ސްޕެނިޝް ލަލީގާގައި މިރޭ އަމިއްލަ ދަނޑުގައި ވެލެންސިއާ 1-0 ގެ ނަތީޖާއަކުން ބަލިކޮށް ބާސެލޯނާ އިން ލީގު ތާވަލުގެ ކުރީގައި 10 ޕޮއިންޓުގެ ލީޑެއް ނަގައިފިއެވެ.

މިރޭގެ މެޗުގައި ފެނިގެންދިޔަ ހަމައެކަނި ލަނޑު ފުރަތަަމަ ހާފުގެ 15 ވަނަ މިނެޓުގައި ބާސެލޯނާ އަށް ކާމިޔާބުކޮށްދިނީ އެޓީމުގެ ބްރެޒިލް ފޯވާޑް ރަފީންހާ އެވެ. މިއީ އެޓީމުގެ ތަޖުރިބާކާރު މިޑްފިލްޑަރު ސާޖިއޯ ބުސްކެޓްސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގެ ފުރަތަަމަ ހާފުގައި ގިނަވަގުތު ބާސެލޯނާ އިން ބޯޅަ ގެންގުޅެ މެޗު ޑޮމިނޭޓުކުރި އިރު މިހާފުގައި ވެލެންސިއާ އަށް ބާސެލޯނާގެ ގޯލާއި އަމާޒުކޮށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ.

މެޗުގެ ދެވަަނަ ހާފު ފެށިގެން 53 ވަނަ މިނެޓުގައި ވެލެންސިއާގެ ޕެނަލްޓީ އޭރިއާގެ ތެރެއިިން އެޓީމުގެ ކުޅުންތެރިންގެ އަތުގައި ބޯޅަ ޖެހުމުން ރެފްރީ ވަނީ ބާސެލޯނާ އަށް ޕެނަލްޓީއެއް ދީފައެވެ.

ބާސެލޯނާގެ ޕެނަލްޓީ އެޓީމުގެ ސްޕެއިން ފޯވާޑް ފެރާން ޓޮރޭޒް ފޮނުވާލުމުން އަމާޒުވީ ގޯލުގެ އަރިމަތީ ދަނޑިއަށެވެ. އަދި އޭގެ ހަމިނެޓު ފަހުން ބާސެލޯނާގެ އުރުގުއާއީ ޑިފެންޑަރު ރޮނާލްޑް އަރައުޖޯ އަށް ރެފްރީ ވަނީ ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ.

ބާސެލޯނާގެ އެއް ކުޅުންތެރިއަކު މަދުވުމުގެ ސަބަބުން ފަހު ހާފުގެ ބޮޑުބައި އެޓީމުން ކުޅުނީ ވަރަށް ބޮޑަށް ފަހަތަށް ޖެހި ޑިފެންސަށް އިސްކަން ދީގެންނެވެ. އަދި މިސީޒަނުގައި މިހާތަނަށް ލީގުގައި އެންމެ ރަގަޅު ޑިފެންސިވް ރެކޯޑެއް ދަމަހައްޓަމުން އަންނަ ބާސެލޯނާގެ ގޯލު ފޫއަޅުވާކުމުގައި ވެލެންސިއާ އަށް ކާމިޔާބު ހޯދޭގޮތެއް ނުވިއެވެ.

މިރޭގެ މެޗުން ލިބުނު ތިން ޕޮއިންޓާއެކު ބާސެލޯނާ އަށް ވަނީ 24 މެޗުން 62 ޕޮއިންޓް ލިބިފައެވެ. ދެވަނައިގައި އޮތް ރެއާލް މެޑްރިޑް 23 މެޗުން ލިބިފައިވަނީ 52 ޕޮއިންޓެވެ. އަދި މިރޭގެ މެޗުން ބަލިވި ވެލެންސިއާ އަށް 24 މެޗުން ލިބުނު 23 ޕޮއިންޓާއެކު އެޓީމު އޮތީ ލީގު ތާވަލްގެ 19 ވަނައިގައެވެ.