ކުރިއަށް އޮތް ރިޔާސީ އިންތިޚާބުގައި ކޯލިޝަން ހެދުމާގުޅޭ ގޮތުން މޯލްޑިވްސް ރިފޯމް މޫވްމަންޓް (އެމްއާރްއެމް) ގެ ޒައީމް ކުރީގެ ރައީސް އަލްއުސްތާޒު މައުމޫން ޢަބްދުލްޤައްޔޫމާއި, އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙާ ދެ ބޭފުޅުން މިއަދު މަޝްވަރާ ކުރައްވައިފިއެވެ.

ރިޔާސީ އިންތިހާބުގައި ރައީސް ސޯލިހާއެކު ކޯލިޝަން ހެދުމަށް އެދި މިހާރުގެ ސަރުކާރުގެ ކޯލިޝަންގައި ހިމެނޭ އަދާލަތު ޕާޓީ އާއި، ޖުމްހޫރީ ޕާޓީ އާއި އެމްއާރްއެމް އަށްވެސް ރައީސް ޞާލިހު ވަނީ ސިޓީއެއް ފޮނުއްވާފައެވެ. އެ ސިޓީއާއި ގުޅިގެން ވަކި ގޮތެއް ނުނިންމާ މިހާރު އޮތީ އެމްއާރްއެމުން އެކަންޏެވެ.

އެމްއާރްއެމް އިން ގޮތެއް ނިންމުން ލަސްވީ ޕާޓީގެ ޒައީމް، މައުމޫން އަބްދުލްގައްޔޫމް ރާއްޖެއިން ބޭރުގައި ހުންނެވުމުންނެވެ. އެ ޕާޓީން އޭރު ބުނީ މައުމޫން މާލެ ވަޑައިގަތުމުން ގޮތް ނިންމަވާނެ ކަމަށެވެ. އެމަނިކުފާނު ރާއްޖެ ވަޑައިގެންފައިވަނީ މީގެ ދެތީން ދުވަސް ކުރީންނެވެ. 

އެމްއާރްއެމްއިން ގޮތެއް ނުނިންމައިގެން ސަރުކާރަށް ތާއީދު ކުރައްވާ ބައެއް އެމްޑީޕީގެ މެންބަރުން ވެސް ނުރުހުން ފާޅުކުރައްވާފައި ވަނިކޮށް ކޯލިޝަން ހެދުމާއި ގުޅޭ މަޝްވަރާތައް ކުރުމަށް މިއަދު މެންދުރުގެ ވަގުތެއްގައި ރައީސް ޞާލިހާއި އެކު އެމްއާރްއެމްގެ އިސް ބޭފުޅުން ވަނީ ބައްދަލު ކުރައްވާފަ އެވެ. 

އެ ބައްދަލްވުމުގައި އެމްއާރްއެމް ގެ ފަރާތުން އެ ޕާޓީގެ ޒަޢީމް ރައީސް މައުމޫނާއި އެމްއާރްއެމްގެ ރައީސް ފާރިސް މައުމޫނާއި އެ ޕާޓީގެ ނާއިބު ރައީސް އާާއި ސެކްރެޓަރީ ޖެނެރަލް އަބްދުލްއަލީ ބައިވެރިވެވަޑައިގެންނެވި އެވެ. އަދި އެމްޑީޕީގެ ރައީސް ޞާލިހުގެ އިތުރުން އެޕާޓީގެ ޗެއާޕާސަން ފައްޔާޟް އިސްމާއިލް ވެސް ބައިވެރިވެ ވަޑައިގެންނެވި އެވެ. 

އެ ބައްދަލްވުމަށް ފަހު އެމްއާރްއެމް އިން ބުނީ ކޯލިޝަން ހެދުމާއި މެދު ވަކި ގޮތެއް ނުނިންމާ ކަމަށެވެ. އަދި އެމްއާރްއެމްގެ ލީޑާޝިޕާއި ރައީސް ސޯލިހްގެ މަންދޫބުންގެ މަޝްވަރާތައް ކުރިއަށް ގެންދިއުމަށް އެއްބަސް ވެވިފައިވާ ކަމަށެވެ.

އަދުގެ ސަރުކާރުގެ ކޯލިޝަންގައި ހިމެނޭ ޕާޓީ ތަކުގެ ތެރެއިން އަދާލަތު ޕާޓީން ސަރުކާރާއި ގުޅެން ނިންމާފައިވާއިރު، ޖޭޕީން ނިންމީ އެ ޕާޓީގެ ފަރާތުން ކެންޑިޑޭޓެއް ނެރުމަށެވެ. އަދި ރައީސް ޞާލިހާއިއެކު ކޯލިޝަން ހެދުމަށް މަޝްވަރާ ކުރެވުނު އެމްޑީއޭ އިން ވަނީ އެމްޑީޕީއާއި އެކު ކޯލިޝަން ހެދުމަށް ނިންމާފައެވެ.