އިގިރޭސި ޕްރެމިއާ ލީގުގައި މިރޭ އަމިއްލަ ދަނޑުގައި ލެސްޓާ ސިޓީ 3-0 ގެ ނަތީއްޖާއަކުން ބަލިކޮށް މެންޗެސްޓަރ ޔުނައިޓެޑުން ވާދަވެރި ސިޓީއާއި ދެމެދުގައިވާ ފަރަގު ތިން ޕޮއިންޓަށް ކުޑަކޮށްފިއެވެ.

މެންޗެސްޓަރ ޔުނައިޓެގެ ދަނޑުގައި އެޓީމު އެންމެ ފަހުން ކުޅުނު 15 މެޗުގެ ތެރެއިން 14 މެޗުން މޮޅުވެފައިވާ އިރު މިރޭގެ މެޗުގައި އެޓީމަށް ލީޑުނަގައިދިނީ މިއަހަރު ފެށުނު ފަހުން އާދަޔާ ޚިލާފު ފޯމެއްގައި ކުޅެމުން އަންނަ އިގިރޭސި ފޯވާޑް މާކަސް ރަޝްފޯޑް އެވެ. މިއީ ފުރަތަމަ ހާފުގެ 25 ވަނަ މިނެޓުގައި ބުރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ސަންޗޯ ލަނޑުޖެހުމަށް ފަހު އުފާ ފާޅުކުރަނީ

މުޅި މެޗުގައިވެސް މެންޗެސްޓަރ ޔުނައިޓެޑުގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އެޓީމުގެ ދެވަނަ ލަނޑު، ދެވަނަ ހާފުގެ 56 ވަނަ މިނެޓުގައި ބުރެޒިލްގެ މިޑްފީލްޑަރ ފުރެޑް ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ ވެސް ރަޝްފޯޑް އެވެ. މިއީ ލީގުގައި އޭނާ ކާމިޔާބުކުރި 14 ވަނަ ލަނޑެވެ. އަދި ޔުނައިޓެޑު އެންމެ ފަހުން ކުޅުނު 5 މެޗުގައި ރަޝްފޯޑް ކާމިޔާބުކުރި 6 ވަނަ ލަނޑެވެ.

ޔުނައިޓެޑުގެ ތިންވަނަ ލަނޑު ދެވަނަ ހާފުގެ 61 ވަނަ މިނެޓުގައި ކާމިޔާބުކޮށްދިނީ މި ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް އިގިރޭސި ފޯވާޑް ސަންޗޯ އެވެ. މިއީ މިރޭގެ މެޗުގައި މޮޅުކުޅުމެއްދެއްކި ޕޯޗުގަލްގެ މިޑްފިލްޑަރ ބުރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި ސަންޗޯ ކާމިޔާބުކޮށްދިން ލަނޑެކެވެ.

މިރޭގެ މެޗުން ލިބުނު ތިން ޕޮއިންޓާއި އެކު މެންޗެސްޓަރ ޔުނައިޓެޑުން ވަނީ އެޓީމު ކުޅުނު 24 މެޗުން 49 ޕޮއިންޓް ހަމަކޮށް އެއްވަނައިގައި އޮތް އާސެނަލް އާއި ފަސް ޕޮއިންޓަށް ކައިރިއަށް ޖެހިލާފައެވެ. އެއްވަނާގައި އާސެނަލް އޮތީ 23 މެޗު ކުޅެގެން 54 ޕޮއިންޓާއި އެކުގައެވެ. އަދި ދެވަނާގައި އޮތް މެންޗެސްޓަރ ސިޓީއަށް 24 މެޗުން ލިބިފައި ވަނީ 52 ޕޮއިންޓެވެ. މިރޭގެ މެޗުން ބަލިވި ލެސްޓާ ސިޓީ މިވަގުތު އޮތީ 23 މެޗުން ލިބުނު 24 ޕޮއިންޓާއި އެކު ތާވަލުގެ 14 ވަނައިގައެވެ.