ސްޕެނިޝް ލަލީގާގައި މިރޭ ރަށުން ބޭރުގައި އަލްމޭރިއާ އަތުން ބާސެލޯނާ ބަލިވެއްޖެ އެވެ. އަލްމޭރިއާގެ ދަނޑުގައި ކުޅުނު މި މެޗު އެޓީމުން ކާމިޔާބުކޮށްފައިވަނީ 1-0 ގެ ނަތީއްޖާއަކުންނެވެ.

އެންމެ ފަހުން ކުޅުނު މެޗުގައި މެންޗެސްޓަރ ޔުނައިޓެޑް އަތުން ބަލިވެ ޔުއެފާ ޔޫރޮޕާ ލީގުގެ ޕްލޭއޮފް ބުރުން ކެޓުމުން، ސަޕޯޓަރުންގެ ފާޑުކިޔުން އަމާޒުވެފައި ވަނިކޮށް މިރޭގެ މެޗުން ބަލިވުމުން ބާސެލޯނާގެ ކޯޗު ޒަވީއަށް ވަނީ އިތުރު ޕްރެޝަރަކާއި ކުރިމަތިލާން ޖެހިފައިވެ.

މިރޭގެ މެޗުގައި ފެނިގެންދިޔަ ހަމައެކަނި ލަނޑު ފުރަތަަމަ ހާފުގެ 24 ވަނަ މިނެޓުގައި ކާމިޔާބުކޮށްދިނީ އަލްމޭރިއާގެ މާލީ ފޯވާޑް އެލް ބިލާލް ޓޯރޭ އެވެ. މިއީ އެޓީމުގެ ކޮލަންބިއާ ފޯވާޑް ލުއިސް ސުއަރޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފުގައި ބާސެލޯނާގެ ފަރާތުން ވަރަށް އާދައިގެ ކުޅުމެއް ފެނިގެންދިޔައިރު، ދެވަނަ ހާފުގައި ވެސް އެޓީމަށް މި މެޗުގައި އެކަށީގެންވާ ކުޅުމެއް ދެއްކޭގޮތް ނުވިއެވެ.

މިރޭގެ މެޗުން މޮޅުވެ ލީގު ތާވަލުގެ ކުރީގައި 11 ޕޮއިންޓްގެ ލީޑެއް ނެގުމުގެ ފުރުސަތު ބާސެލޯނާ އަށް އޮތެވެ. ނަމަވެސް ރެލިގޭޝަނުން ސަލާމަތް ވުމަށް މަސައްކަތް ކުރަމުން އަންނަ އަލްމޭރިއާ އަތުން ބަލިވެ އެޓީމުގެ ލީޑު ވަނީ 7 ޕޮއިންޓަށް ހަނިވެފައެވެ.

ލީގުގައި ކުޅުނު 23 މެޗުން ބާސެލޯނާއަށް 59 ޕޮއިންޓު ލިބިފައިވާއިރު ދެވަނައިގައި އޮތް ރެއާލް މެޑްރިޑަށް 23 މެޗުން ލިބިފައިވަނީ 52 ޕޮއިންޓެވެ. އަދި މިރޭގެ މެޗުން މޮޅުވި އަލްމޭރިއާ އަށް 23 މެޗުން ލިބުނު 25 ޕޮއިންޓާއެކު އެޓީމު ވަނީ ތާވަލުގެ 15 ވަނައަށް ކުރިއަށް ޖެހިލައިފައެވެ.

ބާސެލޯނާ ދެން އެންމެ އަވަހަށް ކުޅޭ މެޗުގައި އަންނަ ބުރާސްފަތި ދުވަހުގެ ރޭ ނުކުންނާނީ ކޮޕާ ޑެލްރޭ ސެމީ ފައިނަލުގެ ފުރަތަަމަ ލެގުގައި ވާދަވެރި ރެއާލް މެޑްރިޑާއި ދެކޮޅަށެވެ.