ރަށްފުށުގެ އަންހެނުން ކުޑައިމީސްވާ ގޮތަށް ކޮމަންޑޫ ދާއިރާގެ މެންބަރު މުޙައްމަދު ރާޝިދު ދެއްކެވި ވާހަކަތަކާ ގުޅިގެން ކުރީގެ ބަންޑާރަ ނައިބު ޢާއިޝަތު އާޒިމާ ޝަކޫރު ނުރުހުން ފާޅުކުރައްވައިފިއެވެ.

މިއަދު އޮތް ރައްޔިތުންގެ މަޖިލީހުގެ ޖަލްސާގައި، އަދުގެ ސަރުކާރަށް ސަނާ ކިޔަމުންގޮސް، ރާޝިދު ވަނީ، ކިތަންމެ މީރުވަސް ދުވާ ސެންޓެއް ޖެހި ނަމަވެސް، މީގެ ކުރިން ރަށްފުށުގެ ކަނބަލުންގައިން މާ މީރުވަހެއް ނުދުވާ ކަމަށް ވިދާޅުވެ ރަށްފުށުގެ ކަނބަލުންނަށް ކުޑައިމީސް ވާގޮތަށް ވާހަކަ ދައްކަވާފައެވެ. 

ރާޝިދުގެ އެ ވާހަކަތަކާއި ގުޅިގެން ނުރުހުން ފާޅުކުރައްވައި އާޒިމާ ފޭސްބުކް ގައި ކުރެއްވި ޕޯސްޓެއްގައި ވަނީ "އަޅުގަނޑުމެން ހަމަ އަދިވެސް ކިޔަން ޖެހެނީ އިއްޒަތްތެރި މެންބަރުތޯ" ސުވާލު ކުރައްވައިފައެވެ. 

އަދި މަގާމަށް ކުފޫ ހަމަނުވާ މީހުން ތަންތަނަށް އިންތިޚާބު ނުވާނެ ގޮތް ހަދަންޖެހޭ ކަމަށްވެސް އޭނާ ވިދާޅުވި އެވެ. 

ރާޝިދުގެ ވާހަކަ ތަކާއި ގުޅިގެން ސޯޝަލް މީޑިއާގައި އޭނާއަށް ގިނަ ބައެއްގެ ފާޑުކިޔުން އަމާޒުވުމާއި ގުޅިގެން އޭނާ ވަނީ މަޖިލީހުގައި ދެއްކެވި ވާހަކަތައް ދިފާއު ކުރައްވާފަ އެވެ. 

އެގޮތުން ރާޝިދު ކުރެއްވި ޓްވީޓެއްގައި ވިދާޅުވީ މީގެ ކުރިން ރަށްފުށުގެ އަންހެން ކަނބަލުންގެ ގައިން މީރުވަސް ނުދުވާކަމަށް ބުނީ، މީގެ ކުރިން އެމީހުން ތިބީ ނަޖިސް ފެނުން ފެންވަރައިގެން ކަމަށް ވާތީ ކަމަށެވެ. އަދި އެކަން ނިނުމަކަށް ގެނައީ މި ސަރުކާރުންކަން ބުނެދިނުމަށް ކަމަށެވެ.