ކުރީގެ ރައީސް ޢަބްދުالله ޔާމިން ޢަބްދުލް ޤައްޔޫމްގެ މައްޗަށް ކޮށްފައިވާ 11 އަހަރުގެ ޖަލު ޙުކުމުގެ އިސްތިއުނާފްގެ 5 ކަމެއް އިސްލާހުކުރުމަށް ހައިކޯޓުން އަންގާފައިވާކަމަށް އެމަނިކުފާނުގެ ގާނޫނީ ޓީމުގައި ހިމެނިވަޑައިގަންނަވާ ގާނޫނީ ވަކީލު ޢަބްދުالله ޝިޔާޒު ވިދާޅުވެއްޖެ އެވެ. 

ވ. އާރަށުގެ މުއާމަލާތާއި ގުޅިގެން ރައީސް ޔާމީންގެ މައްޗަށް އިއްވި 11 އަހަރުގެ ހުކުމް ހައިކޯޓުގައި އިސްތިއުނާފު ކޮށްފައިވަނީ މިދިޔަ ފެބްރުއަރީ މަހުގެ 21 ގައެވެ. 

އިސްތިއުނާފު ބަލައިގަތުމާމެދު ގޮތެއް ނިންމުން ދިގުލައިގެންދާތީ ވާދަވެރި ސިޔާސީ ޕާޓީގެ ލީޑަޝިޕުން ކަންބޮޑުވުން ފާޅުކުރަމުން ދަނިކޮށް، މިއަދު ހައިކޯޓުން ވަނީ އިސްތިއުނާފު އިސްލާހު ކުރުމަށް އަނބުރާ ފޮނުވާލާފަ އެވެ. 

ރައީސް ޔާމީންގެ ގާނޫނީ ވަކީލު ޢަބްދުالله ޝިޔާޒު ކުރެއްވި ޓްވީޓެއްގައި ވަނީ ޚުލާސާގޮތެއްގައި އިސްތިއުނާފުގައި އިސްލާހު ކުރަން އަންގާފައިވާ ކަންކަން ހިއްސާކުރައްވާފަ އެވެ. 

އެގޮތުން ޝިޔާޒު ވިދާޅުވީ ވ އާރަށުގެ މައްސަލައަކީ އެއް ރިޕޯޓަކުން ޖަވާބު ދީފައިވާ މައްސަލައެއް ނަމަވެސް ދެ ޤަޟިއްޔާގެ އިސްތިއުނާފު ފޯމު ވަކިން ތާއްޔާރުކޮށް އިސްލާހު ހުށައެޅުމަށް ހައި ކޯޓުން އަންގާފައިވާ ކަމަށެވެ. 

އޭގެ އިތުރުން ޝަރީއަތް ނިމުނު ގޮތުގެ ރިޕޯޓާއި މަޙްޟަރުތަކާއި ޑޮކިއުމެންޓްރީ ހެކިތަކުން ކެޕްޗާކޮށް ހުށަހަޅާފައިވާ ބައިތައް ލިޔެގެން ފޯމުގައި ހިމަނައިދިނުމާއި ، އިނގިރޭސިބަހުން ހުރި ބޭރުޤައުމުތަކުގެ ކޯޓުތަކުގެ ނިންމުން ދިވެހިބަހުން ތަރުޖަމާ ހުށައެޅުމުގެ އިތުރުން، ބޭރު ޤައުމުތަކުގެ މައްސަލަތަކުގެ ރިޕޯރޓުތައް ހުށައެޅުމަށް އަންގާފައިވާކަމަށް ޝިޔާޒު ވިދާޅުވި އެވެ. 

ޝިޔާޒު އިތުރަށް ވިދާޅުވީ ކުރިމިނަލް ކޯޓަށް ހުށަހެޅި އިސްތިއުނާފް ފޯމު ހައިކޯޓަށް ކްރިމިނަލް ކޯޓުން ފޮނުވިއިރު ބައެއް އެޓޭޗްމަންޓް އެ ފޯމުގައި ނެތުމުން އެ އެޓެޗްމަންޓްތައްވެސް ފޮނުވުމަށް ވެސް ހައިކޯޓުން އެދިފައިވާ ކަމަށެވެ. 

ރައީސް ޔާމީންގެ އިސްތިއުނާފު އިސްލާހުކޮށް އަލުން ހުށައެޅުމަށް ހައިކޯޓުން ރައީސް ޔާމީންގެ ޤާނޫނީ ޓީމަށް އަންގާފައިވަނީ މިއަދުގެ 12:58 ގައެވެ. 

ޤާނޫނު ބުނާގޮތުން ކްރިމިނަލް ކޯޓުން ނިންމާ މައްސަލައެއް އެންމެ ލަސްވެގެން ރަސްމީ 60 ދުވަހުގެ މުއްދަތެއްގެ ތެރޭ ހައި ކޯޓުގައި އިސްތިއުނާފު ކުރަން ވާނެ އެވެ. މި މައްސަލައަށް ބަލާލާއިރު، ރައީސް ޔާމީންގެ ފަރާތްޕުޅުން މިމަހުގެ 22 އާއި ހަމަޔަށް މައްސަލަ ހައި ކޯޓުގައި އިސްތިއުނާފު ކުރެވޭނެ އެވެ. 

ރައީސް ޔާމީންގެ ފަރާތްޕުޅުން މި މައްސަލަ ހައިކޯޓަށް އިސްތިއުނާފު ކުރައްވަމުން އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު ވަނީ، ހައިކޯޓު މަރުހަލާއިން ރައީސް ޔާމީން މިނިވަންވާނެ ކަމުގެ ޔަގީންކަން ދެއްވާފަ އެވެ.

އަދި ރައީސް ޔާމީންގެ ފަރާތްޕުޅުން ހުށައަޅާފައިވާ އިސްތިއުނާފުގައި ދަށު ކޯޓުން ހަދާފައިވާ ބޮޑެތި ގޯސްތައް ފާހަގަކޮށްފައިވާނެ ކަމަށާއި، ހައި ކޯޓުން އެ ގޯސްތައް ދަމަހައްޓާނެ ކަމަށް ގަބޫލު ނުކުރައްވާކަމަށް ޑރ ޖަމީލު ވިދާޅުވެފައި ވެއެވެ.