ފުރާންސް ލީގުގައި މިއަދު ހަވީރު އަމިއްލަ ދަނޑުގައި ލިލް އާއި ވާދަކޮށް 4-3 ގެ ނަތީއްޖާއަކުން މޮލުވެ ޕީއެސްޖީ އިން ލީގުތާވަލު ކުރީގައި 7 ޕޮއިންޓްގެ ލީޑެއްނަގައިފިއެވެ.

ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔަ މި މެޗުގައި ފުރަތަމަ ލަނޑުޖަހައި ލީޑުހޯދީ ޕީއެސްޖީ އިންނެވެ. ފުރަތަމަ ހާފުގެ 11 ވަނަ މިނެޓުގައި ބުރެޒިލްގެ ފޯވާޑް ނޭމާ ތަނަވަސްކޮށްދިން ފުރުސަތެއްގައި މި ލަނޑު އެޓީމަށް ކާމިޔާބުކޮށްދިނީ އެމްބާޕޭއެވެ. އަަދި އޭގެ ހަ މިނެޓު ފަހުން ނޭމާ ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. ނަމަވެސް ފުރަތަމަ ހާފު ނިމުމުގެ ކުރިން ލިލް އިން ލަނޑެއްކާމިޔާބުކޮށް ފަރަގު ކުޑަކުރިއެވެ. މި ލަނޑު އެޓީމަށް ކާމިޔާބުކޮށްދިނީ ފްރާންސްގެ ޑިފެންޑަރ ބަފޮޑޭ ޑައިކައިޓް އެވެ.

ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއްފެނިގެންދިޔައިރު މިހާފުގައި ގިނައިރު ބޯޅަގެންގުޅެ ގިނަ ހަމަލާތައް އުފެއްދީ ލިލް އިންނެވެ. ނަމަވެސް ފުރަތަމަ ހާފުގެ ކުޅުން ނިމުނީ 2-1 ގެ ނަތީއްޖާއަކުން ޕީއެސްޖީ ކުރީގައިއޮވެގެންނެވެ.

ދެވަނަ ހާފުގައި ލިލް އިން އެޓީމުގެ ހަމަލާތައް އިތުރަށް ވަރުގަދަކުރިއެވެ. ނަތީއްޖާއެއްގެ ގޮތުން ދެވަނަ ހާފުގެ 58 ވަނަ މިނެޓުގައި އެޓީމަށް ލިބުނު ޕެނަލްޓީއަކުން އެޓީމުގެ ކެނަޑާ ފޯވާޑް ޖޮނަތަން ޑޭވިޑް ލަނޑެއް ކާމިޔާބުކޮށް މެޗުގެ ނަތީއްޖާ އެއްވަރުކުރިއެވެ. އަދި 69 ވަނަ މިނެޓުގައި ފުރާންސްގެ ފޯވާޑް ޖޮނަތަން ބަމްބާ ވަނީ ލަނޑެއް ކާމިޔާބުކޮށް މި މެޗުގައި ފުރަތަމަ ފަހަރަށް ލިލް އަށް ލީޑު ހޯދައިދީފައެވެ. މިއީ އެޓީމުގެ ޕޯޗުގަލް މިޑްފީލްޑަރ އަންދްރޭ ގޯމޭސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ޗެންޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި އަމިއްލަ ދަނޑުގައި މިދިޔަ ހަފްތާގައި ބަޔާން މިއުނިކް އަތުން ބަލިވި ޕީއެސްޖީއަށް ނަތީއްޖާ އެއްވަރުކޮށްދިނީ ސްޕެއިންގެ ޑިފެންޑަރ ޖުއާން ބާނަޓް ތަނަވަސްކޮށްދިން ފުރުސަތެއްގައި ދެވަނަ ހާފުގެ 87 ވަނަ މިނެޓުގައި އެމްބާޕޭ އެވެ. މިއީ މިސީޒަނުގައި ލީގު މެޗެއްގައި އޭނާ ކާމިޔާބުކުރި 15 ވަނަ ލަނޑެވެ. އަދި މި މެޗުން ޕީއެސްޖީ މޮޅިވި ލަނޑު 90 މިނެޓުގެ ކުޅުން ހަމަވެ އިތުރަށް ދެއްކި 7 މިނެޓުގެ ތެރެއިން ހަތަރު ވަނަ މިނެޓުގައި ކާމިޔާބުކޮށްދިނީ މެސީ އެވެ.

މިރޭގެ މެޗުން ލިބުނު ތިން ޕޮއިންޓާއި އެކު 24 މެޗުން ޕީއެސްޖީއަށް ވަނީ 57 ޕޮއިންޓް ލިބިފައެވެ. ދެވަނައިގައި އޮތް މޮނާކޯއަށް 24 މެޗުން ލިބިފައި ވަނީ 50 ޕޮއިންޓެވެ. އަދި މި މެޗުން ބަލިވި ލިލްއަށް 24 މެޗުން ލިބުނު 41 ޕޮއިންޓާއި އެކު އެޓީމު މިވަގުތު އޮތީ ލީގު ތާވަލުގެ 6 ވަނައިގައެވެ.