ޢަރަބި ތަޢުލީމާއު ދެކޮޅު ސިޔާސަތަކާއިގެން ވެރިކަމަށް އައި ބަޔަކު ޢަރަބިއްޔާއަށް އިޚްލާސްތެރިވާނެކަމަށް ދެކުމީ މޮޔަކަމެއް ކަމަށް ޖަމިއްޔަތުއް ސަލަފްގެ ރައީސް ޝައިޚް ޢަބްދުالله ބިން މުހައްމަދް ވިދާޅުވެއްޖެއެވެ.

ޝައިޚް ޢަބްދުالله މިހެން ވިދާޅުވީ ޢަރަބިއްޔާ ސްކޫލްގެ ބެލެނިވެރިން ބާޖަމާލުއްދީން ކައިރީގައި ކުރި އިހްތިޖާޖާއި ގުޅިގެނެވެ. ޢަރަބިއްޔާގެ ބެލެނިވެރިން މިއަދު އިހްތިޖާޖު ކޮށްފައިވަނީ 18 މަސް ދުވަހުން ނިންމަން ބުނި ޢަރަބިއްޔާގެ ޢިމާރާތް އެޅުމަށް އަދި ބިންގާވެސް އެޅިފައި ނުވާތީ އެކަމާއި ގުޅިގެނެވެ.

18 މަސް ދުވަސް ތެރޭގައި ޢަރަބިއްޔާގެ ޢިމާރާތް ނިންމަން ބުނި ނަމަވެސް އަދިވެސް 2 މަސްދުވަސް ތެރޭގައި ތަޅައި ސާފުކޮށް ހުސްކުރަން ބުނި ބަޖަމާލުއްދީނުގެ ބިން ސާފުކޮށްވެސް ނުނިމެއެވެ. އެމަސައްކަތް ފެށިތާ މިހާރުވަނީ 7 މަސް ދުވަސް ވެފައެވެ.

އެކާމާއި ގުޅިގެން ޝައިޚް ޢަބްދުالله ކުރައްވާފައިވާ ޓްވީޓުގައި ވަނީ، ޢަރަބި ތަޢުލީމާ ދެކޮޅު ސިޔާސަތަކާއިގެން، ބޭރުދުނިޔެއަށް ކެމްޕޭން ވިއްކައިގެން ރާއްޖޭގެ ވެރިކަމަށް އައިސްފައިވާ ބަޔަކު، ޢަރަބިއްޔާ އަށް އިޚްލާޞްތެރިވާނެކަމަށް ދެކުމީ މޮޔަކަމެއް ކަމަށެވެ.

"ޢަރަބި ތަޢުލީމާ ދެކޮޅު ސިޔާސަތަކާއިގެން ބޭރުދުނިޔެއަށް ކެމްޕޭން ވިއްކައިގެން ރާއްޖޭގެ ވެރިކަމަށް އައިސްފައިވާ ބަޔަކުގެ ކިބައިން ، ޢަރަބިއްޔާ އަށް އިޚްލާޞްތެރިވާނެކަމަށް ދެކުމީ މޮޔަކަމެއް،  އެކަންވާރަކުން ތިކި ތަޅާނީ އެކަންވާރެއްގައި ހުރި އެއްޗަކުން" ޝެއިޚް ވިދާޅުވި އެވެ.

ޢަރަބިއްޔާ ސްކޫލް އިމާރާތުގައި ރެނދުލައި، އެތަނަކީ ކުދިންތަކެއް ކިޔެވުމަށް ދިއުމަށް އެކަށީގެން ނުވާ ތަނެއް ކަމަށް  ބުނެ މިދިޔަ އަހަރުގެ ފަހުކޮޅު އެ ސްކޫލްގެ ބެލެނިވެރިން ވަނީ އިހްތިޖާޖު ކޮށްފައެވެ. އޭރު ސްކޫލްގެ ތަނބުތަކުގައި ރެނދުލައި ފައި ހުރި ފޮޓޯތަކާއި ވީޑިއޯ ތައްވެސް މީޑިއާގައި ދައުރުވެފައިވެއެވެ.

އެ އިހުތިޖާޖުތަކާ ގުޅިގެން އެޑިއުކޭޝަން މިނިސްޓްރީން ފުރަތަމަ ނިންމީ ޢަރަބިއްޔާގެ ކުދިން ވަގުތީ ގޮތުން އިއްޒުއްދީން ސްކޫލަށް ބަދަލު ކުރާށެވެ. ނަމަވެސް އެ ސްކޫލްގެ ބެލެނިވެރިން އެ ނިންމުމާ ދެކޮޅު ހެދުމުން އާ އިމާރާތެއް އަޅަން މާލެއިން ބިމެއް ހޯދުމުގެ މަސައްކަތް ކުރާނެކަން އެޑިއުކޭޝަން މިނިސްޓްރީން ފާހަގަކުރިއެވެ.

އޭގެ ފަހުން، އަރަބިއްޔާ ސްކޫލް އިމާރާތުގެ ބަދަލުގައި އާ އިމާރާތެއް އަޅަން ނިންމެވިކަން ރައީސް އިބްރާހީމް މުޙައްމަދު ޞާލިޙު 2021 ގެ ޑިސެމްބަރު މަހުގެ ތެރޭގައި އިއުލާންކުރެއްވިއެވެ.

އެގޮތުން ސަރުކާރުން ބާ ޖަމާލުއްދީން ބިމުގައި ޖަމާލުއްދީން ސްކޫލުގެ އިތުރު އިމާރާތަކާއި

ޢަރަބިއްޔާ ސްކޫލުގެ އާ އިމާރާތް އެޅުމަށް 168 މިލިއަން ރުފިޔާއަށް އަމިން ކޮންސްޓްރަކްޝަންއާ ހަވާލުކޮށް އެއްބަސްވުމުގައި ސޮއިކޮށްފައިވެއެވެ.

އަރަބިއްޔާ ސްކޫލުގެ ދަރިވަރުން މިހާރު ވަގުތީ ގޮތުން ކިޔަވަމުން ގެންދަނީ ފޮރިން މިނިސްޓްރީ ހިންގި ސޯމިލް އިމާރާތުގައެވެ. އެ އިމާރާތުގައި ގިނަ ދުވަސްތަކެއް ހޭދަކުރަން ޖެހުމަކީ ދަރިވަރުން އަސާސީ އެތައް ހއްގުތަކުން މަހުރޫމުކޮށްގެން ތިބެން ޖެހޭ ކަމެއްކަން ފާހަގަކުރައްވާ އަރަބިއްޔާ ސުކޫލުގެ ބެލެނިވެރިން ވަނީ ބޮޑެތި ކަންބޮޑުވުންތަކެއް ފާޅުކޮށްފައެވެ.