ވޭތުވެދިޔަ 5 އަހަރަކީ ރާއްޖެއަށް އައި އެންމެ ނާމާން އަދި ބިރުވެރި 5 އަހަރު ކަމަށް ދީނީ ޢިލްމުވެރިޔާ ޝެއިޚް އަބްދުالله ސައުދާން ވިދާޅުވެއްޖެ އެވެ. 

ރާއްޖޭގެ ދީނީ ޕާޓީއެއްގެ ނަމުގައި މަސައްކަތް ކުރަމުންދާ ޢަދާލަތު ޕާޓީން، ކުރިއަށް އޮތް ރިޔާސީ އިންތިހާބުގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ޞާލިހަށް ތާއީދު ކުރަން ނިންމުމާއި ގުޅިގެން ޝެއިޚް ސައުދާން ކުރެއްވި ޓްވީޓެއްގައި ވިދާޅުވީ، ވޭތުވެދިޔަ 5 އަހަރަކީ ރާއްޖެއަށް އައި އެންމެ ނާމާން އަދި ބިރުވެރި 5 އަހަރު ކަމަށެވެ. 

"ދީނީ މިނިވަންކަމާއި ދުނިޔަވީ މަންފާތައް ހޯދައި ދިނުމުގައި ތަނެއް ދޮރެއް ބަލައި ނުލައި، ވެރިންގެ ޖީބު ބަރުކުރުމުގައި އަވަދިނެތި އުޅެމުން މިދަނީ." މިސަރުކާރުން ވެރިކަން ކުރަމުންދާ ގޮތް ސިފަ ކުރައްވައި ޝެއިޚް ސައުދާން ވިދާޅުވި އެވެ. 

ޝެއިޚް ސައުދާން ވިދާޅުވީ އެފަދަ ބަޔަކަށް ނޫނެކޭ ބުނުމަކީ ކޮންމެ ދިވެއްސަކުވެސް ކުރަންޖެހޭ ކަމެއް ކަމަށެވެ.

މިއަހަރުގެ ސެޕްޓެމްބަރ މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ޢަދާލަތު ޕާޓީ އިން ރައީސް އިބްރާހިމް މުޙައްމަދް ޞާލިޙަށް ތާއީދު ކުރަން ނިންމާފައިވާއިރު، އެފަދައިން އެ ޕާޓީން ނިންމީ، އިންތިޚާބުގައި ވާދަކުރުމަށް ހުށަހަޅާ މެނިފެސްޓޯ އެކުލަވާލުމުގައި އިސްލާމީ އުސޫލުތަކާއި ހަމަތަކުގެ އިތުރުން ދެފުށްފެންނަ ފުރިހަމަ ލާމަރުކަޒީ އުސޫލުތަކަށާއި އާއިލާތަކުގެ ދުޅަހެޔޮކަމާއި އިޖުތިމާއީ ޢަދާލަތު ޤާއިމުކުރުމަށް އިސްކަން ދިނުމަށާއި، މެނިފެސްޓޯ އެކުލަވާލުމުގައި ޢަދާލަތު ޕާޓީގެ ބައިވެރިވުން ފުރިހަމަޔަށް ހޯދުމަށް ރައީސް ޞާލިހު އާއި އެކު އެއްބަސްވެފައިވާތީ ކަމަށެވެ. 

އަދި އެ މަސްލަޙަތު ޙިމާޔަތްކުރުމަށްޓަކައި އެންމެ ފަހިކޮށް ޢަދާލަތު ޕާޓީ އަށް މަސައްކަތްކުރެވެން އޮތީވެސް 2023 ވަނަ އަހަރުގެ ރިޔާސީ އިންތިޚާބުގައި އެމް.ޑީ.ޕީގެ ރިޔާސީ ކެނޑިޑޭޓު، ރައީސުލްޖުމްހޫރިއްޔާ އަލްފާޟިލް އިބްރާހީމް މުހައްމަދު ޞާލިޙު އިންތިޚާބު ކޮށްގެން ކަމަށް އެ ޕާޓީން ބުނެފައިވެއެވެ.

އަދާލަތު ޕާޓީން މިފަދައިން ހާމަކޮށްފައި ވާއިރު، އެޕާޓީގެ ރައީސް އިމްރާން ހޯމް މިނިސްޓަރު ކަމުގެ މަގާމުގައި ހުރެމެ، ރާއްޖޭގައި ހަށި ވިއްކުމާއި އެއްޖިންސުން ގުޅުން ހިންގުން ފަދަ ނުބައި ފާހިޝް އަމަލުތައް އާއްމުވެ ފާޅުގައި ކުރަމުންދާއިރު، އެފަދަ ކަންކަން ނުހުއްޓޭތީ ގިނަ ބަޔަކު އަންނަނީ އެ ޕާޓީން ކޯލިޝަން ހަދަން ނިންމާފައިވަނީ މަގާމުގެ ދަހިވެތި ކަމުގައި ކަމަށް ތުހުމަތު ކުރަމުންނެވެ.