އިގިރޭސި ޕްރިމިއާ ލީގުގައި މިރޭ ރަށުން ބޭރުގައި ތާވަލުގެ ފުލުގައި އޮތް ބޯންމައުތު އަތުން ބަލިވެ ގަދަ ހަތަރެއްގައި ހިމެނުމަށް ލިވަޕޫލުން ކުރަމުން އަންނަ މަސައްކަތަށް ހުރަސްއެޅިއްޖެއެވެ.

ލީގުގައި އެންމެ ފަހުން ކުޅުނު މެޗުގައި މެންޗެސްޓަރ ޔުނައިޓެޑް ކޮޅަށް 7 ލަނޑުޖެހި ލިވަޕޫލް މިރޭގެ މެޗުން ބަލިވީ 1-0 ގެ ނަތީޖާއަކުންނެވެ.

މިރޭގެ މެޗުން މޮޅުވި ނަމަ ތާވަލުގެ ހަތަރުވަނައިގައި އޮތް ޓޮޓެންހަމް އާއި ޕޮއިންޓުގެ ގޮތުން އެއްވަރުކުރުމުގެ ފުރުސަތު ލިވަޕޫލްއަށް އޮތެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ގެންގުޅެ މެޗު ޑޮމިނޭޓްކޮށް ގިނަ ފުރުޞަތު ހޯދާފައި ވަނީ ލިވަޕޫލުންނެވެ. މިގޮތުން ފުރަތަމަ ހާފުގެ ހަވަނަ މިނެޓުގައި ލިވަޕޫލްގެ ނެދަލޭންޑްސް ޑިފެންޑަރ ވެން ޑައިކަށް ލަނޑެއްޖަހަން ލިބުނު ހުސް ފުރުޞަތުގައި އޭނާ ބޮލުން ފޮނުވާލި ބޯޅަ ގޯލަށް ވަނުމުގެ ކުރިން ބޯންމައުތުގެ ޑިފެންޑަރުން ވަނީ އެ ބޯޅަ ދިފާއު ކޮށްލާފައެވެ.

މިމެޗުގައި ފެނިގެންދިޔަ ހަމައެކަނި ލަނޑު ފުރަތަމަ ހާފުގެ 28 ވަނަ މިނެޓުގައި ބޯންމައުތުން އުފެއްދި ކައުންޓަ އެޓޭކެއްގައި ކާމިޔާބުކޮށްދިނީ އެ ޓީމްގެ ޑެންމާކް މިޑްފީލްޑަރ ފިލިޕް ބިލިންގ އެވެ. މިއީ އެޓީމުގެ ފޯވާޑް ޑަނގޯ އޮއުޓާރާ ތަނަވަސް ކޮށްދިން ފުރުޞަތެއްގައި އޭނާ ކާމިޔާބުކޮށްދިން ލަނޑެކެވެ.

މެޗުގެ ދެވަނަ ހާފުގެ 68 ވަނަ މިނެޓުގައި ނަތީޖާ ހަމަހަމަ ކުރުމަށް ރަނުގެ ފުރުޞަތެއް ލިވަޕޫލަށް ލިބިފައިވެއެވެ. ލިވަޕޫލްގެ ޕޯޗުގަލް ފޯވާޑް ޑިއެގޯ ޖޮޓާ ބޮލުން ފޮނުވައިލި ހަމަލާ ބޯންމައުތުގެ އޭރިއާތެރެއިން އެ ޓީމްގެ އެޑަމް ސްމިތު އަތުގައި ބޯޅަ ޖެހުމުން ރެފްރީ ދިން ޕެނަލްޓީ މުހައްމަދު ސަލާހް ފޮނުވާލުމުން ދިޔައީ ގޯލާ އަމާޒުނުވެ ދަނޑިކައިރިން ބޭރަށެވެ.މި

މެޗުން ބަލިވުމުން މިވަގުތު ލިވަޕޫލް އޮތީ ޕޮއިންޓް ތާވަލުގެ ފަސްވަނާގައެވެ. އެ ޓީމަށް 26 މެޗުން ލިބިފައި ވަނީ 42 ޕޮއިންޓެވެ. ހަތަރުވަނާގައި އޮތް ޓޮޓެންހަމަށް 26 މެޗުން 45 ޕޮއިންޓް ލިބިފައިވާއިރު، މިރޭ ނޮޓިންހަމް ފޮރެސްޓް ބަލިކޮށް ފަރަގު ބޮޑު ކުރުމުގެ ފުރުޞަތު ޓޮޓެންހަމަށް އެބައޮތެވެ.

މި މެޗު ފެށިއިރު ތާވަލުގެ ފުލުގައި އޮތް ބޯންމައުތަށް މި މެޗުން ލިބުނު ތިން ޕޮއިންޓާއިއެކު 26 މެޗުން  24 ޕޮއިންޓް ހަމަކޮށް ރެލިގޭޝަން ޒޯނުން ބޭރުވެ ތާވަލުގެ 17 ވަނައަށް ކުރިއަށް ޖެހިލައިފައެވެ.