންތެރިނއނާއި އެކު އުފާ ފާޅުކުރަނީ

ނަމަވެސް ފުރަތަމަ ހާފު ނިމުމުގެ ކުރިން އެސްޓަން ވިލާ އިން ދެވަނަ ފަހަރަށް ލީޑުނެގިއެވެ. މި ލަނޑު ފުރަތަމަ ހާފުގެ 31 ވަނަ މިނެޓުގައި ކާމިޔާބުކޮށްދިނީ ބުރެޒިލްގެ ތަޖުރިބާކާރު މިޑްފީލްޑަރ ފިލިއްޕޭ ކުޓީނިއޯ އެވެ. މިއީ އެޓީމުގެ ސްޕެނިޝް ޑިފެންޑަރ އެލެކްސް މޮރޭނޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ދެވަނަ ހާފު ފެށިގެން އާސެނަލް އިން ވަނީ އެޓީމުގެ އެޓޭކުތައް އިތުރަށް ވަރުގަދަކޮށްފައެވެ. ނަތީއްޖާއެއްގެ ގޮތުން މިހާފުގައި އެޓީމުން ވަނީ ތިން ލަނޑު ކާމިޔާބުކޮށްފައެވެ. ދެވަނަ ހާފުގެ 61 ވަނަ މިނެޓުގައި ޒިންޗެންކޯ އާސެނަލްއަށް ދެވަނަ ފަހަރަށް މެޗުގެ ނަތީއްޖާ އެއްވަރުކޮށްދިން އިރު އާސެނަލް އިން މި މެޗުގައި ފުރަތަމަ ފަހަރަށް ލީޑު ލިބުނީ ދެވަނަ ހާފުގެ އިތުރު ވަގުތުތެރޭގައި އެސްޓަން ވިލާ ކީއްޕަރު މާޓިނޭޒު އަތުން ބައިކޮޅަށް ވަން ލަނޑުންނެވެ. އަދި އެޓީމުގެ ފަހު ލަނޑު އިތުރު ވަގުތުގެ ފަހު މިނެޓުގައި ކާމިޔާބުކޮށްދިނީ ބުރެޒިލްގެ ފޯވާޑް ގެބްރިއަލް މާޓިނެލީ އެވެ.

މި މެޗުން ލިބުނު ތިން ޕޮއިންޓާއި އެކު 23 މެޗުން އެޓީމަށް ވަނީ 54 ޕޮއިންޓް ލިބިފައެވެ. ދެވަނާގައި އޮތް މެންޗެސްޓަރ ސިޓީއަށް 23 މެޗުން ލިބިފައި ވަނީ 51 ޕޮއިންޓެވެ. މި މެޗުން ބަލިވި އެސްޓަން ވިލާ މިވަގުތު އޮތީ 23 މެޗު ކުޅެގެން ލިބުނު 18 ޕޮއިންޓާއެކު ލީގު ތާވަލުގެ އެގާރަ ވަނައިގައެވެ.