ވ. އާރަށުގެ މުއާމަލާތާއި ގުޅިގެން ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ދައުލަތުން އުފުލި ދައުވާތައް ސާބިތުވާކަމަށް ކަނޑައަޅާ އެމަނިކުފާނުގެ މައްޗަށް އިއްވި ހުކުމުގައި 53 މިލިއަން ރުފިޔާ 6 މަސް ދުވަސްތެރޭ ދައުލަތަށް ދައްކަން ކްރިމިނަލް ކޯޓުން ކުރި އަމުުރު، އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފި އެވެ. 

އެ ފައިސާ ދައުލަތަށް ދެއްކުމަށް ކްރިމިނަލް ކޯޓުން ރައީސް ޔާމިންގެ މައްޗަށް އަމުރުކޮށްފައިވަނީ ފެބުރުއަރީ މަހުގެ 26 ގަ އެވެ. 

ޓެރަރިޒަމަށް ފައިނޭންސް ކުރުމުގެ ގާނޫނުގެ ދަށުން ދައުލަތުން އެދުނީ ލޯންޑާކުރި އެއް މިލިއަން ޑޮލަރުގެ އިތުރުން އެ ފައިސާއަށް އެއްކޮށްފައިވާ 2.4 މިލިއަން ޑޮލަރާއި އަދި އޭގެއިން އިންވެސްޓްކޮށްގެން ލިބުނު ފައިދާ ދައުލަތަށް ނެގުމަށެވެ.

އާރަށް ކުއްޔަށް ދިނުމުގެ މުގާބިލުގައި އެއް މިލިއަން ޑޮލަރު ގަބޫލުކޮށް، އެ ފައިސާ އެމަނިކުފާނުގެ ނަމުގައި އެޗްއެސްބީސީ، ބެންކް އޮފް މޯލްޑިވްސް އަދި މޯލްޑިވްސް އިސްލާމިކް ބޭންކުގައި ހުޅުވާފައިވާ އެކައިންޓްތަކަށް ޖަމާކޮށްފައިވާކަމަށް ކްރިމިނަލް ކޯޓުން ވަނީ ބުނެފައެވެ.

އަދި އެ އެކައުންޓްތަކުގައި ހުރި އިތުރު ފައިސާއާއެކު ޖުމްލަ 3.4 މިލިއަން ޑޮލަރު އެމްއައިބީ އެކައުންޓަށް ޖަމާކޮށް 36 މަސް ދުވަހުގެ ތެރޭގައި އިންވެސްޓްކޮށްފައިވާކަމަށްވެސް ބުނެފައިވެއެވެ.

އެކަން ފާހަގަކޮށް ކްރިމިނަލް ކޯޓުން ވަނީ ޖުމްލަ 3.4 މިލިއަން ޑޮލަރު ނުވަތަ 53 މިލިއަން ރުދިޔާ ހަ މަސް ދުވަހުގެ ތެރޭގައި ދައުލަތަށް ދައްކާ ހަލާސް ކުރަން އަމުރުކޮށްފަ އެވެ.  

އެހެން ނަމަވެސް، ޝަރުއީ 3 މަރުހަލާ ނިމުމުގެ ކުރިން އެ ފައިސާ ދައްކަން ނުޖެހޭނެކަމަށް ރައީސް ޔާމީންގެ ގާނޫނީ ޓީމުން ވަނީ ވިދާޅުވެފަ އެވެ. އަދި އެ މައްސަލަ މިހާރު ވަނީ އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފަ އެވެ. އެ މައްސަލަ އެމަނިކުފާނުގެ ފަރާތްޕުޅުން ހައިކޯޓަށް ހުށައެޅީ އިއްޔެކަމަށް އެބޭފުޅުން ވަނީ ވިދާޅުވެފަ އެވެ. 

ވ. އާރަށުގެ މައްސަލައިގައި ރައީސް ޔާމިންގެ މައްޗަށް 11 އަހަރުގެ ޖަލު ހުކުމެއް ކްރިމިނަލް ކޯޓުން ކޮށްފައިވަނީ މިދިޔަ އަހަރުގެ ޑިސެމްބަރު މަހުގައެވެ. އެ ހުކުންވެސް މިހާރު ވަނީ އެމަނިކުފާނުގެ ފަރާތްޕުޅުން ވަނީ އެ މައްސަލަ ހައިކޯޓުގައި އިސްތިއުނާފުކޮށްފަ އެވެ.