ރައީސުލްޖުމްޙޫރިއްޔާ އިބްރާޙިމް މުޙައްމަދު ޞާލިހު ދަތުރުކުރައްވަމުން ގެންދެވި މޮޓޯކޭޑު ހުއްޓުވި މައްސަލަ ބެލުމަށް، ރައީސުލްޖުމްހޫރިއްޔާގެ ސެކިއުރިޓީ ކޮމާންޑިން އޮފިސަރު މަޤާމުން އެކަހެރިކޮށްފި އެވެ. 

އެކަން ކަށަވަރުކޮށްދީ ޤައުމީ ދިފާއީ ބާރުން ނެރުނު ނޫސް ބަޔާނުގައި ބުނެފައިވަނީ ދިވެހިރާއްޖޭގެ ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ދަތުރުކުރެއްވި މޮޓޯކޭޑަށް ބަޔަކު ހުރަސްއެޅުމާއި ގުޅިގެން ހިނގައިދިޔަ ކަންކަން ބެލުމަށް ޤައުމީ ދިފާއީބާރުން ޚާއްސަ ކޮމެޓީއެއް އެކުލަވާލާފައިވާ ކަމަށެވެ. 

އެ ކޮމެޓީ އަކީ ދިފާއީ ބާރުގެ ލީޑަޝިޕްގެ މަޝްވަރާގެ މަތިން ދިފާއީ ވަޒީރު މާރިޔާ އަހުމަދު ދީދީ އުފައްދަވާފައިވާ ޚާއްސަ ކޮމެޓީއެއް ކަމަށާއި، އެ މައްސަލައާއި ގުޅިގެން މިހާރުވަނީ އެމްއެންޑީއެފްގައި އަމަލުކުރަމުން އަންނަ ޕްރޮސީޖާތަކާއި އެއްގޮތްވާ ގޮތުގެ މަތިން ޕްރެސިޑެންޝިއަލް ގާޑްސްގެ ކޮމާންޑިން އޮފިސަރުގެ މަޤާމުގައި ހުންނެވި ކާނަލް އަބްދުالله އިބްރާހިމް މަޤާމުގެ މަސްޢޫލިއްޔަތުތަކާއި ޒިންމާތަކުން އެކަހެރިކޮށްފައި ކަމަށް ދިފާއީ ބާރުން ވަނީ ބުނެފަ އެވެ. 

Advertisement

ދިފާއީ ބާރުން ބުނީ ރައީސުލްޖުމްޙޫރިއްޔާގެ ސެކިއުރިޓީ ކަންކަން ވަގުތީ ގޮތުން ބެލެހެއްޓުން މޭޖަ އިބްރާހިމް ޙަލީމާއި ހަވާލުކޮށްފައިވާ ކަމަށެވެ. 

ރައީސުލްޖުމްޙޫރިއްޔާގެ މޮޓޯކޭޑު ހުއްޓުވި މައްސަލައިގައި ސަލާމަތީ ޚިދުމަތްތައް 241 ކޮމެޓީއަށް ހާޒިރުކުރުމަށް އެ ކޮމެޓީއިންވެސް ވަނީ ނިންމާފަ އެވެ. އަދި އެކަން ހިނގައިދިޔަ ގޮތް އެ ކޮމެޓީއިން ވަނީ ދިރާސާކުރަން ފަށައިފަ އެވެ.