ޔުއެފާ ޔޫރޮޕާ ލީގުގެ ދެވަނަ ބުރުގެ ފުރަތަަމަ ލެގުގައި މިރޭ ރަށުން ބޭރުގައި އާސެނަލް ކުޅުނު މެޗު އެއްވަރުވެގެން ނިމިއްޖެއެވެ.

ޕޯޗުގަލްގެ ސްޕޯޓިން ލިސްބަންގެ ދަނޑުގައި މިރޭ ކުޅެވުނު މެޗު ނިމުނީ 2-2 ގެ ނަތީޖާއަކުން ދެޓީމް އެއްވަރުވެގެންނެވެ.

މި މެޗުގައި ފުރަތަަމަ ލަނޑުޖަހައި ލީޑު ހޯދީ އާސެނަލް އިންނެވެ. މި ލަނޑު ފުރަތަަމަ ހާފުގެ 22 ވަނަ މިނެޓުގައި ކާމިޔާބުކޮށްދިނީ އެޓީމުގެ ފުރާންސް ޑިފެންޑަރު ސަލިބާއެވެ. ނަމަވެސް ފުރަތަަމަ ހާފު ނިމުނުގެ ކުރިން ސްޕޯޓިންގެ ގޮންކާލޯ އިނާސިއޯ ލަނޑެއް ކާމިޔާބުކޮށް އެޓީމަށް މެޗުގެ ނަތީޖާ ހަމަހަމަ ކޮށްދިނެވެ.

Advertisement

ދެވަަނަ ހާފު ފެށިގެން 10 ވަނަ މިނެޓުގައި ސްޕޯޓިން ލިސްބަން އިން މި މެޗުގައި ފުރަތަަމަ ފަހަރަށް ލީޑު ނެގި އެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ ޕޯޗުގަލް ފޯވާޑް ޕައުލިނިއޯ އެވެ. މިއީ އެޓީމުގެ މިޑްފިލްޑަރު ޕެޑްރޯ ގޮންކަލްވޭސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގައި އާސެނަލް އިން ކާމިޔާބުކުރި ދެވަނަ ލަނޑަކީ ދެވަަނަ ހާފުގެ 62 ވަނަ މިނެޓުގައި ސްޕޯޓިންގެ ޖަޕާން މިޑްފީލްޑަރު މޮރިޓާ އަތުން ބައިކޮޅަށް ވަން ލަނޑެކެވެ. މިއާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

 ދެވަަނަ ބުރުގެ ދެވަަނަ ލެގުގައި އާސެނަލް ދަނޑުގައި މި ދެޓީމް ވާދަކުރާ މެޗު ކުޅުމަށް ހަމަޖެހިފައިވަނީ މި މަހުގެ 17 ވަނަ ދުވަހުގެ ރޭ އެވެ.