ރާއްޖޭގައި ބާއްވާ އިންތިހާބުތަކަށް ސަރުކާރުން ނުފޫޒު ފޯރުވަމުންދާތީ އިންތިހާބުތައް އިންސާފުވެރި ކުރުމަށާއި މިނިވަން ކުރުމަށް ވެފައިވާ ވައުދާ އެއްގޮތަށް ސަރުކާރުން ކަންކަން ތަންފީޒުކޮށް މަގުފަހި ކުރަން ގޮވާލައި ރައްޔިތުންގެ މަޖިލީހަށް ޤަރާރެއް ހުށަހަޅައިފިއެވެ.

މި ގަރާރު ހުށަހަޅުއްވާފައި ވަނީ ރައްޔިތުންގެ މަޖިލީހުގެ މާފަންނު އުތުރު ދާއިރާގެ އެމްޑީޕީ މެންބަރު އިމްތިޔާޒު ފަހުމީ (އިންތި) އެވެ. 

އިންތި ހުށަހެޅުއްވި ޤަރާރުގައި ވަނީ އިންތިހާބުތަކަށް ސަރުކާރުން ނުފޫޒު ފޯރުވަމުން ދިއުމާ މެދުގައި އާންމު ރައްޔިތުންނާއި ސިޔާސީ ޕާޓީތަކުންނާއި މަދަނީ ޖަމިއްޔާތަކުން މިހާތަނަށް ފާޅުކޮށްފައިވާ ކަންބޮޑުވުންތަކަށް އިތުބާރު ކުރުވަނިވި ހައްލެއް ހޯދިފައި ނުވާތީ އިންތިހާބުތައް އިންސާފުވެރި ކުރުވުމަށާއި މިނިވަން ކުރުމަށް ވެފައިވާ ވައުދާ އެއްގޮތަށް ސަރުކާރުން ކަންކަން ތަންފީޒުކޮށް މަގުފަހި ކުރުމަށް ގޮވާލައިފައެވެ.

އަދި ޑިމޮކްރަސީގެ މައިގަނޑު އެއް އަސާސަކީ މިނިވަން، އިންސާފުވެރި، ހާމަކަން ބޮޑު އަދި އިތުބާރު ކުރުވަނިވި އިންތިހާބު ބޭއްވުމަށް ޖާގަ ކަށަވަރުވެފައި އޮތުން ކަމަށްވުމާއި ގާނޫނުއަސާސީގެ 26 ވަނަ މާއްދާ އިން ވޯޓު ދިނުމުގެ ހައްގާއި އިންތިހާބުތަކަށް ކުރިމަތިލުމުގެ ހައްގުގެ ކަށަވަރުކަން ދީފައިވުމުން އެއީ މިނިވަން އަދި އިންސާފުވެރިކޮށް ހިނގާ ޕްރޮސެސްއަކަށް ވާން ޖެހޭނެ ކަމަށް އެ ގަރާރުގައިވެއެވެ.

އެ ޤަރާރުގައި އިތުރަށް ބުނެފައިވަނީ 2018 ވަނަ އަހަރު އެމްޑީޕީ ވެރިކަމަށް އައުމަށް އިންތިޚާބުތައް އިންސާފުވެރިކުރުމާއެކު މިނިވަން އިންތިޚާބުތައް ކަށަވަރުކޮށްދިނުމަށް ވެފައިވާ ވައުދާ އެއްގޮތަށް ސަރުކާރުން އެ ވައުދު ތަންފީޒުކުރަމުންދާތައް ނުފެންނަ ކަމަށެވެ. އަދި އެކަމުގައި ސަރުކާރުން ސާފު ސިޔާސަތެއް ގެންގުޅޭކަން އެނގެން ނެތްކަމަށާއި، އިންތިޚާބުތަކަށް ނުފޫޒު ފޯރުވާކަމުގެ ތުހުމަތު ބޮޑުވައިވާ ކަމަށެވެ.

އެގޮތުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ސަރުކާރުގެ އިސްވެރިން ވާދަކުރައްވާ އިންތިޚާބުތަކުގައި ސަރުކާރުގެ ރަސްމީ ކަންކަމުގެ ދަތުރުތަކާ އެއްކޮށްލައިގެން ކެމްޕެއިން ދަތުރުތައް ކުރަމުންދާކަމަށާ، އެފަދައިން ރަސްމީ ދަތުރާއި ކެމްޕެއިން ދަތުރުތައް އެއްކޮށްލައިގެން ކުރަނީ ދައުލަތުގެ ފައިސާއާއި ވަސީލަތްތަކާއި މުވައްޒަފުން ކެމްޕޭނުގައި އޮޅުވާލައިގެން ބޭނުންކުރުމަށް ކަމުގައި ދެކެވަޑައިގަންނަވާ ކަމަށްވެސް އިންތިގެ ގަރާރުގައި ވެއެވެ. އަދި އެއީ އިންތިޚާބަށް ނާޖާއިޒު ނުފޫޒާއި ބާރު ފޯރުވުންކަމަށްވެސް ބަޔާންކޮށްފައިވެއެވެ.

ހަމައެހެންމެ އިންތިހާބުތަކުގައި ސަރުކާރާއި ސަރުކާރުގެ ކުންފުނިތަކަށް ސިޔާސީ މަގާމުތައް އިތުރުކޮށް ވަޒީފާތައް ހުށަހަޅައިގެން އިންތިހާބުތަކަށް ނުފޫޒު ފޯރުވަމުންދާތީ އާއި ސަރުކާރު ބޭނުންވާ ކެންޑިޑޭޓަކަށް ތާއީދުކޮށް ކެމްޕެއިން ކުރުމަށް މަޖްބޫރު ކުރުވުމާއި އެގޮތަށް އެކަން ނުކޮށްފި ނަމަ، ސަރުކާރުގެ ސިޔާސީ ވަޒީފާގައި ދެމިނުހުރެވޭނެ ކަމުގެ އިންޒާރު ދެމުން އަންނަ ކަމަށް ވެސް އިންތި ވިދާޅުވިއެވެ.

އަދި އިންތިޚާބުތަކުގެ ތެރޭގައި ސަރުކާރުން އަންނަނީ މަޝްރޫޢުތަކާއި އެސްއެމްއީ ލޯނުތައް އިއުލާނުކޮށް ސަރުކާރުން ތާއީދުނުކުރާ ކެންޑިޑޭޓަށް ވޯޓު ނުދީފިނަމަ މަޝްރޫޢުތައް ހުއްޓައިލާނެކަމުގެ މޭރުމަކުން ސަރުކާރުން ވާހަކަދައްކައި އިންޒާރުދެމުންދާ ކަމަށްވެސް އެ ގަރާރުގައި ބުނެފައިވެއެވެ.

މިއާއެކު، ދައުލަތުގެ ބްރޯޑްކާސްޓް ކުރާ ފަރާތްތަކުން ކެންޑިޑޭޓުންގެ މެދުގައި ހަމަހަމަ ފުރުސަތު ނުދީ، ސަރުކާރުން ތާއީދު ކުރާ ކެންޑިޑޭޓަށް ފާޅުކަން ބޮޑު ގޮތެއްގައި ކެމްޕެއިންކޮށްދީ އިންތިހާބުތަކަށް ނާޖައިޒު ނުފޫޒާއި ބާރު ފޯރުވަމުންދާތީ ސަރުކާރުން އިންތިހާބުތަކަށް ނާޖައިޒު ނުފޫޒު ފޯރުވުން ހުއްޓުވުމަށް ގަރާރުގައި ވަނީ ގޮވާލައިފައެވެ.

އަދި އިންތިޚާބުތަކަށް ނާޖާއިޒު ބާރާއި ނުފޫޒު ފޯރުވުން ހުއްޓައިލުމާއެކު، އިންތިޚާބުތައް އިންސާފުވެރިކޮށް މިނިވަންކުރުމަށް އެމްޑީޕީން ވެފައިވާ ވައުދާ އެއްގޮތަށް ސަރުކާރުން ކަންކަން ތަންފީޒުކުރުމަށް އެ ޤަރާރުގައި ގޮވާލާފައިވެއެވެ.