ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ މެނޭޖިންގ ޑިރެކްޓަރ ގެ މަގާމުން ހުސެއިން އަމްރު ވަކިކުރައްވައިފި އެވެ.
އަމްރު ވަކިކުރަން ޕީސީބީ އަށް ރައީސް އޮފީހުން ފޮނުވީ މިއަދު ހެނދުނު އެވެ. އަމްރު މަގާމުން ވަކިކުރަން ނިންމީ ސަރުކާރު ކުންފުނިތަކުގެ ހިންގުމަށް އަބަދުވެސް ބަދަލުތައް ގެންނަ އުސޫލުން ކަމަށް ރައީސް އޮފީހުން ބުންޏެވެ.
ޕީސީބީން ބުނީ އަމްރު އެ މަގާމުން ވަކިކުރުމަށްފަހު އެސްޓީއޯގެ ހިންގުން ވަގުތީ ގޮތުން އެ ކުންފުނީގެ ސީއެފްއޯގެ މަގާމުގައި ހުންނެވި މުހައްމަދު ނިޒާމްއާ ހަވާލުކޮށްފައިވާ ކަމަށެވެ.
އަމްރުއަކީ އެމްޑީޕީގެ ރައީސް މުޙައްމަދަށް ތާއީދު ކުރައްވާ ބޭފުޅެކެވެ.
އެގޮތުން އެމްޑީޕީގެ ރިޔާސީ ޕްރައިމަރީގައި ވެސް އަމްރު ތާއީދު ކުރައްވާފައިވަނީ ނަޝީދަށެވެ. އަދި އެ އިންތިޚާބު ނާކާމިޔާބުވުމާއި ގުޅިގެން ނަޝީދު އުފައްދަވާފައިވާ "ފިކުރެއްގެ ދިރުން" ގޮފި ފުޅާކުރުމުގައިވެސް އަމްރު ގެންދަވަނީ އިސް ރޯލެއް އަދާކުރައްވަމުން ނެވެ.
އަމްރު މަޤާމުން ވަކިކުުރުމާއި ގުޅިގެން ނަޝީދަށް ތާއީދު ކުރައްވަާ މެމްބަރުން ވިދާޅުވަމުން ދަނީ އެއީ ސިޔާސީ ގޮތުން ޚިޔާލު ފަތާތުވުމުން އެކަން ހަޖަމު ނުކުރެވިގެން އެޅުއްވި ފިޔަވަޅެއް ކަމަށެވެ.
އެހެން ނަމަވެސް ރައީސް ޞާލިހަށް ތާއީދު ކުރައްވާ މެމްބަރުން ސަރުކާރުގެ ދިފާއުގައި ވިދާޅުވަމުން ގެންދަވަނީ އެކަން އެގޮތަށް ކުރެއްވީ ރައީސުލްޖުމްޙޫރިއްޔާގެ ސިޔާސަތު ޤަބޫލު ނުކުރައްވާ ބޭފުޅަކަށް އެ ސިޔާސަތު ތަންފީޒުކުރަން އުނދަގޫވާނެތީ ކަމަށެވެ. އަދި އެކަމުގެ ސަބަބުން ރައްޔިތުންނަށް ޚިދުމަތް ފޯރުކޮށްދޭން ދަތިވާނެތީ ކަމަށެވެ.
Advertisement
This content is created and paid for by advertisers and does not involve Voice Journalists
