ޔުއެފާ ޗެމްޕިއަންސްލީގުގެ ދެވަަނަ ބުރުގެ ދެވަަނަ ލެގުގައި މިރޭ އަމިއްލަ ދަނޑުގައި އާރުބީ ލައިޕްޒިގް ބަލިކޮށް މުބާރާތުގެ ކުއާޓާ ފައިނަލުން މެންޗެސްޓަރ ސިޓީ ޖާގަ ހޯދައިފިއެވެ. 

ސިޓީގެ އިއްތިހާދު ސްޓޭޑިއަމްގައި މިރޭ ކުޅެވުނު މެޗު އެޓީމުން ކާމިޔާބުކުރީ 7-0 ގެ ތަފާތުބޮޑު ނަތީޖާއަކުންނެވެ.

މިދެޓީމު ލައިޕްޒިގް ގެ ދަނޑުގައި ކުޅުނު ފުރަތަަމަ ލެގުގެ މެޗު 1-1 އެއްވަރު ވެފައި އޮތުމުން މިރޭގެ މެޗު މެންޗެސްޓަރ ސިޓީއިން ފެށީވެސް ވަރަށް ވަރުގަދަކޮށެވެ.

މިރޭގެ މެޗުގައި ސިޓީގެ ފުރަތަަމަ ލަނޑު ފުރަތަަމަ ހާފުގެ 22 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ ނޯވޭގެ ފޯވާޑް ހާލަންޑް އެވެ. އަދި އޭގެ ދެ މިނެޓު ފަހުން އެޓީމުގެ ބެލްޖިއަމް މިޑްފީލްޑަރު ކެވިން ޑިބްރޭނާ ތަނަވަސްކޮށްދިން ފުރުސަތެއްގައި ހާލަންޑް ވަނީ އިތުރު ލަނޑެއް ކާމިޔާބުކޮށް އެޓީމަށް ލީޑު ފުޅާކޮށްދީފައެވެ. އަދި ފުރަތަަމަ ހާފުގެ އިތުރު ވަގުތުގައި ލައިޕްޒިގް ގެ ފަހަތުން ހެނދުނު ގޯހެއްގެ ފައިދާ ނަގައި ހާލަންޑް ވަނީ މި މެޗުގައި އޭނާގެ ހެޓްރިކް ފުރިހަމަކޮށްފައެވެ.

ދެވަަނަ ހާފު ފެށިގެން ހަތަރު ވަނަ މިނެޓުގައި ސިޓީގެ ހަތަރު ވަނަ ލަނޑު ގުންޑޮގާން ކާމިޔާބުކޮށްދިން އިރު އެޓީމުގެ ފަސްވަނަ ލަނޑާއި ހަވަނަ ލަނޑު ކާމިޔާބުކޮށްދިނީ ހާލަންޑް ވަނީ ޗެމްޕިއަންސްލީގުގެ ތާރީޚްގައި އެއް މެޗެއްގައި އެންމެ ގިނަ ލަނޑުޖެހި ބުރެޒިލްގޭ ލުއިސް އެޑްރިއާނޯ އާއި މެސީގެ ރެކޯޑާއި އަރާ ހަމަކޮށްފައެވެ.

މިރޭގެ މެޗުގައި ކާމިޔާބުކުރި ފަސް ލަނޑާއި އެކު މިސީޒަނުގައި ޗެމްޕިއަންސްލީގުގައި ކުޅުނު ހަ މެޗުގައި ހާލަންޑް ވަނީ 10 ލަނޑު ކާމިޔާބުކޮށްފައެވެ. މީގެ އިތުރުން ހާލަންޑް ޗެމްޕިއަންސްލީގުގައި މިހާތަނަށް ކުޅުނު 25 މެޗުގައި އޭނާ ކާމިޔާބުކޮށްދިން ލަނޑުގެ އަދަދު ވަނީ 33 އަށް އަރާފައެވެ.

މިރޭގެ މެޗުގައި މެންޗެސްޓަރ ސިޓީއިން ކާމިޔާބުކުރި 7 ވަނަ ލަނޑު ދެވަނަ ހާފުގެ އިތުރު ވަގުތުގައި ކާމިޔާބުކޮށްދިނީ ބެލްޖިއަމްގެ މިޑްފީލްޑަރު ކެވިން ޑިބްރޭނާ އެވެ.