ސައޫދީ އަރަބިއްޔާގެ އަލް ނަސްރަށް ކުޅެމުންއަންނަ ޕޯޗުގަލް ކެޕްޓަން ކްރިސްޓިއާނޯ ރޮނާލްޑޯގެ ފަރާތުން ސީރިއާ އާއި ތުރުކީގައި ބިންހެލުމުގެ ސަބަބުން ހާލުގައި ޖެހިފައިވާ ފަރާތްތަކަށް އެހީގެ ތަކެތި ބަރުކޮށްފައި މަތިންދާބޯޓެއް ފޮނުވައިފި ކަމަށް ޑެއިލީމެއިލް އިން ރިޕޯޓް ކޮށްފިއެވެ.

އެނޫހުން ރިޕޯޓުކޮށްފައިވާ ގޮތުގައި ކްރިސްޓިއާނޯ ރޮނާލްޑޯ ސީރިއާ އާއި ތުރުކީގައި ހާލުގައި ޖެހިފައިވާ މީހުންނަށް އެހީވުމަށް ފޮނުވި ބޯޓުގައި ހުރީ ޓެންޓާއި ކާބޯތަކެތީގެ ޕާރުސަލް، ބާލީސް، ބްލޭންކެޓް، ބޭބީ ފުޑް، ކިރު، އަދި ބޭހުގެ ސާމާނެވެ. މިތަކެތި ސީރިއާ އަދި ތުރުކީއަށް ވެސް ފޮނުވާފައިވެއެވެ.

މީގެކުރިން ރޮނާލްޑޯ އެއްފަހަރު ކުޑަކުއްޖެއްގެ ސިކުނޑީގެ ސާޖަރީއަށް ބޭނުންވާ ފައިސާ ދެއްކުމަށް 83،000 ޑޮލަރު (69،000 ޕައުންޑް) ދީފައިވާއިރު، އޭނާގެ އުފަން ރަށް ޕޯޗުގަލްގެ ކެންސަރު ސެންޓަރަކަށް އެހީވުމަށް 165،000 ޑޮލަރު (137،000 ޕައުންޑް) ހަދިޔާކޮށްފައިވެ އެވެ.

މީގެއިތުރުންވެސް ސޭވް ދަ ޗިލްޑްރަން، ޔުނިސެފް އަދި ވޯލްޑް ވިޝަންގެ އެމްބެސެޑަރުކަން ކޮއްފައިވާ ފޯވާޑް ވަނީ ކޮރޯނާވައިރަހުގެ ބަލިމަޑުކަން އެންމެ ބޮޑަށް ފެތުރުނު ދުވަސްވަރު ޕޯޗުގަލްގެ ހޮސްޕިޓަލްތަކަށް ވެސް އެއް މިލިއަން ޕައުންޑް ހަދިޔާކޮށްފަ އެވެ.

ރޮނާލްޑޯގެ މި އިސްނެގުމުގެ ސަބަބުން ކުރިއަށް އޮތް ދުވަސްތަކާއި ހަފުތާތަކުގައި ކުޅިވަރުގެ އެހެން ތަރިން ވެސް އެގޮތަށް އަމަލު ކުރުމަށް ހިތްވަރު ލިބޭނެ ކަމަށް ގަބޫލުކުރެވޭ ކަމަށް ޑެއިލީމެއިލް އިން ބުނެފައިވެއެވެ.