ތައުލީމު ހަސީލު ކުރާ ދަރިވަރުންނަށް، މޫނު ބުރުގާ ނަގަން އެންގުމަކީ ކުރެވޭނެ ކަމެއް ނޫންކަމަށާ، މޫނު ބުރުގާގެ ސަބަބުން އެ ދަރިވަރުން ތަޢުލީމުން މަހްރޫމް ނުކުރެވޭނެ ކަން ދިވެހި ރާއްޖޭގެ ހައިކޯޓުން މީގެ ކުރިން ނިންމާފައިވާ ކަމަށް ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ވިދާޅުވެއްޖެއެވެ. 

ރާއްޖޭގައި އަރަބި އިސްލާމީ ތައުލީމަށް ހާއްސަ ކޮށްފައި އަލްމަދްރަސަތުލް އަރަބިއްޔަތުލް އިސްލާމިއްޔާގެ ދަރިވަރުންގެ ތެރެއިން މޫނުބުރުގާ އަޅާ ދަރިވަރުން މޫނު ނެގުމަށް އެޑިއުކޭޝަނުން އެންގި އެންގުން އެެ ސުކޫލުން ތަންފީޒު ކުރަން ފެށުމާއި ގުޅިގެން އާޒިމާ ފޭސްބުކް ގައި ހިއްސާ ކޮށްފައިވާ ޕޯސްޓެއްގައި ވިދާޅުވީ ދިވެހިރާއްޖޭގެ ގާނޫނު އަސާސީގައިވާ ގޮތުން ތަޢުލީމަކީ އުނި ނުކުރެވޭނެ ހައްގެއް ކަމަށެވެ. 

"އެކަން (މޫނު ބުރުގާ އަޅާ ދަރިވަރުންނަށް މޫނު ނަގަން އެންގުން) އެގޮތަށް ނުކުރެވޭނެކަން ރާއްޖޭގެ ހައިކޯޓުންވެސް މީގެ ކުރިން އޮތީ ނިންމާފައި. ސަބަބަކީ، ތަޢުލީމަކީ އުނި ނުކުރެވޭނެ ހައްގެއް ކަމުގައި ވުން." އާޒިމާ ޝަކޫރު ވިދާޅުވިއެވެ. 

ތަޢުލީމްގެ ގާނޫނު 

އާޒިމާ އެ އިޝާރާތް ކުރައްވަނީ 2011 ވަނަ އަހަރު، އެމްޑީޕީގެ ކުރީގެ ރައީސް މުހައްމަދު ނަޝީދު ގެ ވެރިކަމުގައި ކުއްލިއްޔާގެ ދަރިވަރަކު މޫނު ބުރުގާ އަޅާތީ އެ ތަނަށް ވަނުން މަނާކޮށް، މޫނު ބުރުގާ އަޅައިގެން ކިޔަވަން ހާޒިރު ނުވެވޭނެކަމަށް ދައުލަތުން ބުނި މައްސަލައާ ގުޅިގެން ކޯޓުން ނިންމި ނިންމުމަށެވެ. 

އެ މައްސަލަ ހައިކޯޓްގައި ވަނިކޮށް 2012 ވަނަ އަހަރު ވެރިކަން ބަދަލުވެ ރައީސް ވަހީދުގެ ސަރުކާރުގައި ދައުލަތުގެ ސްޓޭންޑް ބަދަލުކުރި އެވެ. އެފަހަރު ދައުލަތް ތަމްސީލު ކުރަން ކޯޓަށް ވަޑައިގެންނެވީ ބަންޑާރަ ނާއިބުގެ ހައިސިއްޔަތުން އާޒިމާ ޝަކޫރެވެ.

އަދި މޫނު ބުރުގާ އެޅުމަކީ ތައުލީމުން މަހުރޫމް ކުރަން ޖެހޭނެ ސަބަބެއް ނޫން ކަން ހާމަކުރައްވައި، ކޯޓުގައި މައިގަނޑު 3 ނުކުތާއެއް ފާހަގަކުރައްވާފައިވާނެ ކަމަށް އާޒިމާ ވިދާޅުވި އެވެ. އެއީ؛ 

1) ތައުލީމަކީ އުނި ނުކުރެވޭނެ ހައްގެއް ކަމަށާ އެމީހަކު ގަބޫލުކުރާ އަގީދާއެއްގެ ސަބަބުން ތައުލީމު ލިބުން ހަނި ނުކުރެވޭނެ ކަން

2) މޫނު ބުރުގާ ނެގަން އެއްވެސް މީހަކަށް މަޖުބޫރު ކުރުމަކީ ކުރެވޭނެ ކަމެއް ނޫންކަމަށާ، އަހަރެމެންނަށް އެކަން ކަމު ދިޔަޔަސް ނުދިޔަޔަސް އެއީ ގަބޫލު ކުރާ ގަބޫލު ކުރުމެއް ކަން. 

3) އަހަރެމެންގެ އަމިއްލަ ގަބޫލުކުރުންތައް އެހެން މީހުންގެ މައްޗަށް ގަދަކަމުން ތަންފީޒު ކުރުމުން އެދެވޭ ނަތީޖާއެއް ނުނިކުންނާނެ ކަމަށާ، އޭގެ ސަބަބުން މިހާރުވެސް އެކަހެރިވެފައިވާ ފަރާތްތައް އިތުރަށް އެކަހެރިވެގެން ދާނެކަން. މިހާލަތުގައި، އަންހެން ދަރިވަރުން ތައުލީމުން މަހްރޫމް ވެގެން ވެސް ދާނެކަން. 

މިއާއެކު އާޒިމާ ވިދާޅުވީ، ތިމާ ގަބޫލު ކުރާގޮތަށް އެހެން މީހުން ނޫޅުމަކީ އެމީހުން އެކަހެރި ކުރަންވީ ސަބަބެއް ނޫން ކަމަށެވެ. އަދި މިއީ ވިސްނާލަން ޖެހޭނެ ކަމެއް ކަމަށާއި މިފަދަ ކަންކަމުން އެކުދިން އިތުރަށް އެކަހެރިވެ، އަސާސީ ހައްގަކުން މަހްރޫމް ވެގެންދާނެ ކަމަށްވެސް އާޒިމާ ވިދާޅުވި އެވެ. 

"(މޫނުބުރުގާ ނެގުމަށް އެންގުމަށްފަހު) ދެން އެ އަންހެން ކުދިންގެ ފަރާތުން އުއްމީދު ތި ކުރަނީ ކޮންކަމަކަށް؟ މޫނު ބުރުގާ ނަގަންތަ؟ ނޫނި މޫނު ބުރުގާ އަޅައިގެން ގޭގައި ތިބެންތަ؟" އާޒިމާ ސުވާލު ކުރައްވާފައިވެއެވެ.