ދިވެހިރާއްޖޭގައި ހުންނަ ޕާކިސްޠާނުގެ ހައިކޮމިޝަނުން، ފާކިސްޠާނުގެ ޘަގާފީ ކުލަތަކާއި އެކު "ޕާކިސްތާން ދުވަސް 2023" ފާހަގަކޮށްފި އެވެ. 

ކޮންމެ އަހަރެއްގެ ވެސް މާރިޗު މަހުގެ 23 ވަނަ ދުވަހު ފާހަގަކުރާ "ޕާކިސްތާން ދުވަސް" ރާއްޖޭގައި ފާހަގަ ކޮށްފައި ވަނީ، މިއަދު ހެނދުނު އެކަމަށްޓަކައި ބޭއްްވުނު ހާއްސަ ދިދަ ނެގުމުގެ ރަސްމިއްޔާތަކާއި އެކުގައެވެ. މި ރަސްމިޔާތުގައި ޕާކިސްތާނުގެ ގައުމީ ސަލާމާއި އެކު އެ ގައުމުގެ ދިދަ ނަގައިދީފައިވަނީ ޕާކިސްތާނުގެ ހައިކޮމިޝަނަރު މުހައްމަދު ފައްޔާޒު ޖިލާނީއެވެ. މިރަސްމިއްޔާތުގައި ރާއްޖޭގައި ދިރިއުޅޭ ޕާކިސްތާނުގެ ގިނަ ރައްޔިތުން ވަނީ ބައިވެރިވެފަ އެވެ. 

ދިދަ ނެގުމުގެ ރަސްމިއްޔާތަށްފަހު ވާހަކަ ދައްކަވަމުން ޕާކިސްޠާނު މިޝަންގެ ޑެޕިއުޓީ ހެޑް ޒުލްޤަރުނައިން އަހުމަދު ވަނީ އެ ރަސްމިއްޔާތުގައި ބައިވެރިވި އެންމެހާ ފަރާތްތަކަށް ޕާކިސްތާން ދުވަހާއި ރަމަޟާން މަހުގެ ތަހުނިޔާ އަރިސްކުރައްވާފައެވެ. މީގެ އިތުރުން އޭނާ ވަނީ 14 އޯގަސްޓު 1947 ގައި ޕާކިސްތާނަށް މިނިވަންކަން ލިބިގެންދިޔައީ ކާބަފައިންގެ މަތިވެރި ގުރުބާނީއެއްގެ ސަބަބުން ކަން ފާހަގަކުރައްވައި އެ ފަރާތްތަކުގެ ޒިކުރާ އައު ކުރައްވާފައެވެ.    

މީގެ އިތުރުން، މި ރަސްމިޔާތުގައި ވާހަކަ ދައްކަވަމުން ހައި ކޮމިޝަނަރު މުހައްމަދު ފައްޔާޒު ޖިލާނީވަނީ މިއަދު ފާހަގަކުރެވޭ ޕާކިސްތާނުގެ ދުވަހަކީ އެތައް ގޮތަކުން އެ ގައުމުގެ ތާރީޚަށް މުހިންމު ދުވަހެއް ކަން ފާހަގަކުރައްވާފައެވެ. އެގޮތުން، މި ދުވަހަކީ ފާއިތުވި ދުވަސް ތަކުގެ ހަނދާން އައުކޮށް، އަދުގެ ހާލަތާއި މެދު ފުންކޮށް ވިސްނައި، ފާގަތި މުސްތަގުބަލެއް ބިނާ ކުރުމުގެ ރޫޙް އާލާކުރާ ދުވަހެއް ކަމަށް އޭނާ ވިދާޅުވި އެވެ.

ޕާކިސްތާން ދުވަސް ފާހަގަކުރުމުގެ ރަސްމިއްޔާތުގެ ތެރެއިން--ފޮޓޯ/ ޕާކިސްތާން ހައިކޮމިޝަން

މިއާއެކު އޭނާ ވިދާޅުވީ، ބައިނަލްއަގުވާމީ މުޖުތަމައުގެ މެންބަރެއްގެ ހައިސިއްޔަތުން ދުނިޔޭގައި އަމަން އަމާންކަން ގާއިމް ކުރުމަށް ޕާކިސްތާނަށް ނުހަނު ގިނަ މަސައްކަތް ކުރެވިފައިވާ ކަމަށެވެ. 

މި މޭރުމުން ވާހަކަ ދައްކަވަމުން އޭނާ ވަނީ އިންޑިޔާއިން ގާނޫނާއި ޚިލާފަށް ވެރިގެންފައިވާ ޖައްމު އާއި ކަޝްމީރުގައި ދިރިއުޅެމުންދާ ޕާކިސްތާނުގެ އަޚުންނާއި އުޚުތުންގެ ޒިކުރާ އައު ކުރައްވާފައެވެ. 

މީގެ އިތުރުން ޕާކިސްތާނުގެ ހައިކޮމިޝަނަރު ވަނީ ރަމަޟާން މަހުގެ ތަހުނިޔާ ދިވެހިރާއްޖޭގެ އެންމެހާ ރައްޔިތުންނަށް އަރިސްކުރައްވާފައެވެ. އަދި ރާއްޖެއާއި ޕާކިސްތާނާ ދެމުދުގައިވާ ގުޅުން ފާހަގަކުރައްވައި، މުސްތަގުބަލުގައި އެ ގުޅުން އިތުރަށް ބަދަހިވެގެންދާނެ ކަމަށްވެސް ވިދާޅުވި އެވެ. މީގެ އިތުރުން، ރާއްޖޭގެ އެންމެހައި ރައްޔިތުންނަށް ފަހި މުސްތަގްބަލެއް އެދޭ ކަމަށްވެސް ވިދާޅުވި އެވެ.