ސްޕެނިޝް ލަލީގާގައި ރޭ އަމިއްލަ ދަނޑުގައި ކާޑިޒް އާއި ވާދަކުރި މެޗު 2-0 ގެ ނަތީއްޖާއަކުން ކާމިޔާބުކޮށް ބާސެލޯނާއިން ލީގު ތާވަލުގެ ކުރީގައި އެޓީމުގެ ލީޑު 8 ޕޮއިންޓަށް ފުޅާކޮށްފިއެވެ.

ޔުއެފާ ޔުރޮޕާ ލީގުގެ ޕްލޭ އޮފް ފުރަތަމަ ލެގުގައި މެންޗެސްޓަރ ޔުނައިޓެޑާއި ވާދަކުރި މެޗުގައި އަނިޔާވި މިޑްފީލްޑަރ ޕެޑްރީ އާއި ނުލައި ރޭގެ މެޗު ބާސެލޯނާއިން ފެށިއިރު، މި މެޗުގައި ފުރަތަމަ ލަނޑެއްކާމިޔާބު ކުރީ ކާޑިޒް އިންނެވެ. ނަމަވެސް ފުރަތަމަ ހާފުގެ 19 ވަނަ މިނެޓުގައި ކާޑިޒްގެ ރޮޖާ މާޓީ ކާމިޔާބުކުރި ލަނޑު ރެފްރީ ނިންމީ އޮފްސައިޑް ލަނޑެއްކަމަށެވެ.

ލެވަންޑޯސްކީ ފެރާން ޓޮރޭޒް އާއިއެކު ލަނޑުޖެހުމަށް ފަހު އުފާ ފާޅުކުރަނީ

ފުރަތަމަ ހާފުގެ 21 ވަނަ މިނެޓުގައި ކާޑިޒްގެ ޕެނަލްޢީ އޭރިއާ ތެރެއިން ބާސާގެ ފޯވާޑް ފެރާން ޓޮރޭޒް ފޮނުވާލި ހަމަލާ ގޯލާ އަމާޒުނުވެ ބޭރަށްދިޔައިރު، މި މެޗުގައި ބާސާއަށް ލީޑު ނަގައިދިނީ ފުރަތަމަ ހާފުގެ 43 ވަނަ މިނެޓުގައި ސާޖީ ރޮބާޓޯ އެވެ. އަދި އޭގެ ދެ މިނެޓުފަހުން އެޓީމުގެ ލީޑު ފުޅާކޮށްދިނީ ރޮބަޓް ލެވަންޑޯސްކީ އެވެ. މިއީ މިސީޒަނުގައި ލީގު މެޗެއްގައި ލެވަންޑޯސްކީ ކާމިޔާބުކުރި 15 ވަނަ ލަނޑެވެ.

ދެވަނަ ހާފުގެ 57 ވަނަ މިނެޓުގައި ކާޑިޒްގެ ޕެނަލްޓީ އޭރިއާ ތެރެއިން ލެވަންޑޯސްކީ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ. އަދި އޭގޭ ދެ މިނެޓުފަހުން ކާޑިޒްގެ ރޮޖާ މާޓީ ލަނޑެއްކާމިޔާބުކުރި އެވެ. ނަމަވެސް ރެފްރި ނިންމީ ރޮޖާ މާޓީ ބޯޅަ ގޯލަށް ވައްދާލުމުގެ ކުރިން ފައުލްކޮށްފައިވާ ކަމަށެވެ. މި މެޗުގައި ރޮޖާ ދެ ލަނދު ކާމިޔާބުކުރި އިރު އެ ދެ ލަނޑުވެސް ރެފްރީ ލަނޑެއްގެ ގޮތުގައި ބަލައެއްނުގަތެވެ.

މި މެޗުން ލިބުނު ތިން ޕޮއިންޓާއި އެކު 22 މެޗުން ބާސެލޯނާ ވަނީ 59 ޕޮއިންޓް ހަމަކޮށްފައެވެ. ދެވަނައިގައި އޮތް ރެއާލް މެޑްރިޑަށް 22 މެޗުން ލިބިފައިވަނީ 51 ޕޮއިންޓެވެ. މި މެޗުން ބަލިވި ކާޑިޒް މިވަގުތު އޮތީ 22 މެޗުން ލިބުނު 22 ޕޮއިންޓާއި އެކު ލީގު ތާވަލުގެ 17 ވަނައިގައެވެ.