ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ސަރުކާރު ކޯލިޝަންވެސް އެގޮތުގައި ހިފަހައްޓާ ނުލެވުނުކަމަށް މަޖިލީހުގެ އުނގުފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެ އެވެ. 

ވަހީދު މިފަދައިން ވިދާޅުވެފައިވަނީ ކުރިއަށް އޮތް ރިޔާސީ އިންތިޚާބަށް ޖުމްހޫރީ ޕާޓީން ވަކި ކެންޑިޑޭޓެއް ނެރެގެން، ނުވަތަ އެ ޕާޓީ އިސްވެ އޮވެ ހިންގާ ކޯލިޝަނަކާއެކު ވާދަކުރަން ޕާޓީގެ ގައުމީ ކޮންފަރެންސްގެ އިއްތިފާގުން ފާސްކުރުމާއި ގުޅިގެން ކުރެއްވި ޓްވީޓެއްގަ އެވެ. 

ވަހީދު ވިދާޅުވީ އެމްޑީޕީގެ ރިޔާސީ ޕްރައިމަރީގައި ރައީސް ޞާލިހު އެންމެ ގަދައަށް ދެއްކެވި އެއްވާހަކައަކީ ވެރިކަން ހޯދުމަށް ކޯލިޝަން ހެދުމުގެ މުހިންމުކަމުގެ ވާހަކަ ކަމަށެވެ. އަދި އެމްޑީޕީއާއެކު އެހެން ސިޔާސީ ޕާޓީތަކުން ކޯލިޝަން ހަދާނީ އެމަނިކުފާނު ހުންނަވައިގެން ކަމަށެވެ. 

އެހެން ނަމަވެސް މިހާރު ސަރުކާރަށް ވާގިވެރިވާ އެންމެ ބޮޑު ޕާޓީން އެމްޑީޕީއާއެކު ކޯލިޝަން ހަދައިގެން ވެރިކަން ނިކުތުމުގެ ބަދަލުގައި އެ ޕާޓީން އަމިއްލައަށް ނިކުތުމަށް ނިންމުމުން، ރައީސް ޞާލިހަށް ކޯލިޝަންވެސް ހިފަހައްޓާ ނުލެވުނުކަން ޔަގީންވާކަމަށް ވަހީދު ވިދާޅުވިއެވެ. 

އެއާއެކު ވަހީދު ވިދާޅުވީ ރައީސް ޞާލިހަށް ކޯލިޝަން ނުހިފެހެއްޓުނު ތާގައި، އެމްޑީޕީވެސް އެކަތިގަނޑެއްގެ ގޮތުގައި ހިފަހައްޓާ ނުލެވުނު ކަމަށެވެ. 

ރައީސް ޞާލިހުގެ މަންދޫބުން ޤާސިމާއި ބައްދަލުކުރައްވަނީ 

ވަހީދު އިތުރަށް ވިދާޅުވީ އެ ހުރިހާކަމަށް ބަލާއިރު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަކީ އެމްޑީޕީ 2023 ވަނަ އަހަރުގެ ރިޔާސީ އިންތިޚާބު ކާމިޔާބުކުރަން ބޭނުން ނަމަ "ޗޮއިސްއެއް" ނޫން ކަމަށެވެ. 

އެމްޑީޕީގެ ރިޔާސީ ޕްރައިމަރީ ރައީސް ޞާލިހު ކާމިޔާބު ކުރިނަމަވެސް ޞާލިހުގެ ފަހަތްޕުޅަށް އަރާވަޑައި ނުގަންނަވާނެކަމަށް ނަޝީދާއި އޭނާއަށް ތާއީދުކުރައްވާ މެމްބަރުން ގެންދަވަނީ ވިދާޅުވަމުން ނެވެ. 

އަދި އެމްޑީޕީގެ ރިޔާސީ ޕްރައިމަރީ ބާތިލްކޮށް އަލުން އެ އިންތިޚާބު ބޭއްވުމަށް ނަޝީދުގެ ފަރާތްޕުޅުން ވަނީ ސިވިލް ކޯޓަށް މައްސަލައެއް ހުށައަޅުއްވާފަ އެވެ.

އެ މައްސަލަ ކޯޓުން ބަލައިގެންފައިވާއިރު ކޯޓުން ނިންމާ ގޮތެއްގެ މައްޗަށް އެމްޑީޕީގެ ރިޔާސީ ކެންޑިޑޭޓު ބަދަލުވެގެން ދިއުމަކީވެސް އެކަށީގެންވާ ކަމެކެވެ.