ޔޫއެފާ ޗެމްޕިއަންސް ލީގުގެ ދެވަނަ ބުރުގައި ރޭ ރަށުން ބޭރުގައި ބަޔާން މިއުނިކް އާއި ވާދަކޮށް 2-0 ގެ ނަތީޖާއަކުން ބަލިވެ، ޕީއެސްޖީ މުބާރާތުން ކަޓައިފި އެވެ.

މި ދެ ޓީމުގެ ޕީއެސްޖީގެ ދަނޑުގައި ކުޅުނު މެޗު 1-0 ގެ ނަތީޖާއަކުން ބަޔާން މޮޅުވެފައި އޮތުމުން އެޓީމަށް ކުއާޓާ ފައިނަލުން ޖާގަ ލިބުނީ 3-0 ގެ އެގްރިގޭޓުން ޕީއެސްޖީގެ މައްޗަށް ކުރި ހޯދައިގެންނެވެ.

މިއީ އާޖެންޓީނާގެ ކެޕްޓަން ލަޔޮނަލް މެސީ ޕީއެސްޖީއާއި ގުޅުނީ ފަހުން އެޓީމު މުބާރާތުގެ ދެވަނަ ބުރަށް ކަޓައިގެން ދިޔަ ދެވަނަ ފަހަރެވެ. 2022 ވަނަ އަހަރު މުބާރާތުގެ ދެވަނަ ބުރުގައި އެޓީމު ބަލިވީ ސްޕެއިންގެ ރެއާލް މެޑްރިޑާއި ވާދަކޮށް ފުރަތަަމަ ލެގުން މޮޅުވެ އަދި ދެވަނަ ލެގުގައި ލީޑު ހޯދާފައި ވަނިކޮށެވެ.

އަނިޔާގެ ސަބަބުން ރޭގެ މެޗުގައި ޕީއެސްޖީގެ ބުރެޒިލް ފޯވާޑް ނޭމާ ޓީމުގައި ހިމެނިފައި ނުވާއިރު އެޓީމުގެ އެޓޭކްތައް ލީޑު ކުރަން ތިބީ މެސީ އަދި އެމްބާޕޭ އެވެ.

ފުރަތަަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، މި ހާފުގައި ލަނޑު ޖަހާނެ އެންމެ ހުސް ފުރުސަތެއް ލިބުނީ ބަޔާން މިއުނިކްގެ ޒުވާން މިޑްފިލްޑަރު ޖަމާލް މުސިއާލާ އަށެވެ. ނަމަވެސް އޭނާ ފޮނުވާލި ބާރު ހަމަލާ ޕީއެސްޖީގެ ގޯލްކީޕަރު ވަނީ ދިފާއުކޮށްފަ އެވެ.

ފުރަތަަމަ ހާފުގައި ޕީއެސްޖީ ޓީމުން އެންމެ ހުސް ފުރުސަތެއް ލިބުނީ އެޓީމުގެ ޕޯޗުގަލް މިޑްފިލްޑަރު ވިޓީނިއާ އަށެވެ. ބަޔާންގެ ޕެނަލްޓީ އޭރިއާ ތެެރެއިން އެޓީމުގެ ގޯލްކީޕަރު ކައިރިން ނައްޓާލުމަށް ފަހު މުޅިން ހުސްކޮށް އޮތް ގޯލުގެ ތެރެއަށް އޭނާ ފޮނުވާލި ބޯޅަ ގޯލު ރޮނގުމަތިން ކަހަލަގޮތަކަށް ބަޔާންގެ ޑިފެންޑަރު މެތިއަސް ޑެލިގްޓް ވަނީ ދިފާއުކޮށްފަ އެވެ.

ދެވަަނަ ހާފު ފެށިގެން 52 ވަނަ މިނެޓުގައި ބަޔާން މިއުނިކްގެ ފޯވާޑް އެރިކް ޗުޕޯ-މޮޓިން ލަނޑެއް ކާމިޔާބު ކުރި ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. ނަމަވެސް އޭގެ ކުޑައިރުކޮޅެއް ފަހުން ފަހު ހާފުގެ 61 ވަނަ މިނެޓުގައި އެރިކް ޗުޕޯ-މޮޓިން ވަނީ ލަނޑެއް ކާމިޔާބުކޮށް ބަޔާންއަށް މި މެޗުގައި ލީޑު ހޯދައިދީފައެވެ.

މިއީ ޕީއެސްޖީގެ މިޑްފީލްޑަރު މާކޯ ވެރާޓީ އަތުން ހެދުނު ގޯހެއްގެ ފައިދާ ނަގައި ލިއޮން ގޮރެޓްޒްކާ ތަނަވަސްކޮށްދިން ފުރުސަތެއްގައި މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ބަޔާންގެ ލަނޑަށްފަހު ޕީއެސްޖީ އިން ކުރިއަށް ޖެހި ލަނޑެއް ކާމިޔާބުކުރެވޭތޯ ވަރަށް މަސައްކަތް ކުރި އެވެ. ނަމަވެސް އެޓީމުން އުފެއްދި ހަމަލާތަކުގެ ހުރަހަކަށް ވީ ބަޔާން މިއުނިކްގެ ގޯލްކީޕަރު ޔާން ސޮމާއެވެ.

މި މެޗުގައި ބަޔާންގެ ދެވަަނަ ލަނޑު މެޗުގެ ދެވަަނަ ހާފްގެ 89 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ޖަރުމަނުގެ ފޯވަޑް ގްނަބެރީ އެވެ. މިއީ އެޓީމުން އުފެއްދި ކައުންޓާ އެޓޭކެއްގައި ޕޯޗުގަލްގެ ޑިފެންޑަރު ކަންސެލޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި މިއީ ފާއިތުވެދިޔަ 16 ސީޒަނުގެ ތެރޭގައި ޗެމްޕިއަންސްލީގުގެ ކުއާޓަރ ފައިނަލުން ބަޔާން މިއުނިކް ޖާގަ ހޯދި 14 ވަނަ ފަހަރެވެ.