ދަރިން ގޮވައިގެން އޮފީހަށް ގޮސް ވަޒީފާ އަދާކުރެވޭނެ މާހައުލު ޤާއިމުކުރުމުގެ މަސައްކަތް ސަރުކާރުން ކުރަމުންދާކަމަށް ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
ބައިނަލްޢަޤްވާމީ އަންހެނުންގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ޞާލިހު ވަނީ އަންހެނުންނަށް ވަޒީފާ އަދާކުރުމުގަޔާއި، ވަޒީފާގައި ދެމި ތިބުމަށް އޮތް ހުރަސްތައް ނައްތާލުމަށް ސަރުކާރުން ކުރަމުންދާ މުހިންމު ބައެއް މަސައްކަތްތަކަށް އަލިއަޅުވާލައްވާފަ އެވެ.
އެގޮތުން ވިހެއުމާއި ގުޅިގެން ކޮންމެ މަޔަކަށް 6 މަސް ދުވަހުގެ ޗުއްޓީއެއް އަދި ބަފަޔަކަށް 1 މަސް ދުވަހުގެ ޗުއްޓީ މި ސަރުކާރުން ހަމަޖައްސާދީފައިވާކަން ރައީސް ޞާލިހު ފާހަގަކުރެއްވި އެވެ. އަދި އެ ސިޔާސަތުގެ ތެރެއިން މިހާތަނަށް 4619 މީހަކަށް ވިހެއުމާއި ގުޅިގެން މައިންނާއި ބަފައިންނަށް ދޭ ޗުއްޓީ ދެވިފައިވާކަމަށް ރައީސް ޞާލިހު ވިދާޅުވި އެވެ.
އޭގެ އިތުރުން އެމަނިކުފާނު ވިދާޅުވީ އަންހެނުން ވަޒީފާގައި ދެމިތިބުމަށް އޮތް ހުރަސްތައް ނައްތާލުމުގެ ގޮތުން ދަރިން ގޮވައިގެން އޮފީސްތަކުގައި ތިބެވޭނެ ޖާގަ ހޯދައި ދިނުމުގެ މަސައްކަތް ސަރުކާރުން މިހާރު ފަށައިގެން ކުރިއަށް ގެންދާކަމަށެވެ.
"އަންހެނުން ވަޒީފާގައި ދެމިތިބުމަށް އޮތް ހުރަސްތައް ނައްތާލުމުގެ ގޮތުން ސަރުކާރުގެ އިދާރާތަކާއި އެކި ކުންފުނިތަކުގައި ކުޑަކުދިން ގޮވައިގެން އުޅެވޭނެ ޖާގަ ތަނަވަސްކުރުމުގެ މަސައްކަތް ކުރިއަށް އެބަދޭ"
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
ތުއްތު ކުދިން ބަލަން ޖެހޭ މައިންނަށް ވަޒީފާ އަދާކުރުމުގައި، ނުވަތަ ވަޒީފާގައި ދެމިތިބުމަށް އޮތް އެންމެ ބޮޑު ހުރަހަކީ ގިނަ ވަގުތު ވަޒީފާގައި ހޭދަކުރަން ޖެހޭއިރު ދަރިން ގޮވައިގެން ވަޒީފާ އަދާކުރެވޭނެ މާހައުލެއް ގިނަ މަސައްކަތްކުރާ އޮފީހުގައި ފަހިވެފައި ނެތުމެވެ.
އެހެންކަމުން، ގިނަ ފަހަރަށް އަންހެނުން ވަޒީފާއިން ވަކިވެ ދަރިން ބެލުމުގައި މަޝްއޫލުވާން ޖެހެއެވެ.
މި މައްސަލައަށް ހައްލު ހޯދުމުގެ މަސައްކަތް ސަރުކާރުން ކުރަމުންދާކަން ފާހަގަކުރައްވާ ރައީސް ޞާލިހު އިތުރަށް ވިދާޅުވީ އަންހެނުން ވަޒީފާތަކުގައި ދެމި ތިބުމަށް ބާރު އެޅުމުގެ ގޮތުން "ފެލެކްސިބަލް ވޯކިން އަވާސް" ސަރުކާރުގެ އެކި އެކި އިދާރާތަކުންނާއި ކުންފުނިތަކުން މިހާރުވެސް ދެމުންދާ ކަމަށެވެ.
އަންހެނުންނަކީ ރާއްޖޭގެ އިގްތިޞާދަށް މުހިންމު ބައެއް ކަމަށާއި، ސަރުކާރުން މިހާރު އަމާޒު ހިފާފައިވަނީ ސިޔާސަތުތައް ތަންފީޒު ކުރުމުގައި ފަހުބަސް ބުނާ ފަރާތްތަކަށް، ނުވަތަ ސަރުކާރުގެ މަތީ މަގާމުތައް ތަމްސީލުކުރާ އަންހެނުންގެ އަދަދު އިތުރުކުރުމަށް ކަމަށް ރައީސް ޞާލިހު ވިދާޅުވި އެވެ.
އެއާއެކު އެމަނިކުފާނުވަނީ އެ ސިޔާސަތާއި އެއްގޮތަށް ސަރުކާރުގެ އެކި ވުޒާރާތަކުންނާއި ކުންފުނިތަކުން އަމަލުތައް ބެހެއްޓުމަށް އިލްތިމާސް ކުރައްވާފަ އެވެ.
Advertisement
This content is created and paid for by advertisers and does not involve Voice Journalists
