ޔުއެފާ ޗެންޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ޖަރުމަންގެ އާރްބީ ލައިޕްޒިގް އާއި އިގިރޭސިވިލާތުގެ މެންޗެސްޓަރ ސިޓީ ވަދާކުރި މެޗު 1-1 ގެ ނަތީއްޖާއަކުން އެއްވަރުވެގެން ނިމިއްޖެއެވެ.

އާރްބީ ލައިޕްޒިގް ގެ ދަނޑުގައި މިރޭ ކުޅެވުނު މެޗުގެ ފުރަތަމަ ހާފުގައި ގިނަ ވަގުތު ބޯޅަ ގެންގުޅެ މެޗު ޑޮމިނޭޓުކުރީ މެންޗެސްޓަރ ސިޓީ އިންނެވެ. މި މެޗުގައި ފުރަތަމަ ލަނޑުޖަހައި ލީޑު ހޯދީ މެންޗެސްޓަރ ސިޓީ އިންނެވެ. މި ލަނޑު ފުރަތަމަ ހާފުގެ 27 ވަނަ މިނެޓުގައި ޖަރުމަންގެ މިޑްފީލްޑަރ ގުންޑޮގަން ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ އެޓީމުގެ އަލްޖީރިއާ ފޯވާޑް ރިޔާދު މަހްރޭޒް އެވެ. މި ލަނޑާއި އެކު ފުރަތަމަ ހަފުގެ ކުޅުން ނިމިގެންދިޔައީ 1-0 ގެ ނަތީއްޖާއަކުން މެންޗެސްޓަރ ސިޓީ ކުރީގައި އޮވެގެންނެވެ.

ލައިޕްޒިގް އާއި މެންޗެސްޓަރ ސިޓީ ވާދަކުރި މެޗުގެ ތެރެއިން

ދެވަނަ ހާފުގައި އާރްބީ ލައިޕްޒިގް ވަނީ އެޓީމުގެ ކުޅުން ރަގަޅުކޮށް ސީޓީގެ ގޯލަށް ރަގަޅު ހަމަލާތަކެއް ފޮނުވާލާފައެވެ. މި މެޗުގައި އެޓީމަށް ނަތީއްޖާ އެއްވަރުކޮށްދިން ލަނޑު ދެވަނަ ހާފުގެ 70 ވަނަ މިނެޓުގައި ކާމިޔާބުކޮށްދިނީ ކްރޮއޭޝިއާގެ ޑިފެންޑަރ ޖޯސްކޯ ގްވާޑިއޯލް އެވެ. މިއީ އެޓީމުގެ ޖަރުމަން ޑިފެންޑަރ މާސެލް ހަލްސްޓެންބާގް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިހާފުގައި ދެޓީމަށް ވެސް ލަނޑުޖަހާނެ ރަގަޅު ހުސް ފުރުސަތުތަކެއް ލިބުނު ނަމަވެސް ދެ ޓީމުން ކުރެ ޓީމަށް ވަނީ އިތުރު ލަނޑެއް ކާމިޔާބުކުރެވޭ ގޮތް ނުވެފައެވެ. މިއާއެކު މެޗުގެ ކުޅުން ނިމިގެން ދިޔައީ 1-1 ގެ ނަތީއްޖާއަކުން ދެޓީމު އެއްވަރުވެގެންނެވެ.

ދެވަނަ ލެގުގައި މި ދެޓީމު ވަދަކުރާ މެޗު މާރިޗު މަހުގެ 14 ވަނަ ދުވަހު ކުޅުމަށް ހަމަޖެހިފައިވަނީ މެންޗެސްޓަރ ސިޓީ ދަނޑުގައެވެ.