އިގިރޭސި ޕްރެމިއާ ލީގުގައި ރޭ އަމިއްލަ ދަނޑުގައި 4-0 ގެ ތަފާތުބޮޑު ނަތީއްޖާއަކުން އެވަޓަން ބަލިކޮށް އާސެނަލް އިން ޕްރެމިއާ ލީގު ތާވަލުގެ އެއްވަނައިގައި ފަސް ޕޮއިންޓްގެ ލީޑެއް ނަގައިފިއެވެ.

މި މެޗުގައި ކޮންމެ ހާފެއްގައި އާސެނަލުން ވަނީ ދެ ލަނޑު ޖަހާފައެވެ. އެ ޓީމުގެ ފުރަތަމަ ލަނޑު ފުރަތަމަ ހާފުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް އެޓީމުގެ ޔުކުރޭންގެ ޑިފެންޑަރ ޒެންޗެންކޯ   ތަނަވަސްކޮށްދިން ފުރުޞަތެއްގައި ކާމިޔާބު ކޮށްދިނީ އިގިރޭސި ފޯވާޑް ސަކާއެވެ.

އާސެނަލްގެ ދެވަނަ ލަނޑު ފުރަތަމަ ހާފުގެ އިތުރު ވަގުތުގެ ތެރޭ ސަކާ ތަނަވަސް ކޮށްދިން ފުރުޞަތެއްގައި ކާމިޔާބު ކޮށްދީފައި ވަނީ ބްރެޒިލްގެ ފޯވާޑް މާޓިނެއްލީއެވެ.

އާސެނަލްގެ ތިންވަނަ ލަނޑު ދެވަނަ ހާފުގެ 71 ވަނަ މިނެޓުގައި ބެލްޖިއަމްގެ މިޑްފީލްޑަރ ޓްރޮސާޑް ތަނަވަސް ކޮށްދިން ފުރުޞަތެއްގައި އޮޑެގާޑް ކާމިޔާބު ކޮށްދިން އިރު، ހަތަރުވަނަ ލަނޑު 80 ވަނަ މިނެޓުގައި އެންކެޓިއާ ތަނަވަސް ކޮށްދިން ފުރުޞަތެއްގައި ކާމިޔާބު ކޮށްދީފައި ވަނީ މާޓިނެއްލީއެވެ.

މި މެޗުން ލިބުނު ތިން ޕޮއިންޓާއި އެކު އާސެނަލަށް ޕޮއިންޓް ތާވަލުގެ އެއްވަނާގައި ވަނީ ފަސް ޕޮއިންޓްގެ ލީޑެއް ލިބިފައެވެ. އާސެނަލްއަށް 25 މެޗުން 60 ޕޮއިންޓް ލިބިފައިވާއިރު ދެވަނާގައި އޮތް ސިޓީއަށް 25 މެޗުން ލިބިފައި ވަނީ 55 ޕޮއިންޓެވެ. މި މެޗުން ބަލިވި އެވަޑަން އަށް 25 މެޗުން ލިބުނު 21 ޕޮއިންޓާއި އެކު އެޓީމު އޮތީ ތާވަލުގެ 18 ވަނައިގައެވެ.