އިނގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި މެންޗެސްޓަރ ޔުނައިޓެޑާއި ދެކޮޅަށް ކުޅުނު މެޗުގައި ލިވަޕޫލްއިން އެޓީމު ލަދުގަންނަވާލައިފި އެވެ.

ލިވަޕޫލްގެ ދަނޑުގައި ކުޅުނު މި މެޗުގައި އެޓީމުން ވަނީ ޔުނައިޓެޑް ކޮޅަށް 7 ލަނޑު ޖަހައިފަ އެވެ. މިއީ ފާއިތުވެދިޔަ 92 އަހަރުތެރޭގައި މިހާ ތަފާތުބޮޑު ނަތީޖާއަކުން ޔުނައިޓެޑް ބަލިވި ފުރަތަަމަ މެޗެވެ.

މެންޗެސްޓަރ ޔުނައިޓެޑުގެ ތާރީޚްގައި އެ ކުލަބު އެންމެ ތަފާތުބޮޑުކޮށް ބަލިވެ ވެފައިވަނީ 7-0 ގެ ނަތީޖާއަކުންނެވެ. ހަތަރު ފަހަރެއްގެ މަތިން އެޓީމު 7-0 އިން ބަލިވިއިރު، 10 އޭޕްރީލް 1926 ގައި ބްލެކްބާން ރޯވާސް އަތުން، 27 ޑިސެމްބަރު 1930 ގައި އެސްޓަން ވިލާ އަތުން، 26 ޑިސެމްބަރު 1931 ގައި ވުލްވްސް އަތުން އަދި 5 މާޗް 2023 ގައި ލިވަޕޫލް އަތުން ވަނީ ބަލިވެފަ އެވެ.

މިރޭގެ މެޗުގެ ފުރަތަަމަ ހާފުގެ 43 ވަނަ މިނެޓުގައި ލިވަޕޫލަށް ލީޑު ނަގައިދިނީ އެޓީމުގެ ނެދަލޭންޑްސް ފޯވާޑް ކޯޑީ ގައްޕޯ އެވެ. ފުރަތަަމަ ހާފުގައި ލިވަޕޫލުން ގިނަވަގުތު ބޯޅަ ހިފަހައްޓައިގެން މޮޅަށް ކުޅުނު ނަމަވެސް މިހާފުގައި އެޓީމަށް ޔުނައިޓެޑްގެ ގޯލާއި އަމާޒުކޮށް ފޮނުވާލެވުނީ އެންމެ ހަމަލާއެކެވެ.

ނަމަވެސް މި މެޗުގެ ދެވަަނަ ހާފްގައި ލިވަޕޫލްއިން ވަނީ އިތުރު ހަ ލަނޑު ކާމިޔާބުކޮށްފައެވެ. ލިވަޕޫލްގެ ދެވަަނަ ލަނޑު ދެވަނަ ހާފު ފެށިގެން ދެވަނަ މިނެޓުގައި އުރުގުއާއީ ފޯވަޑް ޑާވިން ނުނޭޒް ކާމިޔާބުކުރި އިރު އޭގެ ތިން މިނެޓު ފަހުން އެޓީމުގެ ތިންވަނަ ލަނޑު ކާމިޔާބު ކުރީ ފުރަތަަމަ ލަނޑު ކާމިޔާބުކޮށްދިން ގައްޕޯ އެވެ.

ލިވަޕޫލްގެ ހަތަރު ވަނަ ލަނޑެ 66 ވަނަ މިނެޓުގައި ސަލާހް ކާމިޔާބުކުރި އިރު އެޓީމުގެ ފަސްވަނަ ލަނޑު 75 ވަނަ މިނެޓުގައި ކާމިޔާބުކޮށްދިނީ ނުނޭޒް އެވެ. ލިވަޕޫލްގެ ހަވަނަ ލަނޑު 83 ވަނަ މިނެޓުގައި ސަލާހް ކާމިޔާބުކުރި އިރު އެޓީމުގެ ފަހު ލަނޑު 88 ވަނަ މިނެޓުގައި ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެންނުކުތް ބްރެޒިލްގެ ފޯވާޑް ރޮބާޓޯ ފިރްމީނޯ އެވެ.

މިސީޒަނުގެ ކުރީކޮޅު ލީގުގައި ދަށް ނަތީޖާ ތަކެއް ނެރެމުންއައި ލިވަޕޫލަށް މި މެޗުން ލިބުނު ތިން ޕޮއިންޓާއެކު އެޓީމަށް ވަނީ ގަދަ ހަތަރެއްގެ އުންމީދު އައުވެފައެވެ. 25 މެޗުން އެޓީމަށް 42 ޕޮއިންޓް ލިބިފައިވާއިރު މިވަގުތު އެޓީމު އޮތީ ލީގު ތާވަލްގެ 5 ވަނައިގައެވެ.

މިރޭގެ މެޗުން ބަލިވި މެންޗެސްޓަރ ޔުނައިޓެޑަށް 25 މެޗުން 49 ޕޮއިންޓް ލިބިފައިވާއިރު މިވަގުތު އެޓީމު އޮތީ ލީގު ތާވަލްގެ ތިން ވަނައިގައެވެ.