2015 ވަނަ އަހަރުގެ މާޗް މަހުގެ 21 ވަނަ ދުވަހު ރޭ ހިންގި މާރާމާރީއެއްގައި ލ. މުންޑޫ ނޫވިލު، އަލީ ޒިޔަދަމް މަރާލި މައްސަލައިގައި މަރާލި މައްސަލާގައި އޭނާގެ ގާތިލު ލ.މުންޑޫ މުހައްމަދު ޝަނޫން މަރަން ކްރިމިނަލް ކޯޓުން ހުކުމް ކޮށްފިއެވެ. 

ޒިޔަދަމުގެ މަރާ ގުޅިގެން ދައުވާކުރަނީ ޝަނޫންގެ އިތުރުން ލ. މުންޑޫ/ ބީޗުވިލާ، އަލީ ޝިފާމް (29އ) އަށެވެ.

ޝަނޫނާއި ޝިފާމަށްވެސް ކުރަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާއެވެ. މީގެ އިތުރުން ޝަނޫންގެ މައްޗަށް ބިރު ދެއްކުމާއި މާރާމާރީ ހިންގުމުގެ ދައުވާވެސް ވަނީ އުފުލާފައެވެ.

ޒިޔަދަމްގެ ބޮލަށާއި ބުރިކަށީގެ އިތުރުން ފައިގެ ފަލަމަސްގަނޑަށް ތޫނު އެއްޗަކުން ހަމަލާދީފައިވާ އިރު، އޭނާ މުންޑޫ ހެލްތު ސެންޓަރަށް ގެންދިޔައިރުވެސް މަރުވެފައިވާ ކަމަށް އޭރު ފުލުހުން ވަނީ ބުނެފައެވެ.

މި މައްސަލައިގައި ހުކުމް ކުރުމުގެ ކުރިން ބާއްވާ އެންމެ ފަހު އަޑުއެހުން މިދިޔަ ނޮވެމްބަރު މަހުގައި ބާއްވާފައިވާއިރު، އެ އަޑުއެހުމުގައި ވަނީ ހުކުމުގެ ކުރިން ގާޒީ ސާފުކުރައްވަން ބޭނުންވާ ކަންކަންވެސް ސާފުކުރައްވާފަ އެވެ. އެ ދުވަހުގެ އަޑުއެހުން ގާޒީ ނިންމަވާލެއްވީ، ސާފުކުރައްވަން ބޭނުންފުޅުވި ކަންކަމަށް މިމަހުގެ ހަތަރު ވަނަ ދުވަހުގެ ކުރިން ލިޔުމުން ޖަވާބުދާރީވުމަށް އަންގަވައިފައެވެ.

އެއަށްފަހު، މިމައްސަލައިގެ މިދިޔަ ޑިސެމްބަރު މަހު ބޭއްވި އަޑުއެހުމުގައި މައްސަލަ ބައްލަވާ ޤާޞީ އިސްމާއިލް ޝަފީއު ވިދާޅުވީ ދައުލަތުން ހުށަހެޅި ކިތާބީ ހެކިތަކުންނާއި، ޝަފައީ ހެކިތަކުން ޝަނޫނުގެ މައްޗަށް ގަސްތުގައި މީހަކު މަރާލުމުގެ ކުށް ސާބިތުވާކަމަށް ވަނީ ހުކުމް ކޮށްފައެވެ. އަދި މިމައްސަލާގައި ސިފްހާމްގެ މައްޗަށް މީހަކު މަރާލުމުގައި ބައިވެރިވުމުގެ ކުށް ވަނީ ސާބިތުވެފައެވެ.

މި އަޑުއެހުމަށްފަހު މި މައްސަލާގައި ވާރިސުންގެ ބަސްނެގުމުގެ އަޑުއެހުން މިމަހު 19 ވަނަ ދުވަހު ކްރިމިނަލް ކޯޓް ގައި ވަނީ ބާއްވާފައެވެ.

ޒިޔަދަމްގެ ވާރިސުންގެ ތެރޭގައި އޭނާގެ ބައްޕައާއި އެއްބަނޑު އެއްބަފާ އަންހެން ފަސްކުދިންނާއި ފިރިހެން ކުއްޖެއް، އަދި އެއްބަފާ ދެ ކުދިންވެސް ހިމެނެއެވެ. މީގެ ތެރެއިން އަޑު އެހުމަށް ހާޒިރުވި ހުރިހާ ވާރިސުންވެސް ވަނީ މަރަށް މަރު ހިފަން ބޭނުންވާ ކަމަށްް ބުނެފައެވެ. މިއާއިއެކު ޒިޔަދަމް މަރުވި އިރު ދުނިޔޭގައި ހުރި އޭނާގެ މަންމަ ވެސް ވަނީ ފުލުހުންގެ ތަހުގީގަށް ދިން ބަޔާނުަގައި މަރަށް މަރު ހިފަަން ބޭނުންވާ ކަމަށް ބުނެފައެވެ.

މި މައްސަލާގެ ހުކުމް ކުރުން މިއަދު އޮތް އިރު، ޝަނޫންގެ މައްޗަށް ޒިޔަދަމް މަރާލުމުގެ ކުށް ވަނީ ސާބިތުވުމާއި ގުޅިގެން އޭނާ މަރަން ހުކުމް ކޮށްފައިވާއިރު، ސިފާމްގެ މައްޗަށް ޒިޔަދަމް މަރާލުމުގައި ބައިވެރިވުމުގެ ކުށް ސާބިތުވުމާއި ގުޅިގެން އޭނާ އުމުރަށް ޖަލަށް ލާން ވަނީ ހުކުމް ކޮށްފައެވެ.