ޔުއެފާ ޗެމްޕިއަންސްލީގުގެ ދެވަަނަ ބުރުގެ ދެވަަނަ ލެގުގައި މިރޭ އަމިއްލަ ދަނޑުގައި ޖަރުމަނުގެ ބޮރޫޝިއާ ޑޯޓްމަންޑް 2-0 ގެ ނަތީޖާއަކުން ބަލިކޮށް އިގިރޭސިވިލާތުގެ ޗެލްސީ މުބާރާތުގެ ކުއާޓާ ފައިނަލުން ޖާގަ ހޯދައިފިއެވެ.

މިރޭގެ މެޗުން 2-0 ގެ ނަތީޖާއަކުން ޗެލްސީ މޮޅުވުމުން ދެމެދުގެ އެގްރިގޭޓުން އެޓީމަށް ކުރި ލިބެނީ 2-1 ގެ ނަތީޖާއަކުން މެވެ. އަދި މިއީ މިއަހަރު ޗެލްސީ އިން ކުޅުނު 13 މެޗުގެ ތެރެއިިން އެއް މެޗެއްގައި އެޓީމުން ދެ ލަނޑު ކާމިޔާބުކުރި ފުރަތަަމަ މެޗެވެ.

ފުރަތަަމަ ލެގުގައި ރަށުން ބޭރުގައި ޑޯޓްމަންޑް އަތުން ބަލިވެފައި އޮތުމުން މިރޭގެ މެޗު ޗެލްސީ އިން ފެށީ ވަރަށް ވަރުގަދަކޮށެވެ. ފުރަތަަމަ ހާފުގައި ޗެލްސީގެ ޓީމުން ލަނޑު ޖަހާނެ އެންމެ ހުސް ފުރުސަތެއް ލިބުނީ އެޓީމުގެ ޖަރުމަން ފޯވަޑް ކައި ހަވާޓްޒް އަށެވެ. ނަމަވެސް ޑޯޓްމަންޑްގެ ޕެނަލްޓީ އޭރިއާ ތެރޭ މުޅިން ހުސްކޮށް ހުރެ އޭނާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

ފުރަތަަމަ ހާފުގެ 38 ވަނަ މިނެޓުގައި ކައި ހާވަޓްޒް ޗެލްސީއަށް ލަނޑެއް ކާމިޔާބުކޮށްދިން ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

މި މެޗުގައި ޗެލްސީގެ ފުރަތަަމަ ލަނޑު ފުރަތަަމަ ހާފުގެ 43 ވަނަ މިނެޓުގައި ކާމިޔާބުކޮށްދިނީ އިގިރޭސި ފޯވާޑް ރަހީމް ސްޓާލިން އެވެ. މިއީ އެޓީމުގެ އިގިރޭސި ޑިފެންޑަރު ބެން ޗިލްވެލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ޗެލްސީގެ ދެވަަނަ ލަނޑު ދެވަނަ ހާފު ފެށުނުތާ ކައިރީ އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ ކައި ހާވަޓްޒް އެވެ. އޭނާ ފުރަތަަމަ ފޮނުވާލި ޕެނަލްޓީ އަމާޒުވީ ގޯލުގެ އަރިމަތީ ދަނޑިއަށެވެ. ނަމަވެސް ހާވަޓްޒް ބޯޅަ ފޮނުވާލުމުގެ ކުރިން ޑޯޓްމަންޑްގެ ކުޅުންތެރިން ޕެނަލްޓީ އޭރިއާ ތެރެއަށް ވަނުމުން ރެފްރީ ވަނީ ދެވަނަ ފަހަރަށް ޕެނަލްޓީ ޖެހުމުގެ ފުރުޞަތު ޗެލްސީއަށް ދީފައެވެ. ދެވަނަ ފަހަރަށް ފޮނުވާލި ޕެނަލްޓީ އޭނާ ވަނީ ގޯލުގެ ތެރެއަށް ވައްދާލާފައެވެ.

މި ލަނޑާއި އެކު ޑޯޓްމަންޑް އިން ކުރިއަށް ޖެހި ލަނޑެއް ކާމިޔާބުކުރެވޭތޯ ވަރަށް މަސައްކަތް ކުރި އެވެ. ނަމަވެސް ޗެލްސީ އިން ވަނީ ރޭވުންތެރިކަމާއެކު ޑޯޓްމަންޑްގެ ހަމަލާތައް ދިފާއުކުރުމުގައި ކާމިޔާބު ހޯދާފައެވެ. 

ޗެމްޕިއަންސްލީގުއި މާދަމާ ރޭ ކުޅުމަށް ހަމަޖެހިފައިވާ މެޗުތަކުގައި ރަށުން ބޭރުގައި ޕީއެސްޖީ ނުކުންނާނީ ޖަރުމަނުގެ ބަޔާން މިއުނިކާއި ދެކޮޅަށެވެ. އަދި އަމިއްލަ ދަނޑުގައި ޓޮޓެންހަމް ނުކުންނާނީ އިޓަލީގެ އޭސީ މިލާނާއި ދެކޮޅަށެވެ. މި ދެ މެޗު ވެސް ފެށުމަށް ހަމަޖެހިފައިވަނީ ރާއްޖެ ގަޑިން ދަންވަރުން 1:00 ގައެވެ.