ސަރުކާރުގެ މަޤާމުތަކުގައި ތިއްބެވި ޖޭޕީގެ ބޭފުޅުން ޖެހޭނީ އިސްތިއުފާ ދޭން ކަމަށް މަކުނުދޫ ދައިރާގެ މެމްބަރު މުހައްމަދު ރާއީ މިއަދުގެ މަޖިލީހުގެ ތަޅުމުގައި ވިދާޅުވެއްޖެއެވެ.
ރައީ ވިދާޅުވީ މިއަދުން މިއަދަށް ޖޭޕީގެ ސްލޮޓްގައި ސަރުކާރުގެ މަޤާމުތަކުގައި ތިއްބެވި ބޭފުޅުން އިސްތިއުފާ ދެއްވަން ޖެހޭކަމަށެވެ. އަދި އިސްތިއުފާ ނުދެއްވައިފިނަމަ ސަރުކާރުގެ ތެރެއިން އެކަން ކުރައްވާނެ ކަމަށް ރާއީ އިންޒާރު ދެއްވިއެވެ.
"މި ހުރިހާ ދުވަހު ސަރުކާރުން ބޮޑު ޕޯޝަނެއް ޖޭޕީއަށް ދީގެން މި ތިބެނީ މިތާ ތިބި މެމްބަރުން އެކަމާ ދެކޮޅަށް އެއްޗެކޭ ނުބުނެ. މިއަދު ރައީސް އަށް ދޯކާދީފައި އެގޮތަކަށް އެކަމެއް ނުކުރެވޭނެ. އަޅުގަނޑުމެން އެކަން ކުރިއަކަށް ނުދޭނަން." ރާއީ ވިދާޅުވިއެވެ.
ލަދުހަޔާތެއް ހުރިއްޔާ ޖޭޕީ ސްލޮޓު ތަކުގައި ތިބި ނުވަތަ މަގާމުތަކުގައި ތިބި މީހުން ޖެހޭނީ އިސްތިއުފާ ދޭން ކަމަށާއި، ރައީސް އަށް ވަފާތެރި ނުވާނަމަ ސަރުކާރުގެ މަގާމުތަކުން އިސްތިއުފާ ދޭން ޖެހޭ ކަމަށް ރާއީ ވިދާޅުވިއެވެ.
މަޖިލީހުގައި ރާއީ މިގޮތަށް ވާހަކަ ދައްކަވައިފައިވާއިރު ސަރުކާރު ކޯލިޝަންގައި އޮތް ޖޭޕީ އިން ވަނީ ކުރިއަށް އޮތް ރިޔާސީ އިންތިޚާބުގައި ވަކިން ވާދަކުރުމަށް ނިންމައި އެކަން އިއްލާނުކޮށްފައެވެ.
މިހާރު އޮތް ސަރުކާރު އައިސްފައިވަނީ އެމްޑީޕީ އާއި ޖޭޕީ ޢަދާލަތު އަދި އެމްއާރްއެމް ގެ ކޯލިޝަންގެ ދަށުންނެވެ. އިންތިޚާބު ގާތް ވަމުން އަންނައިރު ޖޭޕީ އިން މިވަނީ ކޯލިޝަނާއި ވަކިވެ ވާދަކުރުމަށް ނިންމާފައެވެ.
Advertisement
This content is created and paid for by advertisers and does not involve Voice Journalists
