ޔުއެފާ ޔުރޮޕާ ލީގުގެ ޕްލޭ އޮފް ދެވަނަ ލެގުގައި ބާސެލޯނާއިން ފުރަތަމަ ހާފުގައި ލަނޑެއް ކާމިޔާބުކޮށް ލީޑު ހޯދާފައި ވަނިކޮށް ފަހަތުން އަރާ ދެ ލަނޑު ކާމިޔާބުކޮށް މުބާރާތުގެ ދެވަނަ ބުރުން މެންޗެސްޓަރ ޔުނައިޓެޑް ޖާގަހޯދައިފިއެވެ.

މެންޗެސްޓަރ ޔުނައިޓެޑްގެ ދަނޑުގައި ރޭ ކުޅެވުނު މެޗު އެޓީމުން ކާމިޔާބުކުރި އިރު، ޕްލޭ އޮފްގެ ފުރަތަމަ ލެގުގައި ބާސެލޯނާގެ ދަނޑުގައި މި ދެޓީމު ވާދަކުރި މެޗު ނިމުނީ 2-2 ގެ ނަތިއްޖާއަކުން ދެ ޓީމު އެއްވަރުވެގެންނެވެ. މިއާއެކު މުބާރާތުގެ ދެވަނަ ބުރުގެ ފުރުސަތު މެންޗެސްޓަރ ޔުނައިޓެޑަށް ލިބުނީ 4-3 ގެ އެގްރިގޭޓުންނެވެ.

ރޭގެ މެޗުގައި އަނިޔާގެ ސަބަބުން ބާސެލޯނާގެ މުހިންމު ދެ ކުޅުންތެރިން ކަމަށްވާ ޕެޑްރީ އާއި ޑެންބެލޭ ޓީމުގައި ނުހިމެނޭއި އިރު ޒުވާން މިޑްފީލްޑަރ ގާވީ ސަސްޕެންޑްޝަނުގެ ސަބަބުން ޓީމުގައި ނުހިމެނެއެވެ. ފުރަތަމަ ހާފުގައި ބާސެލޯނާއިން ގިނައިރު ބޯޅަ ގެންގުޅެ މެޗު ޑޮމިނޭޓުކުރި ބާސެލޯނާ އިންނެވެ.

މެޗު ފެށިގެން ވަރަށް ކުރީކޮޅު ބާސެލޯނާގެ ޕެނަލްޓީ އޭރިއާ ތެރެއިން މެންޗެސްޓަރ ޔުނައިޓެޑުގެ ޕޯޗުގަލް މިޑްފީލްޑަރ ބުރޫނޯ ފެނާންޑޭޒް އަށް ލިބުނު ހުސް ފުރުސަތެއްގައި އޭނާ ފޮނުވާލި ހަމަލާ ބާސެލޯނާގެ ކީއްޕަރު ސްޓެގަން ވަނީ ހުޝިއާރުކަމާއެކު ދިފާއުކޮށްފައެވެ. އަދި ފުރަތަމަ ހާފުގެ 16 ވަނަ މިނެޓުގައި މެންޗެސްޓަރ ޔުނައިޓެޑުގެ ޕެނަލްޓީ އޭރިއާ ތެރެއިން ބާސެލޯނާގެ ކުޅުންތެރިއަކަށް ފެނާންޑޭޒް ކުރި ފައުލަކާއި ގުޅިގެން ރެފްރީ ވަނީ ބާސެލޯނާއަށް ޕެނަލްޓީއެއް ދީފައެވެ.

ބާސެލޯނާއަަށް ލިބުނު ޕެނަލްޓީ ގޯލްގެ ތެރެއަށް ފޮނުވާލައިގެން އެޓީމަށް ލީޑު ހޯދައިދިނީ ލެވަންޑޮސްކީ އެވެ. މި ލަނޑާއި އެކު ފުރަތަމަ ހާފުގެ ކުޅުން ނިމިގެން ދިޔައީ 1-0 ގެ ނަތީއްޖާއަކުން ބާސެލޯނާ ކުރީގައި އޮވެގެންނެވެ.

ދެވަނަ ހާފު ފެށިގެ ފުރަތަމަ މިނެޓުގައި މެންޗެސްޓަރ ޔުނައިޓެޑުން ލަނޑެއް ކާމިޔާބުކޮށް މެޗުގެ ނަތީއްޖާ އެއްވަރު ކުރިއެވެ. މި ލަނޑު އެޓީމަށް ކާމިޔާބުކޮށްދިނީ ބުރެޒިލްގެ މިޑްފީލްޑަރ ފްރެޑް އެވެ. މިއީ ބްރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މެންޗެސްޓަރ ޔުނައިޓެޑު މި މެޗުން މޮޅުވި ލަނޑު ދެވަނަ ހާފުގެ 73 ވަނަ މިނެޓުގައި ކާމިޔާބުކޮށްދިނީ ބްރެޒިލްގެ ފޯވާޑް އެންޓޮނީ އެވެ.

ދެވަނަ ހާފުގައި މެންޗެސްޓަރ ޔުނައިޓެޑުގެ އެޓޭކުތައް މާބޮޑަށް ވެސް ވަރުގަދަކޮށް ފެނުނުއިރު މިހާފުގައި ބާސެލޯނާ ޓީމުން އެންމެ ރަގަޅު ފުރުސަތެއް ލިބުނީ ޑިފެންޑަރ ކުންޑޭ އަށެވެ. ނަމަވެސް އޭނާ ބޮލުން ފޮނުވާލި ހަމަލާ ޔުނައިޓެޑުގެ ކީއްޕަރު ވަނީ ދިފާއުކޮށްފައެވެ.

2015 ވަނަ އަހަރުގެ ޗެންޕިއަންސް ލީގު ކާމިޔާބުކުރި ފަހުން ޔޫރަޕުގައި ބާސެލޯނާއަށް ކާމިޔާބު ހޯދިފައިނުވާއިރު، ފާއިތުވެދިޔަ ދެ އަހަރު އެޓީމު ކަޓައިގެން ދިޔައީ ޗެންޕިިއަންސް ލީގުގެ ގުރޫޕް ސްޓޭޖުންނެވެ. މީގެ އިތުރުން ޔޫރަޕްގެ ދެ ވަނަދަރަޖައިގެ މުބާރާތް ކަމަށްވާ ޔުއެފާ ޔުރޮޕާ ލީގުގައިވެސް އެޓީމަށް ދިމާވީ ނާކާމިޔާބީ އެއެވެ. މިދިޔަ އަހަރު ޔުރޮޕާ ލީގުގެ ކުއާޓާ ފައިނަލުން ކަޓައިގެން ދިޔައިރު މި އަހަރު މުބާރާތުގެ ދެވަނަ ބުރުން ވެސް އެޓީމަށް ފުރުސަތެއް ނުލިބުނެވެ.

ޔޫރަޕްގައި ކާމިޔާބު ނުހޯދުނަސް ސްޕެނިޝް ލީގުގައި ބާސެލޯނާއި އަންނަނީ ރަގަޅު ކުޅުމެއް ދައްކަމުންނެވެ. ސްޕެނިޝް ލަލީގާ ތާވަލުގެ އެއްވަނައިގައި އެޓީމު މިވަގުތު އޮތީ ވާދަވެރި ރެއާލް މެޑްރިޑަށްވުރެ 8 ޕޮއިންޓް ކުރީގައެވެ. އަދި ސްޕެނިޝް ސުޕަކަޕް ފައިނަލުގައި ރެއާލް މެޑްރިޑް ބަލިކޮށް އެޓީމުން ޗެންޕިއަންކަން ހޯދާފައި ވާއިރު، މާރިޗު މަހުގެ 03 ދުވަހު ކޮޕާ ޑެލް ރޭ ސެމީ ފައިނަލްގެ ފުރަތަމަ ލެގުގައި ރެއާލް މެޑްރިޑާއި ދެކޮޅަށް އެޓީމު ނުކުންނާނެއެވެ.