ޓްރާންސްޕޯޓު މިނިސްޓްރީން ބުނީ ރަމަޟާން މަހުގެ 1 ވަނަ ދުވަހުން ފެށިގެން ޝައްވާލު މަހުގެ 7 ވަނަ ދުވަހުގެ ނިޔަލަށް މާލޭ ސަރަހައްދުގައި ވިޔަފާރިމުދާ އެއްގަމު އުޅަނދުގައި ގަނޑުކޮށް އުފުލުމަށް ހާއްސަ ކޮށްފައިވާ ގަޑިތައް މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނުން އިއުލާނުކޮށްފި އެވެ. 

މި ގޮތަށް ކޮންމެ އަހަރަކުވެސް ކަނޑައަޅާފައިވަނީ އެއްގަމުމަގުން މުދާ އުފުލުމުގައި މަގު ބޭނުންކުރާ ފަރާތްތަކަށް ފަސޭހަވާނެގޮތަށް ކަންކަން ތަރުތީބުކުރުމަށެވެ. ރަމަޟާން މަހު އެންމެ ކާރު ބާރު ބޮޑުވާ ގަޑިތައް ކަމަށްވާ ހަވީރު 4:00 އިން ފެށީގެން ރޭނގަނޑު 8:00 ހަމައަހަށް އެއްގަމު އުޅަނދުގައި މުދާ ނުއުފުލޭނެއެވެ.

ހަމަ އެހެންމެ ރަމަޟާންމަހުގެ ހެންދު 6:00 އިން ހެނދުނު 9:00 އަށްވެސް ވިޔަފާރި މުދާ އެއްގަމު އުޅަނދުގައި އުފުލުމަކީ ވެސް މަނާކަމެއްކަމަށް ވަނީ ކަނޑައަޅާފައެވެ. ހެނދުނުގެ ގަޑިތަކަކީ ސްކޫލްތަކާއި އޮފީސްތައް ފެށޭގަޑިތަކަށް ވާތީ މި ގަޑިތަކުގައިވެސް މަގުމަތި ބޭނުންކުރާ ފަރާތްތަކަށް ދަތިކަމެއްނެތި ދަތުރު ކުރެވޭނެގޮތަށް އިންތިޒާމު ހަމަޖެއްސުމަށްކަމަށް ޓްރާންސްޕޯޓް މިނިސްޓްރީން ފާހަގަކޮށްފައިވެއެވެ.  

އޭގެ އިތުރުން ޓްރާންސްޕޯޓު މިނިސްޓްރީގެ އިއުލާންގައި ބުނެފައިވަނީ ބުރިޖުން މުދާ އުފުލޭނީ ހެންދުނު 9:00 އިން ހަވީރު 16:00 އަދި ދަންވަރު 1:00 އިން ފެށިގެން ހެނދު 6:00 އަށް ކަމަށާއި މި ވަގުތުތަކުގައި މާލެއިން ބުރިޖަށް މުދާ ހިފައިގެން އަންނަ އުޅަނދުތައް އަރަންވާނީ މާލޭ ދެކުނު ފަރާތުން ބޮޑުތަކުރުފާނު މަގުން ކަމަށެވެ. އަދި މި ނޫން ވަގުތުތަކުގައި ބުރިޖުން ވިޔަފާރި މުދާ އެއްގަމު އުޅަނދުގައި އުފުލުމަކީ މަނާކަމެއްކަމުގައިވެސް ޓްރާންސްޕޯޓް މިނިސްޓްރީން ވަނީ ކަނޑައަޅުއްވާފައެވެ.

އުޅަނދުތަކުން ކައްކާ ގޭހާއި ބޯފެން ހިފައިގެން ބުރިޖުހުރަސްކޮށް ދަތުރުކުރެވޭނެ ގަޑިތައްކަމަށް މިނިސްޓްރީން ބަޔާންކޮށްފައިވަނީ ހެނދުނު 9:00 އިން ފެށިގެން ހަވީރު 16:00 އަށް އަދި ރޭގަނޑު 20:00 އިން ހެނދު 6:00 އަށެވެ.

މިކަމަކީ ރަމަޟާންމަހު އެންމެންގެ ރައްކާތެރިކަމާއި ފަސޭހައަށްޓަކައި މިނިސްޓްރީން އެކަށައަޅުއްވައި އިއުލާން ކުރައްވާފައިވާކަމަކަށްވާތީ ދެންނެވުނު ގަޑިތަކުގައި މުދާ އުފުލުމަށް ސަމާލު ވުމަށާއި އަދި މި އިއުލާންއާއި ހިލާފަށް އުޅަނދުތަކުން ހުއްދަ ނޫން ގަޑިތަކުގައި މުދާ އުފުލާ އަދި ބުރިޖު ބޭނުން ކުރާނަމަ އެފަރާތްތަކާމެދު އެއްގަމު ދަތުރުފަތުރު ޤާނޫނު 5/2009 ގެ 3 ވަނަ މާއްދާގެ (ހ) އިން ބާރު ލިބިގެން އެ ގާނޫނުގެ 68 ވަނަ މާއްދާގެ ދަށުން 750 ރުފިޔާއިން ޖޫރިމަނާ ކުރެވޭނެކަންވެސް ހަނދާންކޮށްދީ، ހުރިހާ ފަރާތަކުން މިކަމުގައި އެއްބާރުލުން ދެއްވުމަށް އެދިވަޑައިގެންފައިވެއެވެ.

ރަމަޟާން މަހު އެއްގަމު އުޅަނދު ދުއްވާ ހުރިހާ ފަރާތްތަކުން ގަވާއިދާއި އެއްގޮތަށް އެތެރޭ މަގުތަކާއި އަދި ހަލިމަގުގައި (އެތެރޭ މަގުތަކުގައި 30 ކިލޯ މީޓަރަށް ވުރެ މަޑުން އަދި ހަލި މަގުގައި 50 ކިލޯ މީޓަރަށް ވުރެ ބާރު ނުވާނެ ސްޕީޑުގައި) ދުއްވުމަށާއި ދުއްވާއިރު މަގު ބޭނުންކުރާ އެހެން ފަރާތްތަކަށް ވެސް ބަލައިގެން ރައްކާތެރިކަމާއެކު މަގުތައް ބޭނުންކުރުމަށް ޓްރާންސްޕޯޓު މިނިސްޓްރީން ވަނީ އިލްތިމާސްކޮށްފަ އެވެ.