ސައިބާ ސްކޭމްތަކުގެ ތެރެއިން ބޭންކް އޮފް މޯލްޑިވސްގެ އެކައުންޓަކުން ކަސްޓަމަރެއްގެ ފައިސާ ގެއްލިއްޖެކަމަށް ވާނަމަ އެކަމުގެ ޒިންމާ ބޭންކް އޮފް މޯލްޑިވްސްއިން ނަގަން ޖެހޭކަމަށް މަޖިލީހުގެ ވިލިނގިލި ދާއިރާގެ މެމްބަރު ސައުދު ހުސައިން ވިދާޅުވެއްޖެ އެވެ.
ސައުދު މިފަދައިން ވިދާޅުވެފައިވަނީ ސައިބާ ސްކޭމްތަކާއި ގުޅޭގޮތުން ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ 10 ވަނަ ޖަލްސާގައި ވާހަކަދައްކަވަމުން ނެވެ.
ސައުދު ވިދާޅުވީ އެކި ކަހަލަ ސްކޭމް ލިންކުތައް ފޮނުވައިގެން އެކައުންޓުތަކުގައި ހުންނަ ފައިސާކޮޅު ދަމައިގަތުމުން، އެކަމުގެ ޝިކާރައަކަށްވާ ފަރާތްތައް އެ ލާރިކޮޅު ހޯދަން، ނުވަތަ އެކަމުގައި އިންސާފު ހޯދުމަށް އުޅެނީ ވަރަށް ހާލުގައި ކަމަށެވެ.
އެފަދަ ކަމެއް ދިމާވުމުން، ބޭންކުންވެސް އެމީހުންނާއި ދޭތެރޭގައި ކަންކަން ކުރަނީ ވަރަށް ތަފާތު ގޮތަކަށްކަން ސައުދު ފާހަގަކުރެއްވި އެވެ.
"މީގެ މައްސަލައަކީ ބޭންކް އޮފް މޯލްޑިވްސްގެ ކަސްޓަމާ ކެއާއާއި، ކަސްޓަމާ ރިލޭޝަންސް ރަނގަޅު ގޮތުގައި މަސައްކަތް ކުރަނީ ކްރެޑިޓްކާޑެއް ހަދަން ދިޔައިމަ، ނުވަތަ ކޭޝް ކާޑެއް ހަދަން ދިޔައިމަ، ނުވަތަ އެކައުންޓެއް އަލަށް ހުޅުވަން ދިޔައިމަ. ވިތްޑްރޯ ކުރަން ނުވަތަ ލޯނެއް ޑިފޯލްޓު ވެގެން، ނުވަތަ އެމީހެއްގެ އެކައުންޓުގައި ހުރި ފައިސާއެއް ގެއްލިގެން ބޭންކް އޮފް މޯލްޑިވްސްއަށް ދިޔައިމަ އެއްކަލަ ކަސްޓެމާ ކެއާ ބަދަލުވަނީ އެހެން ނިޒާމަކަށް"
ވިލިނގިލި ދާއިރާގެ މެމްބަރު ސައުދު ހުސައިން
އެއާއެކު ސައުދު ވިދާޅުވީ ބޭންކް އޮފް މޯލްޑިވްސްގެ އެކައުންޓެއްގައި މީހަކު ފައިސާ ރައްކާކުރާނީ އެ ބޭންކަން އިތުބާރުކޮށްފައި ކަމަށެވެ. އެހެންކަމުން، ސްކޭމްއެއްގެ ތެރެއިން ފއިސާ ގެއްލިއްޖެ ނަމަ، އެކަމުގެ ޒިންމާ ކަސްޓަމަރުން އުފުލަން ޖެހޭގޮތަށް ހެދުމަކީ ޤަބޫލު ކުރެވޭނެ ކަމެއް ނޫން ކަމަށާއި، އެ ނިޒާމު ބަދަލުކުރަން ޖެހޭކަމަށް ސައުދު ވިދާޅުވި އެވެ.
"ބެންކުން ގެއްލޭ ފައިސާއަށް ބެންކުން ޒިންމާ ނުވާހާ ހިނދަކު މިކަމަށް ހައްލެއް ނާންނާނެ، ބޭންކުން އެކަމަށް ޒިންމާވާން ޖެހޭނެ އިންޝުއަރެންސް ސްކީމުތަކާއެއްޗެހި ހުޅުވާލައިގެން މިކަމަށް ޒިންމާ ވެވޭނެ އުސޫލުތަކެއް ފާހަގަކުރެވެން ޖެހޭ. އެފަދަ ހާލަތެއް ދިމާވެއްޖެއްޔާ ބޭންކު ޒިންމާ ކުރުވާ ކަސްޓަމަރަށް އަނބުރާ ފައިސާ ލިބޭނެ ނިޒާމެއް އޮތުން.. އެ ނިޒާމު ނެތިއްޖާ މި ވައްކަން ދުވަހަކުވެސް ނިމުމަކަށް ނާންނާނެ، ދުވަހެއް ދުވަހަށް ދާނީ ބޮޑުވަމުން ފުޅާވަމުން"
ވިލިނގިލި ދާއިރާގެ މެމްބަރު ސައުދު ހުސައިން
ސައުދު ވިދާޅުވީ ބީއެމްއެލްގެ އެކައުންޓެއްގައި ހުއްޓާ މީހެއްގެ ފައިސާ ގެއްލިއްޖެ ނަމަ، އެ މައްސަލައިގައި ބޭންކު ޒިންމާ ކުރުވެން ޖެހޭކަމަށެވެ. އެފަދަ މައްސަލަތަކުގައި ބޭންކު ޒިންމާ ކުރުވޭނެ ނިޒާމެއް ނެތްކަމުގައި ވާނަމަ ސްކޭމްތައް އިތުރުވެ އެކައުންޓުތަކުން ފައިސާ ގެއްލޭ މައްސަލަ ހައްތަހާ ދާނީ އިތުރުވަމުންކަމަށް ސައިދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
