އިނގިރޭސި ޕްރިމިއާ ލީގުގައި މިރޭ އެއްވަނައިގައި އޮތް އާސެނަލް ފަސޭހަކަމާއި އެކު މޮޅުވި އިރު ގަދަ ހަތަރަކަށް ވާދަކުރަމުން އަންނަ މެންޗެސްޓަރ ޔުނައިޓެޑަށް މިރޭ މުހިންމު ދެ ޕޮއިންޓް ގެއްލިއްޖެއެވެ.

އާސެނަލް ރަށުން ބޭރުގައި ފުލަމް އާއި ވާދަކޮށް 3-0 ގެ ނަތީޖާއަކުން މޮޅުވިއިރު، އަމިއްލަ ދަނޑުގައި ސައުތެމްޓަން އަތުން މެންޗެސްޓަރ ޔުނައިޓެޑަށް ހޯދުނީ 0-0 ގެ ނަތީޖާއެކެވެ.

ފުލަމްގެ ދަނޑުގައި މިރޭ ކުޅެވުނު މެޗުގެ ފުރަތަަމަ ހާފުގެ 17 ވަނަ މިނެޓުގައި އެޓީމުގެ އެމެރިކާ ޑިފެންޑަރު އެންޓޮނީ ރޮބިންސަން އަތުން ބައިކޮޅަށް ގޯލެއް ވަނެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެ ހަމަލާ އުފެއްދި އިރު އާސެނަލްގެ ކުޅުންތެރިއަކު އޮފްސައިޑް މަގާމެއްގައި ހުރުމުން އެއީ އޮފްސައިޑް ލަނޑެއް ކަމަށެވެ.

Advertisement

ނަމަވެސް އޭގެ ތިން މިނެޓު ފަހުން އާސެނަލް އިން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު އެޓީމަށް ކާމިޔާބުކޮށްދިނީ ބްރެޒިލްގެ ޑިފެންޑަރު ގެބްރިއަލް އެވެ. އަދި އޭގެ ފަސް މިނެޓު ފަހުން އެޓީމުގެ ބްރެޒިލް ފޯވާޑް ގެބްރިއަލް މާޓިނެލް ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

އާސެނަލްގެ ތިންވަނަ ލަނޑު ފުރަތަަމަ ހާފުގެ އިތުރު ވަގުތުގައި ކާމިޔާބުކޮށްދިނީ އެޓީމުގެ ކެޕްޓަން ނޯވޭގެ ޒުވާން މިޑްފިލްޑަރު މާޓިން އޮޑެގާޑް އެވެ. އަދި މި ތިން ލަނޑުޖެހުމަށް ފުރުސަތު ތަނަވަސް ކޮށްދިނުމުގެ ޖެނުއަރީ ޓްރާންސްފާ މާކެޓްގައި އެޓީމާއި ގުޅުނު ބެލްޖިއަމްގެ މިޑްފީލްޑަރު ލިއަންޑްރޯ ޓްރޮސާޑް އެވެ.

ދެވަަނަ ހާފުގައި ފުލަމް އިން ކުޅުން ރަނގަޅުކޮށް އާސެނަލްގެ ގޯލަށް ނުރައްކާތެރި ދެތިން ހަމަލާއެއް ފޮނުވާލި ނަމަވެސް މި މެޗުގައި އެޓީމަށް އާސެނަލްގެ ގޯލު ފޫއަޅުވާލެވޭ ގޮތެއްނުވިއެވެ. 

މެންޗެސްޓަރ ޔުނައިޓެޑުގެ ދަނޑުގައި މިރޭ ސައުތެމްޓަން އާއި ދެކޮޅަށް އެޓީމު ކުޅުނު މެޗުގެ ފުރަތަަމަ ހާފުގެ 34 ވަނަ މިނެޓުގައި އެޓީމުގެ ބްރެޒިލް މިޑްފީލްޑަރު ކަސަމީރޯ ދެއްކި ރަތް ކާޑާއެކު މެޗުގެ ބޮޑުބައި އެޓީމުން ފުރިހަމަކުރީ 10 ކުޅުންތެރިންނާއި އެކުގައެވެ. މި މެޗުގައި ދެޓީމަށް ވެސް ލަނޑުޖަހާނެ ރަގަޅު ފުރުސަތުތަކެއްލިބި ބޭނުން ނުކުރެވިފައިވާއިރު މި މެޗު އެއްވަރުވުމުން ދެވަނައިގައި އޮތް މެންޗެސްޓަރ ސިޓީއާއި ޔުނައިޓެޑާއި ދެމެދުގައި އޮތް ފަރަގު ވަނީ 9 ޕޮއިންޓަށް ފުޅާވެފައެވެ.

ޕްރިމިއާ ލީގު ތާވަލުގެ އެއްވަނައިގައި އޮތް އާސެނަލްއަށް މިރޭގެ މެޗުން ލިބުނު ތިން ޕޮއިންޓާއެކު 27 މެޗުން އެޓީމަށް ވަނީ 66 ޕޮއިންޓް ލިބިފައެވެ. އާސެނަލް އަތުން ބަލިވި ފުލަމްއަށް 27 މެޗުން ލިބުނު 39 ޕޮއިންޓާއެކު އެޓީމު އޮތީ ލީގު ތާވަލްގެ 8 ވަނައިގައެވެ.

މިރޭގެ މެޗުން ލިބުނު އެއް ޕޮއިންޓާއެކު 26 މެޗުން މެންޗެސްޓަރ ޔުނައިޓެޑަށް 50 ޕޮއިންޓް ލިބިފައިވާއިރު މިވަގުތު އެޓީމު އޮތީ ލީގު ތާވަލްގެ ތިން ވަނައިގައެވެ. އަދި ލީގު ތާވަލުގެ ފުލުގައި އޮތް ސައުތެމްޓަންއަށް މިރޭގެ މެޗުން ލިބުނު އެއް ޕޮއިންޓާއެކު 26 މެޗުން އެޓީމަށް ލިބިފައިވަނީ 22 ޕޮއިންޓެވެ.