ޔުއެފާ ޔޫރޮޕާ ލީގު ދެވަނަ ބުރުގެ ފުރަތަަމަ ލެގުގައި މިރޭ އަމިއްލަ ދަނޑުގައި ސްޕެއިންގެ ރެއާލް ސޮސިއެޑާޑް ބަލިކޮށް މުބާރާތުގެ ކުއާޓާ ފައިނަލާއި ގާތަށް އިޓަލީގެ ރޯމާ އިން ޖެހިލައިފިއެވެ.

ރޯމާގެ ދަނޑުގައި މިރޭ ކުޅެވުނު މެޗު އެޓީމުން ކާމިޔާބުކުރީ 2-0 ގެ ނަތީޖާއަކުންނެވެ. ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ރޯމާއަށް ލީޑު ނަގައިދިނީ އެޓީމުގެ އިޓަލީ މިޑްފީލްޑަރު އަލްޝަރާވީ އެވެ. މިއީ ފުރަތަަމަ ހާފުގެ 13 ވަނަ މިނެޓުގައި އެޓީމުގެ އިގިރޭސި ފޯވާޑް އަބްރަހަމް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފުގައި ރެއާލް ސޮސިއެޑާޑް އިން އެންމެ ރަގަޅު ފުރުސަތެއް ލިބުނީ އެޓީމުގެ ޖަޕާން ފޯވާޑް ކޫބޯ އަށެވެ. ނަމަވެސް އޭނާ ފޮނުވާލި ހަމަލާ އަމާޒުވީ ރޯމާގެ ގޯލުގެ އަރިމަތީ ދަނޑިއަށެވެ.

Advertisement

ދެވަަނަ ހާފު ފެށިގެން ރޯމާގެ އިޓަލީ މިޑްފީލްޑަރު ލޮރެންޒޯ ޕެލެގްރިނީ އަށް ވަނީ އެޓީމުގެ ލީޑު ފުޅާކޮށްދިނުމަށް ތަނުގެ ފުރުސަތެއްގައި ލިބިފައެވެ. ނަމަވެސް އޭނާ ފޮނުވާލި ހަމަލާ އަމާޒުވީ ސޮސިއެޑާޑްގެ ގޯލުގެ އަރިމަތީ ދަނޑިއަށެވެ.

މި މެޗުގައި ރޯމާ އިން ކާމިޔާބުކުރި ދެވަނަ ލަނޑު، ފަހުހާފުގެ 87 ވަނަ މިނެޓުގައި ޕައުލޯ ޑިބާލާ ނަގައިދިން ކޯނަރަކުން ކާމިޔާބުކޮށްދިނީ ދެވަނަ ހާފުގައި ކުޅެންނުކުތް އަލްބޭނިއާ ޑިފެންޑަރު ކުމްބުއްލާ އެވެ. މިއާއެކު ފުރަތަަމަ ލެގުގެ ކުޅުން ނިމިގެންދިޔައީ 2-0 ގެ ނަތީޖާއަކުން ރޯމާ ކުރީގައި އޮވެގެންނެވެ.

ދެވަަނަ ލެގުގައި މިދެޓީމު ސޮސިއެޑާޑް ދަނޑުގައި ކުޅޭ މެޗު، ކުޅުމަށް ހަމަޖެހިފައިވަނީ މިމަހުގެ 17 ވަނަ ދުވަހުގެ ރޭ އެވެ.