މޯލްޑިވްސް ސްޕޯޓްސް އެވޯޑްސް 2023 ގައި ބައިވެރިވުމަށް އިނގިރޭސި ގައުމީ ޓީމުގެ ކުރީގެ ގޯލްކީޕަރު ޑޭވިޑް ޖޭމްސް ރާއްޖެ އަތުވެއްޖެއެވެ.

އެވޯޑް ނައިޓުގައި ބައިވެރިވުމަށް މިއަދު ހެނދުނު ޖޭމްސް ރާއްޖެ އައުމާއެކު ވެލާނާ އިންޓަނޭޝަލަ އެއާޕޯޓުން އޭނާއަށް ވަނީ ހޫނު މަރުހަބާއެއް ކިޔައިފައެވެ.

1995 ވަނަ އަހަރު ލިވަޕޫލާއެކު ލީގު ކަޕް ކާމިޔާބުކުރުމުގެ އިތުރުން 2008 ވަނަ އަހަރު ޕޯޓްސްމައުތާއެކު އެފްއޭ ކަޕް ކާމިޔާބުކޮށްފައިވާ ޖޭމްސް ވަނީ 2000 ވަނަ އަހަރު އެސްޓަން ވިލާ، 1996 ވަނަ އަހަރު ލިވަޕޫލް އަދި 2010 ވަނަ އަހަރު ޕޯޓްސްމައުތާއެކު އެފްއޭ ކަޕްގެ ރަނަރަޕް މެޑަލް ހޯދާފައެވެ.

2010 ވަނަ އަހަރު އުމުރުން 39 އަހަރުގައި ޕޯޓްސްމައުތާއެކު އެފްއޭ ކަޕް ފައިނަލުގައި ކުޅުނު ޖޭމްސް އަކީ ދުނިޔޭގެ އެންމެ ގިނަ ދުވަސްވި ފުޓްބޯޅަ މުބާރާތުގެ ފައިނަލުގައި ބައިވެރިވި އެންމެ ދުވަސްވީ ގޯލްކީޕަރަށެވެ.

ސްކައިސްޕޯޓްސްގެ އެނަލިސްޓެއްގެ ގޮތުގައި މިހާރު މަސައްކަތް ކުރަމުން އަންނަ ޖޭމްސް އޭނާގެ ފުޓުބޯޅަ ކެރިއަރު 1988 ވަނަ އަހަރު ފެށީ އިނގިރޭސި ކުލަބު ވަޓްފޯޑުންނެވެ. އަދި 1992 ވަނަ އަހަރު އޭނާވަނީ އިގިރޭސިވިލާތުގެ އެންމެ ކާމިޔާބު އެއް ކުލަބު ކަމަށްވާ ލިވަޕޫލްއަށް ބަދަލުވެފައެވެ. މީގެ އިތުރުން އެސްޓަން ވިލާ, މެންޗެސްޓާ ސިޓީގެ އިތުރުން ޕްރެމިއާ ލީގުގެ ޕޯޓްސް މައުތަށް ކުޅެފައިވާ ޖޭމްސް 2010 ވަނަ އަހަރު ޕްރެމިއާ ލީގުދޫކޮށް ޗެމްޕިއަންޝިޕް ކުލަބު ބްރިސްޓަލް ސިޓީއަށް ބަދަލުވި އެވެ.

އަދި ކެރިއަރުގައި ފަހުބައިގައި ބޯންމައުތުގެ އިތުރުން އައިސްލޭންޑުގެ ކުލަބެއްކަމަށްވާ އައިބީވީ އަށާއި އިންޑިއާގެ ކެރެލާ ބްލާސްޓާސްއަށް ވެސް ޖޭމްސް ވަނީ ކުޅެފައެވެ.

2010 ވަނަ އަހަރުގެ ވޯލްޑް ކަޕް ފުޓްބޯޅަ މުބާރާތުގައި އިގިރޭސި ޓީމަށް ކުޅުނު ޖޭމްސް ވަނީ ގައުމީ ޓީމަށް 53 މެޗު ކުޅެދީފައެވެ.

މޯލްޑިވްސް ސްޕޯޓްސް އެވޯޑްސް 2023 އަށް ޖޭމްސްއާއެކު ޕެރަލިމްޕިކް ރަން މެޑަލް އެތުލީޓު މާލޯ ވެން ރީންއާއި ކުރީގެ މަޝްހޫރު ކުރިކެޓު ކުޅުންތެރިޔާ ބްރިއަން ލާރާއާއި ފުޓުބޯޅައިގެ ތާރީހުގައި ބެލެންޑޯ ހޯދި ހަމައެކަނި ޑިފެންޑަރު ފަބިއޯ ކަންނަވާރޯ ވެސް ބައިވެރިވާނެއެވެ.