ރާއްޖޭގައި އަރަބި އިސްލާމީ ތައުލީމަށް ހާއްސަ ކޮށްފައި އަލްމަދްރަސަތުލް އަރަބިއްޔަތުލް އިސްލާމިއްޔާގެ ދަރިވަރުންގެ ތެރެއިން މޫނުބުރުގާ އަޅާ ދަރިވަރުން މޫނު ނެގުމަށް އެޑިއުކޭޝަނުން އެންގި އެންގުން އެެ ސުކޫލުން ތަންފީޒު ކުރަން ފެށުމާއި ގުޅިގެން އެ ސުކޫލުގެ ދަރިވަރުންގެ ބެލެނިވެރިން ކޯޓަށް އެމައްސަލަ ހުށަހަޅާން ނިންމައިފި އެވެ.
އަރަބިއްޔާ ސުކޫލު މިހާރު ހިންގެވުމާއި ހަވާލުވެ ތިބި ވެރީން ވަނީ އެ ސުކޫލުގައި ކިޔަވާ ބައެއް ދަރިވަރުން މޫނު ބުރުގާ އަޅާތީ އެކަމާމެދު އަމަލު ކުރާނެ ގޮތުގެ ލަފައެއް ހޯދަން އެޑިއުކޭޝަން މިނިސްޓްރީގައި އެދިފައެވެ. އެޑިއުކޭޝަނުން އެންގީ މޫނު ބުރުގާ އަޅައިގެން ސުކޫލަށް ހާޒިރު ނުވެވޭނެ ކަމަށެވެ.
އެ އެންގުމާއި ގުޅިގެން ސުކޫލުން މިހާރު ވަނީ މޫނުބުރުގާ އަޅާ ދަރިވަރުންނާއި އެ ދަރިވަރުންގެ ބެލެނިވެރީންނަށް އެއީ މަނާ ކަމެއް ކަން އަންގައި، މޫނުބުރުގާ އަޅައިގެން ސުކޫލަށް ހާޒިރު ނުވެވޭނެ ކަން އަންގާފައެވެ.
އެހެންކަމުން، އެ ދަރިވަރުންނަށް މިހާރު އޮތީ އެންމެ ދެ ގޮތެވެ. މޫނު ބުރުގާ އަޅައިގެން ގޭގައި ތިބުމެވެ. ނުވަތަ ނަގައިގެން ސުކޫލަށް ދިޔުމެވެ. އެކަމާއި ގުޅިގެން ދަރިވަރުންނާއި ބެލެނިވެރިން އަންނަނީ ނުހަނު ކަންބޮޑުވުން ފާޅުކުރަމުންނެވެ.
އެ މައްސަލާގައި އަރަބިއްޔާގެ ބެލެނިވެރިން ބުނީ، އެޑިއުކޭޝަނާއި އަރަބިއްޔާގެ މެނޭޖްމަންޓުން ބެލެނިވެރިންގެ އަޑު ނޭހި ކަމަށެވެ. އެހެންކަމުން އަރަބިއްޔާގެ ބެލެނިވެރިން ނިންމާފައިވަނީ އެޑިއުކޭޝަން މިނިސްޓްރީ އާއި އަރަބިއްޔާގެ މެނޭޖްމަންޓް ގޮވައިގެން ކޯޓަށް ދާން ކަމަށްވެސް ބެލެނިވެރިން ބުނެއެވެ.
Advertisement
This content is created and paid for by advertisers and does not involve Voice Journalists
