ޔުއެފާ ޔޫރޮޕާ ލީގު ދެވަަނަ ބުރުގެ ފުރަތަަމަ ލެގުގައި މިރޭ އަމިއްލަ ދަނޑުގައި ސްޕެއިންގެ ރެއާލް ބެޓިސް ބަލިކޮށް މުބާރާތުގެ ކުއާޓާ ފައިނަލުގެ ފުރުސަތު މެންޗެސްޓަރ ޔުނައިޓެޑުން ބޮޑުކޮށްފިއެވެ.

ޔުނައިޓެޑުގެ އޯލްޑް ޓްރެފޯޑުގައި ކުޅުނު މި މެޗު އެޓީމުން ކާމިޔާބުކުރީ 4-1 ގެ ނަތީޖާއަކުންނެވެ. މެޗުގެ ފުރަތަަމަ ހާފުގައި ވަރަށް ކުރީކޮޅު ޔުނައިޓެޑްގެ އިގިރޭސި ފޯވާޑް ރަޝްފޯޑް ލަނޑެއް ކާމިޔާބުކޮށް އެޓީމަށް ލީޑު ހޯދައިދީފައި ވަނިކޮށް ބެޓިސްއަށް މެޗުގެ ނަތީޖާ އެއްވަރުކޮށްދިނީ ފުރަތަަމަ ހާފުގެ 32 ވަނަ މިނެޓުގައި ސްޕެއިންގެ ފޯވާޑް ޕެރޭޒް އެވެ.

ދެވަަނަ ހާފު ފެށިގެން 52 ވަނަ މިނެޓުގައި މެންޗެސްޓަރ ޔުނައިޓެޑަށް އަކުން ލީޑު ހޯދައިދިނީ އެޓީމުގެ ބްރެޒިލް ފޯވާޑް އެންޓޮނީ އެވެ. މިއީ އެޓީމުގެ ޕޯޗުގަލް މިޑްފިލްޑަރު ބުރޫނޯ ފެނާންޑޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އޭގެ ހަމިނެޓު ފަހުން ޔުނައިޓެޑްގެ ލީޑު ފުޅާކޮށްދިނީ ބުރޫނޯ ފެނާންޑޭޒްއެވެ. އަދި އެޓީމުގެ ހަތަރުވަނަ ލަނޑު ދެވަނަ ހާފުގެ 82 ވަނަ މިނެޓުގައި ކާމިޔާބުކޮށްދިނީ އެޓީމުގެ ނެދަލޭންޑްސް ފޯވާޑް ވޯޓް ވެގްހޯސްޓްއެވެ.

މި ނަތީޖާއާއެކު ލީގުގައި އެންމެ ފަހުން ލިވަޕޫލްލ އަތުން ތަފާތުބޮޑުކޮށް ބަލިވި، ބަލިވުން ޔުނައިޓެޑުން ވަނީ ހަނދާން ނައްތާލާ، ޔޫރޮޕާ ލީގުގެ ކުއާޓާ ފައިނަލުގެ ފުރުސަތު ބޮޑުކޮށްފަ އެވެ.

މި މަހުގެ 18 ވަނަ ދުވަހުގެ ރޭ ބެޓިސްގެ ދަނޑުގައި ކުޅޭ ދެވަނަ ލެގުގެ މެޗުން ދެ ލަނޑުގެ ތަފާތަކުން ބަލިވިއަސް ޔުނައިޓެޑަށް ކުއާޓާ ފައިނަލުން ފުރުސަތު ލިބޭނެއެވެ.