ދިވެހި ސިފައިންގެ ޚިދުމަތުގެ ވަޒީފާއަށް ވަނުމުގެ ފުރުސަތު ހުޅުވާލައިފި އެވެ. 

ސިފައިންގެ ވަޒީފާއަށް ފުރުސަތު ހުޅުވާލާ ޑިފެންސް މިނިސްޓްރީން ނެރުނު އިއުލާނުގައި ބުނެފައިވަނީ ސިފައިންގެ ވަޒީފާއަށް ކުރިމަތިލެވޭނީ އުމުރުން 18 އަހަރު ފުރި 25 އަހަރު ނުފުރޭ ދިވެހިންނަށް ކަމަށެވެ. 

އެމީހުންގެ ކިބައިގައި ދަށްވެގެން ޖީސީއީ އޯ ލެވެލް ފެންވަރު ހުރުން ނުވަތަ އެ ފެންވަރުގެ ވޮކޭޝަނަލް ސެޓްފިކެޓެއް އޮތުމާއެކު ވަޒީފާ އަދާކުރެވޭފަދަ ސިއްހަތެއްގައ ހުރި މީހަކަށް ވާންވާނެ އެވެ.

Advertisement

އޭގެ އިތުރުން ވޭތުވެދިޔަ ފަސް އަހަރު ދުވަހުގެ ތެރޭގައި ކުށުގެ ރެކޯޑެއް އޮތް މީހަކު ކަމުގައި ނުވުމާއި، ފިރިހެނުން އިސްކޮޅުގައި 5 ފޫޓް 5 އިންޗި ހުރުމާއި، އަންހެނުންގެ އިސްކޮޅުގައި 5 ފޫޓް 3 އިންޗި ފުރިހަމަވުން ޝަރުތުތަކުގެ ތެރޭގައި ހިމެނެ އެވެ. އަދި އެއްވެސް ސިޔާސީ ޕާޓީއެއްގެ މެންބަރެއްކަމުގައި ނުވުން ވެސް ހިމެނެ އެވެ.

ސިފައިންގެ ޚިދުމަތަށް ވަނުމަށް އެދި ފޯމު ހުށައެޅުމުގެ ސުންގަނޑިއެއްކަމަށް އެ އިއުލާނުގައި ބުނެފައިވަނީ އަންނަ މަހުގެ 16 އާއި ހަމަޔަށެވެ. 

ސިފައިންގެ ވަޒީފާއަށް އެދޭ ފޯމު ޑިފެންސް މިނިސްޓްރީގެ ވެބްސައިޓުން އަދި އެމްއެންޑީއެފްގެ ވެބްސައިޓުން ޑައުންލޯޑް ކުރެވެން ހުންނާނެކަމާއި ވަޒީފާއަށް އެދޭ ފޯމާއެކު ޕޮލިސް ރިޕޯޓް ހުށަހަޅަން ޖެހޭނެކަމަށް މިނިސްޓްރީން ވަނީ ބުނެފަ އެވެ.