އިނގިރޭސި ލީގު ކަޕްގެ ފައިނަލްގައި މިރޭ ނިއުކާސަލް ޔުނައިޓެޑް އަތުން މޮޅުވެ ފަސް އަހަރު ތެރޭގައި ފުރަތަަމަ ފަހަރަށް ޔުނައިޓެޑުން ތައްޓެއް ކާމިޔާބުކޮށްފިއެވެ.

މިރޭ ކުޅެވުނު ފައިނަލް މެޗު މެންޗެސްޓާ ޔުނައިޓެޑް އިން ކާމިޔާބުކުރީ 2-0 ގެ ނަތީޖާއަކުންނެވެ.

ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ ނިއުކާސަލް ޔުނައިޓެޑް އިންނެވެ. ނަމަވެސް މިހާފުގައި ލަނޑުޖަހާނެ ރަގަޅު ހަމަލާތައް އުފެއްދީ މެންޗެސްޓާ ޔުނައިޓެޑުންނެވެ.

މިރޭގެ މެޗުގެ ފުރަތަަމަ ލަނޑު ފުރަތަަމަ ހާފުގެ 33 ވަނަ މިނެޓުގައި ޔުނައިޓެޑަށް ކާމިޔާބުކޮށްދިނީ ބްރެޒިލްގެ މިޑްފީލްޑަރު ކަސަމީރޯ އެވެ. މިއީ އެޓީމުގެ އިގިރޭސި ޑިފެންޑަރު ލޫކް ޝޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގައި ޔުނައިޓެޑް އިން ކާމިޔާބުކުރި ދެވަނަ ލަނޑަކީ ފުރަތަަމަ ހާފުގެ 39 ވަނަ މިނެޓުގައި ނިއުކާސަލްގެ ޑިފެންޑަރު ބޮޓްމެން އަތުން ބައިކޮޅަށް ވަން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން މެންޗެސްޓާ ޔުނައިޓެޑް ކުރީގައި އޮވެގެންނެވެ.

ދެވަނަ ހާފުގައި ޔުނައިޓެޑްގެ ލީޑު ފުޅާކޮށްދިނުމަށް އެޓީމުގެ ރަޝްފޯޑް އަދި ބުރޫނޯ ފެނާންޑޭޒަށް ވަނީ ރަގަޅު ފުރުސަތުތަކެއްލިބި ބޭނުން ކުރެވޭގޮތް ނުވެފައެވެ.