ހިޔާފްލެޓް ތަކަށް ފޯރުކޮށްދެމުންދާ ޚިދްމަތް ރަނގަޅުކުރުމަށް ދެނެގަންނަން ޖެހޭ ކަންކަން ދެނެގަތުމަށް ސާވޭ އެއް ކުރުމަށް ހަމަޖެހިފައިވާ ކަމަށް އެޗްޑީސީ އިން ވިދާޅުވެއްޖެއެވެ.
މިކަން ހާމަކޮށް އެޗްޑީސީ އިން ނެރުއްވާފައިވާ އިއްލާނުގައި ވަނީ ހިޔާފްލެޓް ތަކުގައި ދިރިއުޅޭ ރައްޔިތުންނަށް ފޯރުކޮށްދޭ ހިދުމަތްތައް އިތުރަށް ތަރައްޤީކޮށް ފެންވަރު ރަނގަޅު ކުރުމަށްޓަކައި ހިޔފްލެޓްތަކުގައި އުޅޭ ރައްޔިތުންގެ ހިޔާލު ހޯދުމަށް ސާވޭ އެއް ކުރުމަށް ހަމަޖެހިފައި ވާކަމަށެވެ.
އަދި މިސާވޭ ކުރިއަށްދާނީ 27 ފެބްރުއަރީ އިން ފެށިގެން މާރޗް މަހުގެ 6 ވަނަ ދުވަހާއި ހަމައަށް ކަމަށް ވެސް އެޗްޑީސީ އިން ހާމަކޮށްފައިވެއެވެ. ސާވޭ އަށް މައުލޫމާތު އެއްކުރާނީ އެޕާޓްމެންޓް ތަކަށް ޒިޔާރަތް ކޮށް އޮންލައިން ފޯމެއް ފުރައިގެން ކަމަށް ވެސް އެކުންފުނިން ހާމަކޮށްފައިވެއެވެ.
އެޗްޑީސީ އިން ވިދާޅުވެފައިވަނީ މި ސާވޭގައި އާމްދަނީ، ޚަރަދު، ކޭޝް ކާޑު އަދި ބޭންކް އެކައުންޓް ފަދަ އެއްވެސް ކަމަކާއި ގުޅޭ މައުލޫމާތެއް ނުނަގާނެ ކަމަށެވެ. ސާވޭ އަށް ބޭނުންވާ އިތުރު މައުލޫމާތެއް ވާނަމަ އެ މައުލޫމާތެއް ސާފު ކުރަން ގުޅާނީ އެކުންފުނީގެ ރަސްމީ ނަންބަރަކުން ކަންވެސް އެ ކުންފުނިން ފާހަގަ ކޮށްފައިވެއެވެ.
އެޗްޑީސީ އިން ވިދާޅުވީ ސާވޭ ގެ މަސައްކަތުގައި އުޅޭ މުވައްޒަފުން ތިބޭނީ އެކުންފުނީގެ މުވައްޒަފުންކަން އެނގޭނެ ގޮތައް ކާޑު އަޅައިގެން ކަމަށާއި އެއްވެސް ސުވާލެއް ނުވަތަ މައްސަލައެއް އުޅޭނަމަ އެކުންފުނީގެ ކޯލްސެންޓަރ 1516 އަށް ގުޅުއްވައި ހިއްސާ ކުރެއްވުމަށް ވިދާޅުވެފައިވެއެވެ. އަދި މި ސާވޭ ކުރިއަށް ގެންދިޔުމަށް އެންމެހާ ފަރާތްތަކުން އެއްބާރުލުން ދެއްވުމަށްވެސް އެދިފައިވެއެވެ.
Advertisement
This content is created and paid for by advertisers and does not involve Voice Journalists
