ކުރީގެ ރައީސް އަބްދުالله ޔާމީންގެ މައްޗަށް 3،413،230 ޑޮލަރު (53 މިލިއަން ރުފިޔާ) ހަ މަސް ދުވަހުގެ ތެރޭގައި ދައްކަން ކްރިމިނަލް ކޯޓުން މިއަދު އަމުރުކޮށްފި އެވެ.

މި 52 މިލިއަން ރުފިޔާއަކީ ވ.އާރަށް މައްސަލައިގައި ކުރި ދައުލަތުން ރައީސް ޔާމީނުގެ މައްޗަށް ކުރި ދެ ދައުވާ ކަމުގައިވާ މަނީ ލޯންޑްރިންގ އާއި ރިޝްވަތު ގަބޫލު ކުރުމުގެ ދައުވާ، އެމަނިކުފާނުގެ މައްޗަށް ސާބިތު ވުމާއި ގުޅިގެން ދައުލަތަށް ނަގައި ދިނުމަށް އެދުނު ފައިސާ އެވެ.

ނަމަވެސް މިދިޔަ ޑިސެމްބަރ މަހު ހުކުމް ކުރި އިރު ފައިސާ އާއި ގުޅޭ ގޮތުން ކްރިމިނަލް ކޯޓުގެ ހުކުމުގައި އެއްވެސް ވާހަކައެއް ނެތްކަން ފާހަގަ ކޮށް، ހުކުމުގެ އެބައި އިސްތިއުނާފު ކުރުމާއިމެދު ވިސްނަމުންދާ ކަމަށް ޕީޖީ އޮފީހުން ވެސް ވަނީ ބުނެފައެވެ.

އަދި ރައީސް ޔާމީންގެ މައްޗަށް ކްރިމިނަލް ކޯޓުން ހުކުމް ކުރިތާ ދެމަސްވެ، އެ މައްސަލަ ހައިކޯޓުގައި އިސްތިއުނާފްވެސް ކޮށްފައިވަނިކޮށް، ދައުލަތަށް ފައިސާ ދެއްކުމަށް ކްރިމިނަލް ކޯޓުން ކުރި އަމުރާއި ގުޅިގެން ރައީސް ޔާމީންގެ ވަކީލުން ވަކި އެއްޗެއް އަދި ހާމަކުރައްވައެވެ.  

ޔާމީންގެ މައްޗަށް ކްރިމިނަލް ކޯޓުން ކޮށްފައިވާ 11 އަހަރުގެ ޖަލު ހުކުމް އިސްތިއުނާފް ކުރުމަށް މިހާރު ހައި ކޯޓަށް ހުށަހަޅައިފައިވާއިރު، އެމަނިކުފާނުގެ ވަކީލުން ވިދާޅުވަނީ ޔާމީން ޖަލަށް ލުމަށް ކުރި ހުކުމް ހައި ކޯޓުން ބާތިލްކުރާނެ ކަމުގެ ޔަގީންކަން ބޮޑު ކަމަށާއި ކުރިއަށް އޮތް ރިޔާސީ އިންތިހާބުން ފުރުސަތު ލިބޭހާ ވަގުތު އޮއްވައި ޔާމީން މިނިވަންވާނެ ކަމަށެވެ.