ފުރާންސްގެ ވެރިރަށް ޕެރިހުގައި ރޭ ބޭއްވި ފީފާ ދަބެސްޓް އެވޯޑް ނައިޓުގައި، 2022 ވަނަ އަހަރުގެ އެންމެ މޮޅު ފިރިހެން ކުޅުންތެރިޔާގެ މަގާމަށް އާޖެންޓީނާގެ ކެޕްޓަން ލަޔޮނަލް މެސީ އަށް ލިބިއްޖެ އެވެ.
މިއީ 2016 ވަނަ އަހަރު މި އެވޯޑް ތައާރަފް ކުރި ފަހުން، މެސީ މި އެވޯޑް ކާމިޔާބުކުރި ދެވަނަ ފަހަރެވެ. 2016 އަދި 2017 ވަނަ އަހަރު މި އެވޯޑް ކާމިޔާބުކުރީ ކްރިސްޓިއާނޯ ރޮނާލްޑޯ އެވެ.
2018 ވަނަ އަހަރު ލޫކަރ މޮޑްރިޗް ދަ ބެސްޓު އެވޯޑް ކާމިޔާބުކުރި އިރު 2019 ވަނަ އަހަރު މި އެވޯޑް ކާމިޔާބުކުރީ މެސީ އެވެ. 2020 އަދި 2022 ވަނަ އަހަރުގެ އެވޯޑް ކާމިޔާބުކުރީ ލެވަންޑޮވްސްކީ އެވެ.
މި އަހަރުގެ އެވޯޑަށް މެސީ އާއި ވާދަކުރީ ފުރާންސްގެ ދެ ކުޅުންތެރިން ކަމަށްވާ އެމްބާޕޭ އަދި ބެންޒެމާ އެވެ.
ރޭގެ ރަސްމިއްޔާތުގައި ދަ ބެސްޓު އެންމެ މޮޅު ކޯޗުގެ މަގާމަށް ހޮވުނީ އާޖެންޓީނާ އަށް ވޯލްޑްކަޕް ކާމިޔާބު ކޮށްދިން ކޯޗު ލިއޮނަލް ސްކަލޯނީ އެވެ. އެންމެ މޮޅު ގޯލްކީޕަރުގެ މަގާމް ލިބުނީ އާޖެންޓީނާގެ ވޯލްޑްކަޕް ތަރި އެމިލިއާނޯ މާޓީނެޒު އަށެވެ.
މިދިޔަ އަހަރުގެ އެންމެ މޮޅު ގޯލުޖެހި ކުޅުންތެރިއާއަށް ދޭ ޕުސްކަސް އެވޯޑު ލިބުނީ ޕޮލެންޑްގެ މާކިން އޮލެކްސީ އަށެވެ. އޭނާ އަކީ 2010 ވަނަ އަހަރު ދިމާވި އެކްސިޑެންޓެއްގައި އެއް ފައި ބުރިވެފައިވާ މީހެކެވެ.
Advertisement
This content is created and paid for by advertisers and does not involve Voice Journalists
