ފްރާންސްގެ ފުޓުބޯޅަ ލެޖެންޑް ޖަސްޓް ފޮންޓެއިން އުމުރުން 89 އަހަރުގައި މިއަދު މަރުވެއްޖެއެވެ. ފޮންޓެން އަކީ ވޯލްޑްކަޕް އެން މުބާރާތެއްގައި އެންމެ ގިނަ ލަނޑުޖެހުމުގެ ރެކޯޑް އޮންނަ ކުޅުންތެރިއާއެވެ.

1958 ވަނަ އަހަރު ސްވިޑެންގައި ބޭއްވުނު ވޯލްޑްކަޕް ފުުޓުބޯޅަ މުބާރާތުގައި ފުރާންސް ގައުމީ ޓީމަށް ކުޅުނު 6 މެޗުގައި 13 ލަނޑުކާމިޔާބުކޮށްފައެވެ. އެމުބާރާތުގެ ގުރޫޕް ސްޓޭޖުގެ ފުރަތަމަ މެޗުގައި ޕެރަގުއާއީ ކޮޅަށް ތިން ލަނޑު ކާމިޔާބުކޮށް ހެޓްރިކް ހެދިއިރު ދެވަނަ މެޗުގައި ޔޫގޯސްލާވިއާ ކޮޅަށް ދެ ލަނޑު އަދި ގުރޫޕްގެ ފަހު މެޗުގައި ސްކޮޓްލޭންޑް ކޮޅަށް އެއް ލަނޑު ކާމިޔާބުކުރި އެވެ. 

މުބާރާތުގެ ކުއާޓާ ފައިނަލުގައި ނޮދަން އަޔަލޭންޑް ކޮޅަށް ދެލަނޑު އަދި ސެމީ ފައިނަލު މެޗުގައި ބުރެޒިލް އަތުން 5-2 ން ފުރާންސް ބަލިވި މެޗުގައި އެއް ލަނޑު ކާމިޔާބުކުރުމުގެ އިތުރުން މުބާރާތުގެ ތިން ވަނަ ހޮވި މެޗުގައި ވެސްޓް ޖަރުމަނު ކޮޅަށް ތިން ލަނޑު ކާމިޔާބުކޮށް ހެޓްރިކު ހެދިއެވެ.

އޭނާއަކީ ވޯލްޑް ކަޕްގައި އެންމެ ގިނަ ގޯލު ޖެހި ކުޅުންތެރިންގެ ލިސްޓުގެ ހަތަރުވަނައިގައި އޮތް ކުޅުންތެރިއެކެވެ. ފޮންޓެންއާއެކު ހަތަރުވަނަގައި ދެން އޮތީ އާޖެންޓީނާގެ ކެޕްޓަން ލިއޮނަލް މެސީއެވެ.

1953 ވަނަ އަހަރުން 1960 ވަނަ އަހަރަށް ފްރާންސްގެ ގައުމީ ޓީމަށް  ފޮންޓެއިން ކުޅުނު އިރު، އޭނާ ވަނީ 31 މެޗުން 30 ގޯލު ޖަހައިފައެވެ.

ކްލަބު ކެރިއަރުގައި ގިނަ ދުވަސްތަކެއް ނީސްއާއި މޮރޮކޯގެ ޔޫއެސްއެމް ކަސަބަލަންކާގައި ހޭދަކުރި ފޮންޓެން، ވަނީ ކެރިއަރުގެ ވަރަށް  ކުރީކޮޅުގައި ރިޓަޔާކޮށްފައިވެއެވެ. އުމުރުން އެންމެ 28 އަހަރުގައި ފޮންޓެއިން ކުޅުން ހުއްޓާލީ ދެފައި ބިންދައިގެން ދިއުމުގެ ސަބަބުންނެވެ.

ކުޅުން ހުއްޓާލުމަށް ފަހު ކޯޗިންގައިވެސް ފޮންޓެއިން ފެނިފައިވެއެވެ. ފްރާންސްގެ ގައުމީ ޓީމަށް 1967 ވަނަ އަހަރު ފޮންޓެން ކޯޗުކަންކޮށްދިން އިރު، 1974 ވަނަ އަހަރު ޕީއެސްޖީ ފުރަތަމަ ޑިވިޝަނަށް ޕްރޮމޯޓުކޮށްދިން ކޯޗަކީވެސް އޭނާއެވެ.

މޮރޮކޯއަށް އުފަން، ފްރާންސްގެ ފޮންޓެއިން ވަނީ މޮރޮކޯއަށްވެސް ކޯޗުކަން ކޮށްދީފައެވެ. 1980 ވަނަ އަހަރު އެފްރިކާ ކަޕް އޮފް ނޭޝަންސްގެ ތިންވަނަ މޮރޮކޯއިން ހޯދި އިރު، ކޯޗަކީ ފޮންޓެއިންއެވެ.