ކޮޕާ ޑެލް ރޭ ސެމީ ފައިނަލުގެ ފުރަތަމަ ލެގުގައި ރެއާލް މެޑްރިޑާއި ވާދަކޮށް ހަނިގޮތަކަށް ބާސެލޯނާ މޮޅުވެއްޖެއެވެ.

ރެއާލްގެ ދަނޑުގައި މިރޭ ކުޅެވުނު މެޗުގެ ފުރަތަމަ ހާފު ފެށިގެން ބާރަވަނަ މިނެޓުގައި އެޓީމުން ލަނޑެއް ކާމިޔާބުކުރި އެވެ. ނަމަވެސް ކަރީމް ބެންޒެމާ ކާމިޔާބުކުރި އެލަނޑު ރެފްރީ ނިންމީ އޮފްސައިޑް ލަނޑެއް ކަމަށެވެ.

ރެއާލް މެޑްރިޑުން ގިނަވަގުތު ބޯޅަގެންގުޅެ މެޗު ޑޮމިނޭޓުކުރަމުން ދިޔަ ފުރަތަމަ ހާފުގެ 26 ވަނަ މިނެޓުގައި ބާސެލޯނާ އިން ލަނޑެއް ކާމިޔާބުކޮށް މެޗުގެ ލީޑުނެގި އެވެ. މި ލަނޑަކީ އެޓީމުގެ އައިވަރީ ކޯސްޓް މިޑްފީލްޑަރ ފްރޭންކް ކެސިއާ ފޮނުވާލި ހަމަލާއެއް ރެއާލްގެ ކީއްޕަރު ދިފާއުކޮށް ބޭރަށް ޖައްސާލިބޯޅަ ކުރިމަތީ ހުރި އެޓީމުގެ ބްރެޒިލް ޑިފެންޑަރ މިލީޓޯގެ ފައިގައިޖެހިފައި ބައިކޮޅަށް ވަން ގޯލެކެވެ.

ފުރަތަމަ ހާފުގައި ބާސެލޯނާ އިން އުފެއްދި ހަމައެކަނި ހަމަލާގައި އެޓީމުން ލީޑުނެގިއިރު މުޅިހާފުގެ ބޮޑުބައި ބާސެލޯނާގެ ހާފުތެރޭގައި ކުޅުނު ރެއާލް މެޑްރިޑަށް އެޓީމުގެ ގޯލާއި އަމާޒުކޮށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ.

ދެވަނަ ހާފުގައި ރެއާލުން ބަދަލުތަކެއްގެނެސް މުޅި ޓީމު ކުރިއައްޖެހި ގިނަ ބޯޅަތަކެއް ބާސެލޯނާގެ ގޯލަށް ފޮނުވާލި ނަމަވެސް އެޓީމުގެ ގޯލުކުރިމަތީ ފާރަކަށް އެތުރިގެން ތިބި 10 ކުޅުންތެރިން ފޫއަޅުވާލުމަށް ފަހު މިހާފުގަވެސް ރެއާލްގެ އެއްވެސް ކުޅުންތެރިއަކަށް ބާސާގެ ގޯލުގެ ތިން ދަނޑިން އެތެރެއަށް ބޯޅައެއް އަމާޒުކޮށްލެވޭގޮތެއް ނުވިއެވެ.

މިހާފުގައި ވެސް ލަނޑެއްޖަހަން އެންމެ ހުސް ފުރުސަތެއް ލިބުނީ ބާސެލޯނާގެ މިޑްފީލްޑަރ ކެސިއާ އަށެވެ. ނަމަވެސް އެނާ މުޅިން ހުސްކޮށްއޮވެ ރެއާލްގެ ގޯލާ އަމާޒުކޮށް ފޮނުވާލި ހަމަލާގެ ހުރަހަކަށްވީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް އެޓީމުގެ ފޯވާޑް އަންސޫ ފާޓީ އެވެ.

މި ދެޓީމު ވާދަކުރާ  ސެމީފައިނަލުގެ ދެވަނަ ލެގު ކުޅުމަށް ހަމަޖެހިފައިވަނީ އެޕްރީލް މަހުގެ ހަވަނަ ދުވަހު ބާސެލޯނާގެ ދަނޑުގައެވެ. އޭގެ ކުރިން މިމަހުގެ 19 ވަނަ ދުވަހު ލަލީގާގައި މިދެޓީމު ވާދަކުރާނެ އެވެ.